ມີເດຍລາວແຂວງບໍ່ແກ້ວກອງປະຊຸມ ປຶກສາຫາລືແບ່ງຄວາມຮັບຜິດຊອບບັນດາກິດຈະກຳຍ່ອຍຂອງໂຄງ ການພັດທະນາຕົວເມືອງຕາມແລວທາງອະນຸພາກພື້ນແມ່ນ້ຳຂອງ 2 ເມືອງຫ້ວຍຊາຍ ໄດ້ຈັດຂື້ນໃນວັນທີ່ 28 ກໍລະກົດນີ້ ທີ່ພະແນກໂຍທາທິການ ແລະ ຂົນສົ່ງແຂວງ. ໂດຍການເປັນປະທານຂອງທ່ານ ເຄື່ອນເພັດ ວົງຈັນ ຮອງເຈົ້າແຂວງໆບໍ່ແກ້ວ ປະທານຄະນະຊີ້ນໍາໂຄງການຂັ້ນແຂວງ, ມີບັນດາຄະນະອະນຸກຳມະການ, ທີ່ປຶກສາ ແລະ ຫ້ອງການຈັດຕັ້ງປະຕິບັດເຂົ້າຮ່ວມ.

ທ່ານ ເພັດນະຄອນ ວົງລໍຄຳ ໄດ້ໃຫ້ຮູ້ວ່າ: ໂຄງການພັດທະນາຕົວເມືອງຕາມແລວທາງອະນຸພາກພື້ນແມ່ນ້ຳຂອງ 2 ເມືອງຫ້ວຍຊາຍ ໄດ້ຈັດຕັ້ງປະຕິບັດມາແຕ່ປີ 2016 ໃນ 7 ບ້ານ ເທດສະບານເມືອງຫ້ວຍຊາຍ, ມີໂຄງການກໍ່ສ້າງສະໜາມກໍາຈັດຂີ້ເຫຍື້ອ ແລະ ເຂດບໍລິການ, ໂຄງການປັບປຸງປ່າຊ້າແຂວງ, ໂຄງການກໍ່ສ້າງທາງ ແລະ ຮອງລະບາຍນ້ຳພາຍໃນເທດສະບານ, ໂຄງການກໍ່ສ້າງທາງແຕ່ 4 ແຍກ ພະແນກແຜນການ ແລະ ການລົງທືນແຂວງ ຫາ 4 ແຍກ ຫ້ອງວ່າການແຂວງ, ໂຄງການປັບປຸງທ່າເຮືອ, ປ້ອງກັນຕາຝັງເຈື່ອນ

ພ້ອມທາງຍ່າງລຽບແຄມຂອງ, ໂຄງການກໍ່ສ້າງເສັ້ງທາງຊອຍໃຫ້ປະຊາ ຊົນ 9 ຄອບຄົວ ທີ່ໄດ້ຮັບຜົນກະທົບຈາກໂຄງການ, ໂຄງການກໍ່ສ້າງສ່ວນສາທາລະນະສະ ຖານທີ່ພັກຜ່ອນ, ທາງລຽບແຄມຂອງ ແລະ ປ້ອງກັນຕາຝັ່ງເຈື່ອນ ໄລຍະທີ່ 2, ໂຄງການປັບປຸງຄອງລະບາຍນ້ຳເປື້ອນພາຍໃນເທດສະບານ. ບັນດາໂຄງການຍ່ອຍຕ່າງໆແມ່ນ ສຳເລັດໄປສ່ວນຫຼາຍ ກອງ ປະຊຸມຄັ້ງນີ້ ປຶກສາຫາລືແບ່ງຄວາມຮັບຜິດຂອບໃຫ້ບາງພະແນກການທີ່ກ່ຽວຂ້ອງຂອງແຂວງ ແລະ ຂະແໜງການທີ່ກ່ຽວຂ້ອງຂອງເມືອງເປັນຜູ້ປົກປັກຮັກສາບູລະນະໃນຕໍ່ໜ້າ.

ຈາກນັ້ນ ຜູ້ເຂົ້າຮ່ວມ ໄດ້ປະກອບຄຳເຫັນໃຫ້ມີການໃຫ້ມີການແຕ່ງຕັ້ງຄະນະຮັບຜິດແຕ່ລະຂັ້ນໃຫ້ລະອຽດ, ມີການຕິດຕາມ, ກວດກາການກໍ່ສ້າງເສັ້ນທາງ 11 ເສັ້ນ ທີ່ຊັກຊ້າໃຫ້ເຂົ້າສູ່ຂະບວນການ ເພື່ອແກ້ໄຂຄວາມຫຍຸ້ງຍາກຕໍ່ການສັນຈອນ, ຫຼິກລ້ຽງການເກີດອຸປະຕິເຫດ, ມີມາດຕະການຕໍ່ຜູ້ທີ່ບໍ່ປະຕິບັດພັນທະຂອງລັດໃນການຍົກຍ້າຍສິ່ງກິດຂວາງໂຄງການ, ຄົ້ນຄວ້າເອົາ ບໍລິສັດ ທີ່ມີຜົນງານມາສືບຕໍ່ດຳເນີນກິດຈະກຳທີ່ຍັງບໍ່ທັນຈັດຕັ້ງປະຕິບັດໃຫ້ມີການເຄື່ອນໄຫວຖຶກຕ້ອງຕາມສັນຍາທີ່ໄດ້ກຳນົດ. ຂ່າວ: ຄຳໄຊ ລີໄຊມົວຕູ້.