ແຮງງານລາວທີ່ໄປເຮັດວຽກຢູຕ່າງປະເທດ ໂດຍສະເພາະຜູ້ທີ່ເດີນທາງໄປອອກແຮງງານຢູ່ປະເທດໃກ້ຄຽງ ແລ້ວຈະກັບຄືນມາປະເທດ ແມ່ນ​ມີ​ຄວາມ​ສ່ຽງ​ສູງໃນການນຳເອົາເຊື້ອພະຍາດໂຄວິດ-19 ມາແຜ່ເຊື້ອເປັນຕົ້ນແມ່ນຜູ້ທີ່ເດີນທາງກັບຄືນປະເທດແບບບໍ່ຖືກຕ້ອງຕາມກົດໝາຍ, ຂະນະ​ທີ່​ສະ​ຖາ​ນະ​ການໃນປັດຈຸບັນມີ​ໂຕເລກຜູ້ຕິດເຊື້ອພະຍາດໂຄວິດ-19 ເພີ່ມຂຶ້ນຢ່າງຕໍ່ເນື່ອງ ໂດຍ​ໂຕເລກດັ່ງກ່າວລ້ວນແຕ່ແມ່ນມາຈາກແຮງງານລາວທີ່ເດີນທາງກັບຄືນປະເທດ.

ໃນປັດຈຸບັນເຖິງແມ່ນວ່າ ສປປ ລາວ ພວກເຮົາຈະມີ​ໂຕເລກຜູ້ຕິດເຊື້ອພະຍາດໂຄວິດ-19 ສູງ ຖ້າ​ທຽບ​ໃສ່​ໄລ​ຍະ​ຜ່ານ​ມາ ແຕ່​ຜູ້​ຕິດ​ເຊື້ອ​ເກືອບ​ທັງ​ໝົດແມ່ນ​ນຳ​ເຂົ້າ ຊຶ່ງ​ສ່ວນຫຼາຍ​ແມ່ນ​ແຮງ​ງານ​ລາວ​ກັບ​ມາ​ແຕ່​ປະ​ເທດ​ເພື່ອ​ນບ້ານຖືກ​ຕ້ອງ​ຕາມ​ລະ​ບຽບ​ການ.ສະນັ້ນ, ເພື່ອເຮັດແນວໃດບໍ່ໃຫ້ເຊື້ອພະຍາດດັ່ງກ່າວແຜ່ອອກໄປສູ່ວົງກວ້າງ ພວກເຮົາຕ້ອງໄດ້ເປັນເຈົ້າການ ແລະ ໃຫ້ຄວາມຮ່ວມໄມ້ຮ່ວມມືກັບທາງເຈົ້າໜ້າທີ່ ໂດຍສະເພາະແມ່ນໃຫ້ເອົາໃຈໃສ່ໃນການປະຕິບັດຄຳສັ່ງຂອງລັດຖະບານກໍຄືຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ວາງອອກຢ່າງເຂັ້ມງວດ ນອກຈາກ ຈະປ້ອງ​ກັນ​ຕົນ​ເອງດ້ວຍ​ການໃສ່ຜ້າອັດປາກ-ດັງ, ລ້າງມືດ້ວຍນ້ຳ​ສະ​ອາດ​ໃສ່​ສະ​ບູ ຫຼື ເຈວ​ລ້າງ​ມື​ ແລະ ເວັ້ນ​ໄລ​ຍະ​ຫ່າງ​ທາງ​ສັງ​ຄົມ​ແລ້ວ, ​ອີກ​ບັນ​ຫາ​ໜຶ່ງ​ທີ່​ສຳ​ຄັນ​ຄື ທຸກຄົນໃນສັງຄົມຕ້ອງເປັນເຈົ້າການຊ່ວຍທາງເຈົ້າໜ້າທີ່ ໂດຍສະເພາະແມ່ນ ປະຊາຊົນຜູ້ທີ່ດຳລົງຊີວິດຢູ່ລຽບຕາມແຄມແມ່ນໍ້າຂອງ ໃຫ້ຊ່ວຍເປັນຫູເປັນຕາຊ່ວຍເຈົ້າໜ້າທີ່ ຖ້າຫາກພົົບເຫັນສະພາບການບໍ່ດີ ຫຼື ເຫັນ​ຜູ້​ທີ່ລັກລອບເຂົ້າເມືອງແບບບໍ່ຖືກຕ້ອງຕາມລະບຽບການ ຈົ່ງຮີບຮ້ອນແຈ້້ງໄປຫາເຈົ້າໜ້າທີ່ ຫຼື ທາງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເພື່ອຈະໄດ້ລົງໄປຕິດຕາມໃຫ້ທ່ວງທັນກັບສະພາບທີ່ຈະເກີດຂຶ້ນ, ຖ້າຫາກພວກເຮົາເປັນເຈົ້າການຊ່ວຍກັນຈະເປັນການປະກອບສ່ວນເຂົ້າໃນການຈຳ​ກັດ​ການ​ແຜ່​ລະ​ບາດອອກສູ່ວົງກວ້າງ ແລະ ພວກເຮົາກໍສາມາດຄວບຄຸມ ແລະ ຕ້ານກັບພະຍາດໃຫ້ໝົດຈາກປະເທດພວກເຮົາໄດ້.

ບັນຫາແຮງານລາວ ທີ່ໄປດຳລົງຊີວິດຢູ່ຕ່າງປະເທດ ໂດຍສະເພາະບາງຄົນ ແມ່ນໄປອອກແຮງງານເພື່ອຫາເງິນແລ້ວສົ່ງມາໃຫ້ຄອບຄົວ ຫຼື ບາງຄົນກໍໄປຫາເງິນ ແລ້ວກັບມາເພື່ອເປັນທຶນຮອນໃນການສ້າງເສດຖະກິດຄອບຄົວ ແຕ່ໃນຈຳນວນແຮງງານລາວ ທີ່ໄປອອກແຮງງານຢູ່ບາງປະເທດ ບາງຄົນກໍໄປຖືກຕ້ອງຕາມກົດໝາຍ ແລະ ບາງຄົນແມ່ນໄປແບບບໍ່ຖືກຕ້ອງຕາມກົດໝາຍ, ແນວ​ໃດ​ກໍ​ຕາມ ຫາກ​ຜູ້​ໃດ​ມີ​ຈຸດ​ປະ​ສົງ​ຢາກ​ເດີນ​ທາງ​ກັບ​ຄືນ​ປະ​ເທດ ກໍຂໍ​ຮຽກ​ຮ້ອງ​ໃຫ້​ກັບ​ມາ​ໃຫ້​ຖືກ​ຕ້ອງ​ຕາມ​ລະ​ບຽບ​ການ ໂດຍລັດຖະບານ ໄດ້ໃຫ້ຄວາມເປັນຫ່ວງເປັນໃຍເປັນ​ຢ່າງ​ຍິ່ງ ຊຶ່ງ​ຜູ້​ໃດ​ເດີນ​ທາງ​ກັບ​ປະ​ເທດຖືກຕ້ອງຕາມລະບຽບກົດໝາຍເປັນການກະທຳທີ່ຮັກຊາດ, ຮັກບ້ານເກີດເມືອງນອນຂອງຕົນ, ແຕ່ຫາກບຸກຄົນໃດຫາກລັກລອບເຂົ້າມາໃນ ສປປ ລາວ ຈະມາດ້ວຍເສັ້ນທາງໃດກໍຕາມ ຖືວ່າເປັນຜູ້ມີຄວາມຜິດທາງກົດໝາຍ ແລະ ເປັນຜູ້ນຳເອົາຄວາມເສຍຫາຍມາໃຫ້ປະເທດຊາດ, ຕໍ່ກັບແຮງງານລາວທີ່ໄປອອກແຮງງານທີ່ປະທດເພື່ອນບ້ານໃກ້ຄຽງຂໍໃຫ້ປະຕິບັດຕາມລະບຽບການຂອງປະເທດເພື່ອນບ້ານທີ່ຕົນເອງອາໄສຢູ່ຢ່າງເຂັ້ມງວດ ແລະ ຖ້າຫາກຕ້ອງການຢາກຄືນມາ ສປປ ລາວ ໃຫ້ໄປພົວພັນກັບເຈົ້າໜ້າທີ່ສະຖານທູດ, ກົງສູນລາວ ແລະ ເຈົ້າໜ້າທີ່ກຽວຂ້ອງ.

ສັງລວມແລ້ວຖ້າຫາກພວກເຮົາຮ່ວມແຮງຮ່ວມໃຈກັນສາມັກເປັນຈິດໜຶ່ງໃຈດຽວກັນ ເຖິງຈະມີຄວາມຫຍຸ້ງຍາກຫຼາຍປານໃດກໍຈະສາມາດຜ່ານຜ່າອຸປະສັກນາໆປະການໄດ້ຢ່າງມີຜົນສຳເລັດ ແລະ ເຊື່ອວ່າ ຄວາມສາມັກຄີອັນເປັນປຶກແຜ່ນແໜ້ນໜາຂອງປະຊາຊົນລາວບັນດາເຜົ່າທຸກຊັ້ນຄົນ ຈະສາມາດຜ່ານຜ່າວິກິດຄັ້ງ​ນີ້​ໄປ​ໄດ້, ທີ່ສຳຄັນພວກເຮົາຕ້ອງເອົາໃຈໃສ່ປະຕິບັດຕາມຄຳສັ່ງຂອງລັດຖະບານກໍຄື​ມາດ​ຕະ​ການຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ວາງອອກຢ່າງເຂັມງວດ ຊຶ່ງຈະເຮັດໃຫ້ພວກເຮົາຜ່ານວິກິດຈາກເຊື້ອພະຍາດອັນໂຫດຮ້າຍດັ່ງກ່າວໄປໄດ້ຢ່າງແນ່ນອນ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)