ມີເດຍລາວແຂວງບໍ່ແກ້ວ ໂດຍ: ສົມສັກ ໄຊຍະຄາມ
ໃນວັນທີ 26 ກໍລະກົດ 2021ນີ້, ຄະນະພັກ-ຄະນະບັນຊາ ກອງພັນນ້ອຍ 419 ທີ່ຂື້ນກັບກອງບັນຊາການ ທະຫານແຂວງບໍ່ແກ້ວ ໄດ້ນໍາພາ-ຊີ້ນໍາພະນັກງານ-ນັກຮົບ ພາຍໃນກົມກອງ ລົງມືທໍາການຜະລິດປັກດໍາເຂົ້ານາປີ ເພື່ອໃຫ້ທ່ວງທັນກັບລະດູການ. ສະຫາຍ ພັນຕີ ທອງດີ ດວງມາລາ ຫົວໜ້າພະລາທິການກອງພັນນ້ອຍ 419 ໃຫ້ຮູ້ວ່າ ເມື່ອເຖິງລະດູການໃນການປັກດຳເຂົ້ານາປີ ໃນໄລຍະເດືອນ ມິຖຸນາ-ເດືອນກໍລະກົດ ຂອງທຸກໆປີ, ຄະນະພັກ-ຄະນະບັນຊາ ແລະ ພະນັກງານ-ນັກຮົບ ໃນທົ່ວ ກອງພັນນ້ອຍ 419 ໄດ້ພ້ອມພຽງຮຽງໜ້າກັນ ທຳການຜະລິດປັກດຳເຂົ້ານາປີເພື່ອໃຫ້ທ່ວງທັນກັບລະດູການ.

ເຊິ່ງມາຮອດປັດຈຸບັນການປັກດໍາເຂົ້ານາປີຂອງກົມກອງແມ່ນສໍາເລັດເປັນທີ່ຮຽບຮ້ອຍແລ້ວ, ເຊິ່ງມັນສະແດງໃຫ້ເຫັນຄວາມສາມັກຄີອັນແໜ້ນແຟ້ນ ແລະ ຄວາມດຸໝັ່ນຂະຫຍັນພຽນທີ່ເອົາໃຈໃສ່ຕໍ່ໜ້າທີ່ວຽກງານຂອງພະນັກງານ-ນັກຮົບໃນກົມກອງ, ທີ່ມີຄວາມບຸກບືນຫ້າວຫັນໃນການປັກດຳເຂົ້ານາປີທັງນີ້, ກໍເພື່ອປະຕິບັດຕາມທິດ ທາງເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍ ຕົນເອງຂອງກົມໃຫຍ່ພະລາທິ ການວາງອອກ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານ ຂອງກະຊວງປ້ອງກັນປະເທດ. ຄຽງຄູ່ກັບການກໍ່ສ້າງກອງ ວັດທະນະທຳ-ນັກຮົບວັດທະນະ ທຳ, ກອງ 3 ປອດ, ແມ່ຍິງ 3 ດີ, ຊາວໜຸ່ມ 4 ບຸກຕາມແຜນ ການທີ່ວາງໄວ້, ເຊິ່ງເນື້ອທີ່ນາ ທໍາການຜະລິດມີປະມານ 8.5 ເຮັກຕາ. ປີຜ່ານມາ ແມ່ນສະເລ່ຍຜົນໄດ້ຮັບແມ່ນ 14 ໂຕນຕໍ່ປີ. ສໍາລັບປີນີ້ຄາດໝາຍ ຜົນເກັບກ່ຽວເຂົ້ານາປີຈະໃຫ້ໄດ້ຫຼາຍກວ່າປີຜ່ານມາ.