ມີເດຍລາວແຂວງຈຳປາສັກ ຂ່າວ ພາບ: ໜູລີ່ ຊາພັກດີ
ເຊົ້າວັນທີ 28 ກໍລະກົດ 2021 ສູນສອບເສັງເມືອງມຸນລະປາໂມກໄດ້ເປີດການສອບເສັງຈົບຊັ້ນມັດທະຍົມຕອນປາຍ ມ7 ຂື້ນຢ່າງເປັນທາງການ ຢູ່ທີ່ໂຮງຮຽນ ມສ ເມືອງ,ການສອບເສັງຈະດຳເນີນເປັນເວລາ 3 ວັນ ນັບແຕ່ວັນທີ 28-30 ກໍລະກົດ 2021 ຈຶ່ງຈະສຳເລັດ

ໂດຍການເຂົ້າຮ່ວມເປີດຊອງຫົວບົດສອບເສັງຂອງ ທ່ານ ສີສະຫັວດ ພົມມະລິວັນ ຮອງເຈົ້າເມືອງໆມຸນລະປາໂມກ (ຜູ້ຊີ້ນຳຂົງເຂດວັດທະນະທຳສັງຄົມ),ທ່ານ ອະລິສັກ ສີສຸວົງ ຫົວໜ້າຂະແໜງກວດກາປະເມີນຜົນ ຕ່າງໜ້າໃຫ້ພະແນກສຶກສາທິການແລະກິລາແຂວງຈຳປາສັກ ລົງປະຈຳສູນສອບເສັງເມືອງມຸນ,ທ່ານ ສົມຈັນ ສີຈັນແດງ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ,ທ່ານ ປອ ຂັນທະລີ ພິມມະເສນ ຕ່າງໜ້າກະຊວງ,ພະແນກສຶກສາລົງຊີ້ນຳວຽກງານສາມສ້າງຂັ້ນເມືອງ,ຜູ້ອຳນວຍການໂຮງຮຽນມັດທະຍົມສຶກສາ 5 ແຫ່ງເຂົ້າຮ່ວມເປັນສັກຂີພະຍານ.

ສູນສອບເສັງເມືອງມຸນລະປາໂມກ ມີຈຳນວນນັກຮຽນສອບເສັງທີ່ຂື້ນທະບຽນທັໝົດ 222 ຄົນ ຍິງ 88 ຄົນ,ທີ່ມາຈາກ 5 ໂຮງຮຽນ ມສ ໃນທົ່ວເມືອງຄື: ມສ ເມືອງ 105 ຄົນ ຍິງ 49 ຄົນ,ມສ ໜອງງາ 9ຄົນ ຍິງ 5 ຄົນ,ມສ ເວີນ 33 ຄົນ ຍິງ 14 ຄົນ,ມສ ໜອງຫອຍ 41 ຄົນ ຍິງ 10ຄົນ,ມສ ນາດີ 34 ຄົນ ຍິງ 10 ຄົນ.ມີໜ້າສອບເສັງຕົວຈິງທັງໝົດ 219 ຄົນ ຍິງ 87 ຄົນ,ໃນນັ້ນ ໄດ້ແຍກເສັງ 11 ຄົນ ຍິງ 2 ຄົນ ທີ່ເປັນນັກຮຽນນອນໃນບ້ານແດງທີ່ມີກໍລະນີຜູ້ຕິດເຊື້ອພະຍາດໂຄວິດ 19, 2ບ້ານຂອງເມືອງຄື: ບ້ານກະດັນ ແລະ ບ້ານເດື່ອຍເຕ້ຍ ແຕ່ທາງຄະນະປະທານກໍ່ໄດ້ແຕ່ງຕັ້ງຄະນະກຳມະການນຳເອົາຫົວບົດໄປສອບເສັງໃຫ້ນັກຮຽນບ້ານດັ່ງກ່າວ.ສຳລັບ ວິຊາທີ່ນຳມາສອບເສັງໃນຄັ້ງນີ້ມີ 5 ວິຊາຄື:
ວິຊາພາສາລາວ-ວັນນະຄະດີ,ຄະນິດສາດ,ວິທະຍາສາດທຳມະຊາດ,ວິທະຍາສາດສັງຄົມ ແລະ ວິຊາພາສາອັງກິດ.