ວັນທີ 27 ກໍລະກົດ 2021 ນີ້ ທີ່ຫ້ອງຮັບແຂກ ຫ້ອງວ່າການແຂວງຫຼວງພະບາງ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ພ້ອມດ້ວຍຄະນະ ໄດ້ຕ້ອນຮັບການເຂົ້າພົບປະຂອງ ຮສ ດຣ ພູທອນ ເມືອງປາກ ປະທານອົງການກາແດງລາວ ພ້ອມດ້ວຍຄະນະ ໂອກາດນີ້ ປະທານອົງການກາແດງລາວ ໄດ້ລາຍງານການເຄື່ອນໄຫວວຽກງານກາແດງ ເພື່ອໃຫ້ການນຳຂອງແຂວງ ສືບຕໍ່ຊີ້ນນຳ-ນຳພາ ວຽກງານສູນກູ້ໄພສຸກເສີນ, ການປຸກລະດົມການຮັບບໍລິຈາກເລືອດ, ການຂົນຂວາຍແຫຼ່ງທຶນ ເພື່ອກຽມຊ່ວຍເຫຼືອດ້ານມະນຸດສະທຳ, ການໂຄສະນາເຜີຍແຜ່ພາລະບົດບາດ, ສິດ ແລະໜ້າທີ່, ເພື່ອໃຫ້ສັງຄົມຮັບຮູ້, ເຂົ້າໃຈ ແລະໃຫ້ມີສ່ວນຮ່ວມ ໃນວຽກງານຂອງອົງການກາແດງໃຫ້ຫລາຍຂື້ນ.

ຈາກນັ້ນ ທ່ານຮອງເຈົ້າແຂວງຫຼວງພະບາງ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງ ຕໍ່ການເຄື່ອນໄຫວຢ້ຽມຢາມ ແລະຊຸກຍູ້ວຽກງານ ຂອງປະທານອົງການກາແດງລາວ ພ້ອມທັງລາຍງານຜົນສຳເລັດ ຂອງວຽກງານອົງການກາແດງແຂວງຫຼວງພະບາງໂດຍຫຍໍ້ ໂດຍລວມແມ່ນໄດ້ຮັບການຊຸກຍູ້ຈາກອົງການປົກຄອງແຂວງ ແລະການປະກອບສ່ວນຂອງຫຼາຍພາກສ່ວນໃນສັງຄົມ ອັນໄດ້ເຮັດໃຫ້ວຽກງານແຕ່ລະດ້ານ ໄດ້ຮັບການເຄື່ອນໄຫວຢ່າງເປັນປົກກະຕິ ອັນພົ້ນເດັ່ນແມ່ນການປະກອບສ່ວນ ປະຕິບັດວຽກງານປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ -19 ແລະ ການຊ່ວຍເຫຼືອປະຊາຊົນ ທີ່ປະສົບໄພພິບັດທຳມະຊາດ ຢູ່ພາຍໃນແຂວງ ແລະແຂວງໃກ້ຄຽງ.

ໂອກາດການການເຄື່ອນໄຫວຢ້ຽມຢາມ ແລະຊຸກຍູ້ວຽກງານກາແດງຢູ່ແຂວງຫຼວງພະບາງຄັ້ງນີ້ ຮສ ດຣ ພູທອນ ເມືອງປາກ ປະທານອົງການກາແດງລາວ ພ້ອມດ້ວຍຄະນະ ໄດ້ພົບປະໂອ້ລົມພະນັກງານອົງການກາແດງແຂວງ, ພ້ອມທັງຢ້ຽມຢາມການປະຕິບັດວຽກງານ ຂອງພະນັກງານວິຊາການ ຈຳນວນໜື່ງ ແລະເຂົ້າຮ່ວມການສະເຫຼີມສະຫຼອງ ວັນສ້າງຕັ້ງ ໜ່ວຍກູ້ຊີບ ກູ້ໄພ ຂອງອົງການກາແດງແຂວງຫຼວງພະບາງ ຕື່ມອີກ.

Medialaos MMD (ແຫຼ່ງຂໍ້ມູນຈາກ: ອາພຸດເດດ ບຸບຜາ)