ໃນຕອນເຊົ້າຂອງວັນທີ 27 ກໍລະກົດ 2021 ຄະນະສື່ມວນຊົນຈາກສູນກາງ ແລະ ໜ່ວຍງານຈາກພະແນກສາທາລະນະສຸກ ແຂວງຈຳປາສັກ ໄດ້ລົງຕິດຕາມການສັກວັກຊິນ ຈອນສັນ ແອນ ຈອນສັນ ຢູ່ຈຸດສັກວັກຊິນຫ້ອງການສາທາລະນະສຸກນະຄອນປາກເຊ.

ຈາກການສຳພາດ ທ່ານ ນາງ ສຸພາພັນ ສຸກຈະເລີນ ຮອງຫົວໜ້າຫ້ອງການສາທາລະນະສຸກນະຄອນປາກເຊ ລາຍງານໃຫ້ຮູ້ວ່າ ນະຄອນປາກເຊ ເປັນເຂດໜຶ່ງທີ່ມີປະຊາກອນໜາແໜ້ນກວ່າໝູ່ ຂອງແຂວງຈຳປາສັກ ແລະ ໄດ້ຮັບວັກຊີນ ຈອນສັນ ແອນ ຈອນສັນ ທີ່ທາງແຂວງແບ່ງປັນໃຫ້ ຈຳນວນ 19,250 ໂດສ ເຊິ່ງຈະໄດ້ເລິ່ມສັກໃຫ້ແກ່ແພດໝໍ, ທະຫານ, ຕຳຫຼວດ ຜູ້ທີ່ເຮັດວຽກໃກ້ຊິດກັບກຸ່ມສ່ຽງ ລວມໄປເຖິງປະຊາຊົນຜູ້ທີ່ມີອາຍຸ 60 ປີ ຂຶ້ນໄປ, ຜູ້ທີ່ມີພະຍາດປະຈຳໂຕ ແລະ ປະຊາຊົນທົ່ວໄປທີ່ມີອາຍຸ 18 ປີ ຂຶ້ນໄປ.

ການມາຮັບວັກຊິນໃນຄັ້ງນີ້ ແມ່ນໄດ້ມີການແນະນຳໃຫ້ປະຊາຊົນ ຮັກສາໄລຍະຫ່າງ ມີການຈັດສັນຢ່າງເປັນລະບົບຕາມຄິວ ແລະ ສັງເກດເຫັນວ່າປະຊາຊົນໃຫ້ຄວາມຮ່ວມມືເປັນຢ່າງດີ ແລະ ມີການຕື່ນໂຕມາຮັບວັກຊີນພໍສົມຄວນ. ເຊິ່ງຈະສືບຕໍ່ສັກວັກຊິນໄປຈົນເຖິງວັນທີ 3 ສິງຫາ 2021 ແລະ ຈະສືບຕໍ່ທະຍອຍສັກໃຫ້ຄົບ. ນອກຈາກນີ້ທ່ານຍັງໄດ້ເຊີນຊວນປະຊາຊົນໃຫ້ມາສັກວັກຊິນເພື່ອປ້ອງກັນພະຍາດໂຄວິດ-19. ແລະ ຂໍຂອບໃຈມາຍັງລັດຖະບານສະຫະລັດອາເມລິກາໃນການຊ່ວຍເຫຼືອວັກຊິນ ຈອນສັນ ແອນ ຈອນສັນໃນຄັ້ງນີ້.

ຜ່ານການລົງຕິດຕາມສຳພາດພະນັກງານ, ຜູ້ອາວຸໂສ ແລະ ປະຊາຊົນທີ່ມາຮັບວັກຊິນໃນຄັ້ງນີ້ ເຫັນວ່າ ຜູ້ທີ່ມາຮັບວັກຊິນມີຄວາມດີໃຈ, ຮູ້ສຶກປອດໄພ ແລະ ພໍໃຈໃນການບໍລິການຂອງເຈົ້າໜ້າທີ່ພະນັກງານແພດໝໍ. ນອກຈາກນີ້ຍັງໄດ້ສະແດງຄວາມຂອບໃຈມາຍັງລັດຖະບານສະຫະລັດອາເມລິກາ ຜູ້ທີ່ໃຫ້ການຊ່ວຍເຫຼືອວັກຊິນໃນຄັ້ງນີ້.

ການລົງເກັບກຳຂ່າວໃນຄັ້ງນີ້ແມ່ນໄດ້ຮັບການສະຫນັບສະຫນູນຈາກອົງການຢູນີເຊັບ (UNICEF) ປະຈໍາ ສປປ ລາວ ແລະ ສູນສື່ສານເພື່ອສຸຂະພາບສຸຂະສຶກສາ ກະຊວງສາທາລະນະສຸກ.

Medialaos MMD