ມີເດຍລາວແຂວງບໍ່ແກ້ວ ໂຮງຮຽນ ມສ ສົງ ແຂວງບໍ່ແກ້ວ ຈັດການສອບເສັງຈົບຊັ້ນ ມ7 ປະຈຳສົກຮຽນ 2020-2021 ໃນວັນທີ 27 ກໍລະກົດນີ້ ໂດຍການເປັນປະທານເປີດຫົວບົດສອບເສັງ ຂອງພຣະປຣີຊາສາສະນະໂສພົນມຸນີ ປທ ໄຊຍະພອນ ສີປັນຍາ ຫົວໜ້າກຳມາທິການສຶກສາສົງແຂວງບໍ່ແກ້ວ, ມີບັນດາຄະນະຮັບຜິດຊອບການສອບເສັງ, ຄູອາຈານ ແລະ ນັກເຂົ້າຮ່ວມ.

ການສອບເສັງຈົບຊັ້ນ ມ7 ຂອງໂຮງຮຽນ ມສ ສົງແຂວງ ມີນັກຮຽນເຂົ້າຮ່ວມສອບເສັງທັງໜົດ 29 ຄົນ, ແບ່ງອອກເປັນສອງຫ້ອງສອບເສັງ, ວິຊາທີ່ນຳມາສອບເສັງມີ 8 ວິຊາ ຄື: ວິຊາພາສາບາລີ, ອະພິທຳມັດຖະສັງຄະຫະ, ວິຊາທຳມະ, ພາສາລາວ-ວັນນະຄະດີ,ວິທະຍາສາດສັງຄົມ, ວິທະຍາສາດທຳມະຊາດ, ພາສາອັງກິດ ແລະ ວິຊາຄະນິດສາດ, ການສອບເສັງວັນທີ 27 ແມ່ນສອບເສັງສາຍວິຊາທາງທຳ ແລະ ວັນທີ 28 ຫາ 30 ແມ່ນສອບເສັງສາຍວິຊາສາມັນທົ່ວໄປຄືໂຮງຮຽນແຫ່ງຕ່າງໆໃນຂອບເຂດທົ່ວປະເທດ.

ການສອບເສັງໃນຄັ້ງນີ້ ຄະນະຮັບຜິດສອບການສອບເສັງແມ່ນໄດ້ເອົາໃຈໃສ່ ປະຕິບັດມາດຕະການປ້ອງກັນ, ສະກັດກັ້ນ,ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ -19 ຂອງຄະນະສະເພາະກິດຂັ້ນແຂວງວາງອອກ ແລະ ກົດລະບຽບຂອງການສອບເສັງຢ່າງເຄັ່ງຄັດ ເພື່ອແນ່ໃສ່ເຮັດໃຫ້ການສອບເສັງໄດ້ດຳເນີນໄປດ້ວຍຜົນສຳເລັດຕາມຄາດໝາຍທີ່ວາງໄວ້ ຮັບປະກັນໃນປອດໄພຈາກພະຍາດໂຄວິດ -19 ແລະ ປະສິດທິພາບ ແລະ ປະສິດທິຜົນຂອງການສອບເສັງຢ່າງແທ້ຈິງ.