ມີເດຍລາວແຂວງເຊກອງ ຂ່າວ: ດາວສະຫວັນ
ຕອນເຊົ້າຂອງວັນທີ 27 ກໍລະກົດ 2021 ນີ້, ພະແນກແຮງງານ ແລະ ສະຫວັດດີການສັງຄົມແຂວງເຊກອງ ໄດ້ມອບເຂົ້າສານໃຫ້ເມືອງລະມາມຈຳນວນ 10 ໂຕນ ຫລືເທົ່າກັບ 10.000 ກິໂລກຣາມ ໃຫ້ເມືອງລະມາມ ໂດຍມີທ່ານ ແກດ ດາລາແພງ ກຳມະການພັກແຂວງ ຫົວໜ້າພະແນກ ແຮງງານ ແລະ ສະຫວັດດີການສັງຄົມ ແຂວງ, ທ່ານ ບຸນນ້ອຍ ແສງອີນແກ້ວ ກຳມະການພັກເມືອງ ຫົວໜ້າຫ້ອງການ ແຮງງານ ແລະ ສະຫວັດດີການສັງຄົມເມືອງ, ມີບັນດາຫົວໜ້າ,ຮອງຂະແໜງທີ່ກ່ຽວຂ້ອງມາຈາກພະແນກດັ່ງກ່າວ, ຫົວໜ້າ,ຮອງ ໜ່ວຍງານ ພ້ອມດ້ວຍພະນັກວິຊາການພາຍໃນ ຫ້ອງການ ແຮງງານ ແລະ ສະຫວັດດີການສັງເມືອງເຂົ້າຮ່ວມ.

ກ່ອນກ່າວມອບ ທ່ານ ແກດ ດາລາແພງ ຫົວໜ້າພະແນກ ຮສສ ແຂວງໄດ້ມີຄຳເຫັນໃນພິທີຄັ້ງນີ້ວ່າ: ໃນປີ 2021 ກະຊວງແຮງງານ ແລະ ສະຫວັດດີການສັງຄົມໄດ້ຮັບອະນຸມັດຈາກລັດຖະບານ ສປປ ລາວ ແລະ ລັດຖະບານຍີ່ປຸ່ນໃນການຈັດຕັ້ງປະຕິບັດໂຄງການຄັງແຮເຂົ້າສານເພື່ອຊາວຍເຫຼືອຜູ້ປະສົບໄພພິບັດທຳມະຊາດ ພາຍໄຕ້ກອງທຶນເພື່ອຮ່ວມງານ ເຄອາລ໌ວັນ(KR1) ຊຶ່ງໄດ້ແຈກຢາຍໃຫ້ບັນດາເມືອງທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ເປັນຕົ້ນ ໄພແຫ້ງແລ້ງ, ນ້ຳຖ້ວມ, ສັດຕູພືດທຳລາຍຜົນລະປູກ ຢູ່ບັນດາແຂວງຂອບເຂດທົ່ວປະເທດ; ສຳລັບເມືອງລະມາມ ແຂວງ ເຊກອງແມ່ນໄດ້ຮັບເຂົ້າສານຈຳນວນທັງໝົດ 10 ໂຕນ, ຈຳນວນ 200 ສອບ ລວມມູນຄ່າ 92.800.000 ກີບ.

ກ່າວຮັບໂດຍທ່ານ ບຸນນ້ອຍ ແສງອິນແກ້ວ ກຳມະການພັກເມືອງ ຫົວໜ້າຫ້ອງການ ຮສສ ເມືອງລະມາມ ພ້ອມທັງສະແດງຄວາມພາກພູມໃຈ ແລະຮູ້ບຸນຄຸນເປັນຢ່າງສູງ ມາຍັງພັກ-ລັດ ຖະບານ ສປປ ລາວ ກໍ່ຄືກະຊວງແຮງງານ ແລະສະຫວັດດີການສັງຄົມ ແລະລັດຖະບານຍີ່ປຸ່ນ ທີ່ເປັນຫ່ວງເປັນໃຍ ແລະໃຫ້ການຊ່ວຍເຫຼືອປະຊາຊົນທີ່ປະສົບໄພພິບັດໃນຄັ້ງນີ້ ພ້ອມຈະນຳເຂົ້າສານຈຳນວນດັ່ງກ່າວໄປແຈກຢາຍໃຫ້ຄອບຄົວປະຊາຊົນທີ່ໄດ້ຮັບຜົນກະທົບຈາກໄພພິບັດຢູ່ເມືອງລະມາມຢ່າງທົ່ວເຖິງ.