ປະຈຸບັນຄະນະຮັບຜິດຊອບການໃຫ້ວັກຊີນ ປ້ອງກັນພະຍາດໂຄວິດ -19 ຢູ່ນະຄອນ ຫຼວງພະບາງ ໄດ້ເລື່ອນການສັກວັກຊີນ ຊີໂນຟາມ ເຂັມທີ 2 ໃຫ້ກຸ່ມເປົ້າໝາຍພາຍໃນແຂວງ ຈາກເດີມໄດ້ນັດເລີ້ມສັກວັນທີ່ 26 ກໍລະກົດ ເປັນເລີ້ມສັກ ໃນວັນທີ 31 ກໍລະກົດ ເຖີງວັນທີ່ 6 ສີງຫາ 2021.

ດຣ ຫຸມພັນ ຈີລະສັກ ຫົວໜ້າຂະແໜງອະນາໄມ ແລະ ສົ່ງເສີມສຸຂະພາບ ພະແນກສາທາລະນະສຸກແຂວງໃຫ້ສຳພາດວ່າ: ການເລື່ອນມື້ນັດສັກວັກຊີນ ແມ່ນຍ້ອນໄລຍະການສັກວັກຊີນເຂັມທີ 1 ໄດ້ພົບຄວາມຫຍຸ້ງຍາກ ແລະ ໄດ້ໂຈະຊົ່ວຄາວເພື່ອຈັດສັນຄວາມເປັນລະບຽບ ຮັບປະກັນບໍ່ໃຫ້ມີການລະບາດຂອງພະຍາດ ໃນເວລາເຂົ້າຮັບວັກຊີນ ຜ່ານການຈັດສັນຄວາເປັນລະບຽບ ເຫັນວ່າຜູ້ມາຮັບວັກຊີນ ໄດ້ເປັນເຈົ້າການປະຕິບັດລະບຽບເປັນຢ່າງດີ ສ່ວນການສັກເຂັມທີ 2 ນີ້ ຈະເລີ້ມແຕ່ວັນທີ່ 31 ກໍລະກົດ ເຖີງວັນທີ່ 6 ສີງຫາ 2021 ໂດຍກຳນົດເອົາ 3 ຈຸດ, ໃນນັ້ນ ຢູ່ໂຮງໝໍບໍລິເວນ 107 ແລະ ສວນສາທາລະນະລ້ານຊ້າງ ແມ່ນສືບຕໍ່ສັກຄືເກົ່າ, ສ່ວນຈຸດໂຮງຮຽນສ້າງແພດເກົ່າ ບ້ານທາດຫຼວງ ແມ່ນໄດ້ປ່ຽນສະຖານທີ່ ໄປສັກຢູ່ສະຖານທີ່ຈັດງານລ້ຽງ ພອນລາສີ ບ້ານພູໝອກ ເຊີ່ງແຕ່ລະຈຸດ ຈະບໍລິການ 500 ເຂັມຕໍ່ວັນ ໂດຍແບ່ງເປັນ 2 ຕອນ ຄື: ຕອນເຊົ້າບໍລິການ 300 ເຂັມ ແລະຕອນແລງ ບໍລິການ 200 ເຂັມ. ໂອກາດນີ້ ດຣ ຫຸມພັນ ຈີລະສັກ ໄດ້ຮຽກຮ້ອງໃຫ້ປະຊາຊົນ ຜູ້ທີ່ໄດ້ຮັບການສັກວັກຊີນເຂັມທີ 1 ຮອບທີ 3 ໃຫ້ສືບຕໍເຂົ້າມາຮັບວັກຊີນ ຕາມຈຸດເດີມທີ່ໄປຮັບເຂັມທີ 1 ໃຫ້ຄົບຕາມຈຳນວນ.

ດຣ ຫຸມພັນ ຈີລະສັກ ຫົວໜ້າຂະແໜງອະນາໄມ ແລະ ສົ່ງເສີມສຸຂະພາບ ພະແນກສາທາລະນະສຸກແຂວງຫຼວງພະບາງກ່າວຕື່ມວ່າ: ພາຍຫຼັງສຳເລັດການໃຫ້ວັກຊີນ ຊີໂນຟາມເຂັມທີ່ 2 ຮອບທີ່ 3 ສຳເລັດ ຈະສືບຕໍ່ໃນການກະກຽມການໃຫ້ວັກຊີນ ຮອບທີ່ 4 ເຊີ່ງຈະແມ່ນການໃຫ້ວັກຊີນ ຈອນສັນ ແອນຈອນສັນ ໂດຍຈະມີການຈັກກອົບໃຫ້ກັບທີມແພດ ແລະ ວາງແຜນໃນການສັກວັກຊີນ ໃຫ້ມີຄວາມເປັນລະບຽບ ປະຈຸບັນວັກຊີນ ຈອນສັນ ແອນຈອນສັນ ຍັງບໍ່ໄດ້ຮັບການແບ່ງປັນຈາກສູນກາງ ແຕ່ຕາມຕົວເລກທີ່ແຈ້ງມາເບື້ອງຕົ້ນ ແຂວງຫຼວງພະບາງຈະໄດ້ຮັບການແບ່ງປັນທັງໝົດ 65.200 ໂດສ ຫາກໄດ້ຮັບການແບ່ງປັນຈາກສູນກາງ ຄະນະຮັບຜິດຊອບຂອງແຂວງ ຈະແຈກຢາຍໃຫ້ບັນດາເມືອງຢ່າງທົ່ວເຖີງ ຄາດວ່າຈະດຳເນີນການສັກ ວັກຊີນຈອນສັນ ແອນຈອນສັນ ໃນອາທິດທີ່ 2 ຂອງເດືອນສີງຫາທີ່ຈະມາເຖີງນີ້.

Medialaos MMD (ແຫຼ່ງຂໍ້ມູນຈາກ: ອາພຸດເດດ ບຸບຜາ)