ມີເດຍລາວແຂວງສາລະວັນ ຂ່າວ: ທິດລານີ ໂຄດໂຍທາ.
ຄະນະພັກຮາກຖານ ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງສາລະວັນ ສະຫຼຸບຕີລາຄາການນຳພາຮອບດ້ານ ໃນໄລຍະ 6 ເດືອນຕົ້ນປີ ແລະວາງທິດທາງແຜນການ 6 ເດືອນທ້າຍປີ 2021, ຈັດຂຶ້ນໃນວັນທີ 26 ກໍລະກົດນີ້, ທີ່ຫ້ອງປະຊຸມຂອງຕົນ, ໂດຍການເປັນປະທານຂອງ ສະຫາຍ ມະໄລວອນ ສີປະເສີດ ກຳມະການພັກແຂວງ ເລຂາຄະນະພັກຮາກຖານ ຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງ, ມີບັນດາຮອງເລຂາ, ຄະນະພັກຮາກຖານ, ເລຂາໜ່ວຍພັກ, ຄະນະໜ່ວຍພັກ ພ້ອມດ້ວຍສະມາຊິກພັກສົມບູນ-ສຳຮອງເຂົ້າຮ່ວມ.

ສະຫາຍ ບຸນກ່ອງ ເກດທອງຄຳ ຮອງເລຂາຄະນະພັກຮາກຖານ ຮອງຫົວໜ້າພະແນກ ຖວທ ແຂວງ ໄດ້ຜ່ານບົດຫຼຸບຕີລາຄາການນຳພາຮອບດ້ານ. ຄະນະພັກຮາກຖານພະແນກ ປະກອບມີ 4 ໜ່ວຍພັກ ທີ່ຂຶ້ນກັບຄື: ໜ່ວຍພັກຄຸ້ມຄອງ-ບໍລິຫານ, ໜ່ວຍພັກຖະແຫຼງຂ່າວ-ສືມວນຊົນ, ໜ່ວຍພັກວັດທະນະທຳ ແລະໜ່ວຍພັກທ່ອງທ່ຽວ ມີສະມາຊິກພັກທັງໝົດ 53 ສະຫາຍ, ຍິງ 18 ສະຫາຍ, ສະມາຊິກພັກສຳຮອງ 8, ຍິງ 7 ສະຫາຍ.

ຕະຫຼອດໄລຍະ 6 ເດືອນຜ່ານມາ ຄະນະພັກຮາກຖານ ກໍ່ຄື 4 ໜ່ວຍພັກ ທີ່ຂຶ້ນກັບ ໄດ້ຖືເອົາການສຶກສາອົບຮົມການເມືອງ-ແນວຄິດ ເປັນກົກ, ເຜີຍແຜ່, ເຊື່ອມຊຶມ, ມະຕິ, ຄຳສັ່ງຕ່າງໆຂອງພັກ-ລັດ ເປັນປົກກະຕິ ແລະຕໍ່ເນື່ອງ, ຖືເອົາການສຳຫຼວດກວດກາ ແລະສຶກສາອົບຮົມການເມືອງແນວຄິດ ໃຫ້ພະນັກງານສະມາຊິກພັກ-ພະນັກງານລັດຖະກອນ ມີຄວາມອຸ່ນອ່ຽງທຸ່ນທ່ຽງ ເປັນເອກະພາບຕໍ່ແນວທາງຂອງພັກ, ມີຄວາມບຸກບືນຫ້າວຫັນເຮັດສຳເລັດໜ້າທີ່ວຽກງານທີ່ໄດ້ຮັບມອບໝາຍ, ຍຶດໝັ້ນ ແລະປະຕິບັດຕາມ 5 ຫຼັກການ 3 ທິດນຳ ໃນການກໍ່ສ້າງປັບປຸງ, ທັງສາມາດເລື່ອນສະມາຊິກພັກສຳຮອງຂຶ້ນສົມບູນ 6 ສະຫາຍ, ຍິງ 2 ສະຫາຍ ແລະຂະຫຍາຍມະຫາຊົນກ້າວໜ້າ ເຂົ້າເປັນສະມາຊິກພັກສຳຮອງ ໄດ້ 8 ສະຫາຍ, ຍິງ 7 ສະຫາຍ, ດ້ານແບບແຜນວິທີການນຳພາ ໄດ້ຍຶດໝັ້ນຫຼັກການຊີ້ນຳໆພາວຽກງານຫຼັກການລວມສູນປະຊາທິປະໄຕ ນຳພາເປັນໝູ່ຄະນະ, ແບ່ງວຽກ, ແບ່ງໜ້າທີ່ໃຫ້ບຸກຄົນຮັບຜິດຊອບຢ່າງຈະແຈ້ງ ຕາມຫຼັການທີ່ກຳນົດໄວ້ໃນກົດລະບຽບພັກ,

ເຮັດວຽກມີແບບແຜນມີການຕິດຕາມຊຸກຍູ້ ຖືເອົາການສ່ອງແສງປະຈຳອາທິດ, ການດຳເນີນຊີວິດປະຈຳເດືອນ ເປັນບ່ອນອີງໃນການກວດກາ ແລະປະເມີນຜົນ, ຂະບວນການນຳພາປະຕິບັດໜ້າທີ່ການເມືອງ, ການປະຕິບັດແນວທາງປ້ອງກັນຊາດປ້ອງກັນຄວາມສະຫົງບ ໄດ້ແຕ່ງຕັ້ງພະນັກງານສະມາຊິກພັກ-ພະນັກງານລັດຖະກອນ ປ້ອງກັນເວນຍາມພາຍໃນສຳນັກງານ, ນຳພາການພັດທະນາເສດຖະກິດ-ສັງຄົມ, ການນຳພາອົງການຈັດຕັ້ງມະຫາຊົນ, ການປັບປຸງ, ກໍ່ສ້າງພັກ ແລະກໍ່ສ້າງພະນັກງານ, ການກໍ່ສ້າງຮາກຖານການເມືອງຕາມທິດ 3 ສ້າງ. ຄຽງຄູ່ກັບການຊີ້ນຳ-ນຳພາວຽກງານການເມືອງແນວຄິດ ຢ່າງເຂັ້ມແຂງ ແລະ ໜັກແໜ້ນ ອັນເຮັດໃຫ້ວຽກງານວິຊາສະເພາະຫຼາຍດ້ານ ພົ້ນເດັ່ນ ເປັນຕົ້ນ: ວຽກງານຖະແຫຼງຂ່າວ-ສື່ມວນຊົນ, ວັດທະນະທຳ ແລະ ທ່ອງທ່ຽວ ທີ່ໄດ້ຕັ້ງໜ້າປະຕິບັດໜ້າທີ່່ຢ່າງແຂງແຮງ ເຮັດໃຫ້ບັນດາຄາດໝາຍຫຼາຍດ້ານ ກໍ່ໄດ້ຮັບຜົນສຳເລັດ.

ກອງປະຊຸມຄັ້ງນີ້, ບັນດາສະຫາຍສະມາຊິກພັກ, ພະນັກງານຫຼັກແຫຼ່ງ ກໍ່ໄດ້ປະກອບຄຳຄິດເຫັນ ຕໍ່ກັບການຕີລາຄາການນຳພາຮອບດ້ານຂອງຄະນະພັກຮາກຖານພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຍົກໃຫ້ເຫັນໃນບາງຈຸດບາງດ້ານໃນການຊີ້ນຳໆພາ ກໍ່ຄືພາຍໃນ 4 ໜ່ວຍພັກ ທີ່ຂຶ້ນກັບ, ບາດກ້າວ, ຮູບແບບວິທີການຈັດຕັ້ງປະຕິບັດ ແລະ ການປະເມີນສະມາຊິກພັກ, ໜ່ວຍພັກ ຢ່າງພາວະວິໄສ, ສອດຄ່ອງ ແລະ ແທດເໝາະຕາມຄວາມເປັນຈິງ ໃນການກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ.