ມີເດຍລາວແຂວງໄຊສົມບູນ ຂ່າວ: ພຸດທະສອນ ເວດສະວົງ
ສະຫາຍ ນາງ ຄຳສີ ສິດທິວໍລະດາ ກຳມະການພັກແຂວງ, ປະທານສະຫະພັນແມ່ຍິງ ແຂວງໄຊສົມບູນ ພ້ອມດ້ວຍຄະນະ ໄດ້ລົງເຄື່ອນໄຫວ ແລະ ຊຸກຍູ້ວຽກງານຮອບດ້ານ ຢູ່ໜ່ວຍແມ່ຍິງພະແນກໂຍທາທິການ ແລະ ຂົນສົ່ງ ແຂວງ ໃນວັນທີ 28 ກໍລະກົດ ນີ້ ທີ່ຫ້ອງປະຊຸມຂອງພະແນກ ໂດຍການຕ້ອນຮັບຂອງສະຫາຍ ນາງ ຜາສຸກ ຄຸນມະນີ ປະທານສະຫະພັນແມ່ຍິງ ໜ່ວຍພະແນກໂຍທາທິການ ແລະ ຂົນສົ່ງ ແຂວງ ພ້ອມດ້ວຍສະມາຊິກແມ່ຍິງພາຍໃນໜ່ວຍ ເຂົ້າຮ່ວມ.

ໂອກາດນີ້ ສະຫາຍ ນາງ ຜາສຸກ ຄຸນມະນີ ປະທານສະຫະພັນແມ່ຍິງ ໜ່ວຍພະແນກໂຍທາທິການ ແລະ ຂົນສົ່ງ ແຂວງ ໄດ້ລາຍງານການເຄື່ອນໄຫວວຽກງານປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ໃຫ້ປະສະຫະພັນແມ່ຍິງແຂວງໄດ້ຮັບຊາບ ຊຶ່ງຕະຫລອດໄລຍະທີ່ຜ່ານມາ ໜ່ວຍສະຫະພັນແມ່ຍິງຂອງພະແນກ ໄດ້ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ສະມາຊິກຂອງຕົນຢ່າງເປັນປົກກະຕິ ເພື່ອເຮັດໃຫ້ເອື້ອຍນ້ອງແມ່ຍິງມີແນວຄິດອຸ່ນອ່ຽນ ທຸ່ນທ່ຽງ ເຊື່ອໝັ້ນຕໍ່ແນວທາງນະໂຍບາຍຂອງພັກ-ລັດ, ມີສະຕິຕໍ່ການຈັດຕັ້ງ ແລະ ມີຄວາມຮັບຜິດຊອບສູງຕໍ່ໜ້າທີ່ວຽກງານ ພ້ອມທັງ ຮັກສາມູນເຊື້ອວັດທະນະທຳຮີດຄອງປະເພນີອັນດີງາມຂອງຊາດ ໄປພ້ອມກັບການຈັດຕັ້ງປະຕິ ບັດວຽກງານວິຊາສະເພາະ ໂດຍເຮັດສຳເລັດໜ້າທີ່ ທີ່ການຈັດຕັ້ງມອບໝາຍໃຫ້ ນອກຈາກນີ້ ຍັງໄດ້ເອົາໃຈໃສ່ສຶກສາອົບຮົມເອື້ອຍນ້ອງແມ່ຍິງ ໃນການສັ່ງສອນລູກເຕົ້າໃຫ້ເປັນຄົນດີ, ມີຄວາມຮູ້ຄວາມສາມາດ ເພື່ອຮັບໃຊ້ສັງຄົມ ຄະນະດຽວກັນ ຍັງໄດ້ເອົາໃຈໃສ່ໃນການສ້າງສາເສດຖະກິດຄອບຄົວດ້ວຍການປູກຝັງ-ລ້ຽງສັດ ຜະລິດເປັນສິນຄ້າ ເພື່ອຍົກລະດັບຊີວິດການເປັນຢູ່ຂອງຄອບຄົວໃຫ້ດີຂຶ້ນເປັນກ້າວໆ ໄປພ້ອມກັບການຈັດຕັ້ງປປະຕິບັດເນື້ອໃນຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ແລະ ວຽກງານດ້ານອື່ນໆ ກໍ່ໄດ້ມີຜົນສຳເລັດຕາມລະດັບຄາດໝາຍ.

ໃນໂອກາດມີຄຳເຫັນໂອ້ລົມຂອງ ສະຫາຍ ນາງ ຄຳສີ ສິດທິວໍລະດາ ສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດ ຂອງສະຫະພັນແມ່ຍິງ ໜ່ວຍພະແນກໂຍທາທິການ ແລະ ຂົນສົ່ງ ແຂວງ ທີ່ສາມາດຍາດມາໄດ້ໃນໄລຍະຜ່ານມາ ສະຫາຍໄດ້ຮຽກຮ້ອງໃຫ້ເອົາໃຈໃສ່ສືບຕໍ່ສຶກສາອົບຮົມການເມືອງແນວຄິດ ໃຫ້ແກ່ເອື້ອຍນ້ອງແມ່ຍິງພາຍໃນໜ່ວຍ ເພື່ອໃຫ້ສະມາຊິກມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ ພ້ອມທັງ ຮັກສາ ແລະ ເສີມຂະຫຍາຍຄຸນລັກສະນະມູນເຊື້ອຂອງແມ່ຍິງລາວ ແລະ ໃຫ້ພ້ອມກັນຝຶກຝົນຫລໍ່ຫລອມຕົນເອງໃນທຸກດ້ານ ເພື່ອເຮັດສຳເລັດໜ້າທີ່ວຽກງານທີ່ໄດ້ຮັບມອບໝາຍ ແລະ ຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ໃຫ້ປະກົດຜົນເປັນຈິງ ໃນຕໍ່ໜ້າ.