ມີເດຍລາວແຂວງເຊກອງ (ຂ່າວ:ສີສັກດາ) ໃນວັນທີ 28 ກໍລະກົດ 2021 ນີ້ຢູ່ທີ່ສູນສອບເສັງ ມສ ດາກຈຶງໄດ້ຈັດພິທີສອບເສັງຈົບຊັ້ນ ມັດທະຍົມສຶກສາຕອນປາຍ ມ7 ປະຈຳສົກຮຽນ 2020 -2021 ຢ່າງເປັນທາງການ,ໃຫ້ກຽດເຂົ້າຮ່ວມຂອງທ່ານ ຄຳເພັດ ສອນຈະເລີນ ກຳມະການພັກເມືອງຮອງເຈົ້າເມືອງ-ເມືອງດາກຈຶງປະທານຄະນະກຳມະການຊີ້ນຳບັ້ນສອບເສັງຈົບຊັ້ນ ມ 7 ຂັ້ນເມືອງ, ມີທ່ານ ນາງ ທວມ ມະລາວັນ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງດາກຈຶງ, ທ່ານ ມະໄລເພັດ ມາດມະນີວົງ ຫົວໜ້າຂະແໜງບໍລິຫານພະແນກສຶກສາທິການ ແລະ ກິລາແຂວງເຊກອງ, ມີບັນດາຄູອາຈານ ແລະ ນ້ອງນັກຮຽນເຂົ້າຮ່ວມຢ່າງພ້ອມພຽງ.

ທ່ານ ເພັດທະນາ ໄຊພອນເຮືອງ ຮອງຫົວໜ້າຫ້ອງການສຶກສາທິການ ແລະ ກິລາເມືອງ ໄດ້ລາຍງານການກະກຽມຄວາມພ້ອມສອບເສັງຈົບຊັ້ນ ມ7 ສົກຮຽນ 2020 – 2021ວ່າ: ທົ່ວເມືອງດາກຈຶງກໍ່ຄືທົ່ວປະເທດ ໄດ້ຈັດການສອບເສັງໃນລະຫວ່າງ ວັນທີ 28 ຫາ 30 ກໍລະກົດ 2021 ນີ້; ມີ 5 ວິຊາສອບເສັງຄື: ພາສາລາວ – ວັນນະຄະດີ, ວິທະຍາສາດສັງຄົມ,ວິທະຍາສາດທຳມະຊາດ, ຄະນິດສາດ ແລະ ພາສາອັງກິດ, ທົ່ວເມືອງດາກຈຶງມີຈຳນວນນັກຮຽນຊັ້ນ ມ7 ຕົ້ນປີມີ 129 ນ້ອງ, ຍິງ 66 ນ້ອງ, ປະລະກາງປີມີ 2 ນ້ອງ, ຍິງ 1 ນ້ອງ, ມີໜ້າສອບເສັງຕົວຈິງ 127 ນ້ອງ,ຍິງ 65 ນ້ອງ, ພ້ອມກັນນີ້ຍັງໄດ້ຜ່ານກົດລະບຽບຂອງການສອບເສັງ ເພື່ອໃຫ້ນັກຮຽນໄດ້ຮັບຮູ້-ເຂົ້າໃຈຢ່າງເລິກເຊິ່ງ, ພ້ອມນີ້ຄະນະກຳມະການຮັບຜິດຊອບການສອບເສັງ ແລະ ນັກສອບເສັງ ຕ້ອງໄດ້ເອົາໃຈໃສ່ປະຕິບັດກົດລະບຽບໃນບັ້ນສອບເສັງ, ຄຽງຄູ່ກັບການປະຕິບັດມາດຕະການປ້ອງກັນພະຍາດໂຄວິດ -19 ຢ່າງຈິງໃຈ; ແນໃສ່ຮັບປະກັນໃຫ້ບັ້ນສອບເສັງຈົບຊັ້ນມັດທະຍົມສຶກສາຕອນປາຍ ມ7 ສົກຮຽນ 2020 -2021 ໃຫ້ບັນລຸຕາມແຜນທີ່ວາງໄວ້.