ມີເດຍລາວແຂວງບໍ່ແກ້ວ ໂດຍ: ສົມໄຊ ສີລາຈັນ.
ວັນທີ 27 ກໍລະກົດ 2021 ນີ້, ຄະນະພັກຮາກຖານ ຫ້ອງການບັນຊາ ກອງບັນຊາການທະຫານແຂວງບໍ່ແກ້ວ ໄດ້ຈັດກອງປະຊຸມສະຫຼຸບວຽກງານການນຳພາ ປະຈໍາໄຕມາດ l-II ແລະ ວາງທິດທາງແຜນການປະຈຳໄຕມາດ lIl ປີ 2021, ໂດຍການເປັນປະທານຂອງ ສະຫາຍ ພັນໂທ ເນັງສີດາ ເບຼຍລືມົວ ຄະນະພັກຮາກຖານ ຫົວໜ້າຫ້ອງການບັນຊາ ກອງບັນຊາການທະຫານ ແຂວງບໍ່ແກ້ວ, ມີຄະນະພັກຮາກຖານ, ໜ່ວຍພັກຂື້ນກັບ, ສະມາຊິກພັກສົມບູນ-ສຳຮອງ ເຂົ້າຮ່ວມ 53 ສະຫາຍ.

ສະຫາຍ ພັນໂທ ບຸນຈັນ ສີທະບູນ ຮອງຄະນະພັກຮາກຖານ ຫົວໜ້າກອງປະຕິບັດງານ 034 ກອງບັນຊາການທະຫານແຂວງບໍ່ແກ້ວ ການໄດ້ສະຫຼຸບຕີລາຄາການຊີ້ນໍາ-ນໍາພາປະຈໍາໄຕມາດຜ່ານມາ ໂດຍໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້, ໃນໄຕມາດຜ່ານມາຄະນະພັກຮາກຖານ ໄດ້ເອົາໃຈໃສ່ ຊີ້ນໍາ-ນໍາພາວຽກງານຮອບດ້ານ ປິ່ນອ້ອມໜ້າທີ່ການເມືອງຂອງຫ້ອງການ ສັງລວມແລ້ວເຫັນວ່າແຕ່ລະດ້ານປະຕິບັດໄດ້ໂດຍພື້ນຖານ, ໃນນີ້, ໄດ້ຮັບປະກັນ ວຽກງານກຽມພ້ອມສູ້ຮົບ, ວຽກງານອົບຮົມ-ຫັດແອບ ແລະ ວຽກງານແກ້ໄຂຊີວິດການເປັນຢູ່ ດ້ວຍການເພີ່ມພູນຜະລິດຜົນຕາມເງື່ອນໄຂຕົວຈິງຂອງກົມກອງ, ໄດ້ຖືສໍາຄັນວຽກງານສຶກ ສາອົບຮົມການເມືອງ-ນຳພາ ແນວ ຄິດຕໍ່ຖັນແຖວພະນັກງານ-ນັກຮົບ ເຮັດໃຫ້ເຂົາເຈົ້າມີຄຸນທາດການເມືອງໜັກແໜ້ນ, ເອົາໃຈໃສ່ວຽກງານກໍ່ສ້າງພັກ, ກໍ່ສ້າງພະນັກງານ, ວຽກງານ ປ້ອງກັນຄວາມສະຫງົບໄດ້ເປັນເຈົ້າການຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆບໍ່ໃຫ້ ເກີດຂຶ້ນໃນຂອບເຂດກົມກອງຮັບຜິດຊອບເຊິ່ງໄດ້ເຮັດໃຫ້ສະພາບ ມີຄວາມສະຫງົບປອດໄພ 100%

ໂອກາດນີ້ ສະຫາຍ ພັນໂທ ເນັງສີດາ ເບຼຍລືມົວ ໄດ້ເນັ້ນໜັກ ໜ່ວຍພັກ ແຕ່ລະຂັ້ນ ເອົາໃຈໃສ່ຕໍ່ວຽກງານສຶກສາອົບຮົມການເມືອງ-ນຳພາແນວຄິດ ຕິດພັນກັບວຽກງານວິຊາສະເພາະ ກໍຄືໜ້າທີ່ການເມືອງ ຂອງຕົນ, ຍຶດໝັ້ນຫຼັກການລວມສູນປະຊາທິປະໄຕ, ແບ່ງວຽກງານໃຫ້ບຸກຄົນຮັບຜິດຊອບ ຢ່າງຈະແຈ້ງ, ປັບປຸງແບບແຜນວິທີເຮັດວຽກແບບມີວິທະຍາສາດທັນສະໄໝ, ປຶກສາຫາລືເປັນໝູ່ຄະນະ, ມີຄວາມເປັນເອກະພາບໃນທຸກວຽກງານ, ການເຮັດວຽກຕ້ອງມີການສະຫຼຸບຖອດຖອນບົດຮຽນໃນແຕ່ລະໄລຍະເປັນປົກກະຕິ, ຮັດແໜ້ນຄວາມສາມັກຄີໃຫ້ເຂັ້ມແຂງຮອບດ້ານ. ພ້ອມກັນນັ້ນ, ກໍຕ້ອງຍົກສູງຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ, ສືບຕໍ່ຊີ້ນຳ-ນຳພາປັບປຸງ ພັດທະນາກົມກອງໃຫ້ກ້າວຂຶ້ນ ຕາມທິດສ້າງກອງທັບປະຕິວັດ ມີລະບຽບແບບແຜນທັນສະໄໝ.