ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍສະພາແຫ່ງຊາດ ໄດ້ລົງພົບປະໂອ້ລົມ ພະນັກງານຫຼັກ​ແຫຼ່ງ ວິທະຍຸກະຈາຍສຽງແຫ່ງຊາດ​ລາວ ໃນວັນທີ 28 ກໍລະກົດ 2021 ທີ່ວິທະຍຸກະຈາຍສຽງແຫ່ງຊາດລາວ (ວສລ) ເນື່ອງໃນໂອກາດສະ​ເຫຼີມ​ສະ​ຫຼອງ ວັນລັດຖະທຳມະນູນ ຄົບຮອບ 30 ປີ ແລະ ເພື່ອເປັນການແລກປ່ຽນບົດຮຽນ ໃນການໂຄສະນາ, ຜັນຂະຫຍາຍເນື້ອໃນ ແລະ ພາລະບົດບາດຂອງລັດຖະທຳມະນູນແຫ່ງ ສປປ ລາວ ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ.

ໂອກາດນີ້, ທ່ານ ໂພສີ ແກ້ວມະນີວົງ ຜູ້ອຳນວຍການໃຫຍ່ ວິທະຍຸກະຈາຍສຽງແຫ່ງຊາດລາວ ກໍໄດ້ລາຍງານ ສະພາບການເຄື່ອນໄຫວຂອງ ວສລ ໃນໄລຍະຜ່ານມາ ຊຶ່ງໄດ້ມີຫຼາຍດ້ານທີ່ພົ້ນເດັ່ນ ໂດຍສະເພາະແມ່ນວຽກງານໂຄສະນາແນວທາງນະໂຍບາຍຂອງພັກ-ລັດ, ຜັນຂະຫຍາຍມະຕິກອງປະຊຸມໃຫຍ່ ຄັ້ງ​ທີ XI ຂອງພັກ ​ແລະ ອື່ນໆ ພ້ອມກັນນີ້ ກໍຍັງໄດ້ສະໜອງຂໍ້ມູນຂ່າວສານຕ່າງໆ ຜ່ານລາຍການວິທະຍຸ ເພື່ອກະຈາຍຂ່າວອອກສູ່ປະຊາຊົນກໍຄືສັງຄົມ ໃນຂອບເຂດທົ່ວປະເທດໄດ້ຮັບຮູ້ ແລະ ໄດ້ທັນເຫດການ ເປັນຕົ້ນລາຍການເດັ່ນໄດ້ຮັບຄວາມສົນໃຈຈາກສັງຄົມຫຼາຍເຊັ່ນ: ພາກຂ່າວທົ່ວໄປ, ຂ່າວຕາມເຫດການ, ລາຍການຍົກບັນຫາມາສົນທະນາ, ລາຍການເປົ້າໝາຍພັດ​ທະ​ນາ​ເສດ​ຖະ​ກິດ-ສັງ​ຄົມຕ່າງໆ ​ຂອງພາກລັດ ແລະ ເອກະຊົນ ​ຊຶ່ງອອກອາກາດ ເປັນ 2 ພາສາ ຊົນເຜົ່າມົ້ງ​ ແລະ ກຶມມຸ ແລະ ພາກພາສາຕ່າງປະເທດ 6 ພາສາ ຄື: ພາ​ສາ​ກໍ​ປູ​ເຈຍ, ຈີນ, ຝຣັ່ງ, ອັງກິດ, ໄທ ແລະ ພາສາຫວຽດນາມ.

ທ່ານ ໂພສີ ແກ້ວມະນີວົງ ໃຫ້ຮູ້ຕື່ມວ່າ: ການກະຈາຍຂໍ້ມູນຂ່າວສານແມ່ນຜ່ານ 3 ລະບົບ: ລະບົບກະຈາຍທາງພາກພື້ນດິນ ມີ ລະບົບ ເອເອັມ (AM), ເອັບເອັມ (FM); ສົ່ງຜ່ານ ດາວທຽມ ເພື່ອໃຫ້ສະຖານີວິທະຍຸແຂວງ, ເມືອງ ໃນທົ່ວປະເທດຮັບເອົາສັນຍານລາຍການຂອງວິທະຍຸກະຈາຍສຽງແຫ່ງຊາດໄປກະຈາຍອອກອາກາດຕໍ່ ແລະ ສົ່ງຜ່ານລະບົບອິນເຕີແນັດ, ມີເວັບໄຊ www.lnr.org.la ແລະ ຜ່ານລະບົບສື່ ແບບໃໝ່ face book live, YouTube, applications ສາມາດກວມພື້ນທີ່ທົ່ວປະເທດໄດ້ດັ່ງນີ້: 90% ຜ່ານລະບົບການສົ່ງທາງພາກພື້ນດິນ ແລະ 100% ສໍາລັບການສົ່ງຜ່ານດາວທຽມ, ຜ່ານອິນເຕີເນັດ ແລະ ລະບົບສື່ແບບໃໝ່. ແຕ່ເຖິງແນວໃດກໍຕາມ, ເນື່ອງຈາກວ່າ ວິທະຍຸກະຈາຍສຽງແມ່ນອົງການສື່ໜຶ່ງ ທີ່ມີໂຄງສ້າງການຈັດຕັ້ງໃຫຍ່ພໍສົມຄວນ, ມີໜ້າວຽກກວ້າງຂວາງ, ມີຫຼາຍລາຍການໃນຫຼາຍຮູບແບບ, ມາຮອດເວລານີ້ການຕອບສະໜອງງົບປະມານ ໃນການພັດທະນາວຽກງານພັດມີການຈຳກັດ​ຫຼາຍ ຫຼື ວ່າບາງປີ​ກໍບໍ່ມີຊ້ຳ ຈຶ່ງເຮັດໃຫ້ການເຄື່ອນໄຫວວຽກງານດັ່ງກ່າວ ມີຄວາມຫຍຸ້ງຍາກ, ພື້ນຖານໂຄງລ່າງ​ຫຼາຍບ່ອນເກົ່າແກ່ຊຸດໂຊມ, ຂາດງົບປະມານ ເພື່ອປັບປຸງປົວແປງຫ້ອງການບ່ອນເຮັດວຽກ ແລະ ເພື່ອລົງທຶນໃສ່ການພັດທະນາເຕັກໂນໂລຊີສະໄໝໃໝ່.

ໂອກາດດຽວກັນນີ້, ທ່ານ ຈະເລີນ ເຢຍປາວເຮີ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ການຈັດຕັ້ງ ປະຕິບັດວຽກງານ ຂອງ ວສລ ໃນໄລຍະຜ່ານມາ ກໍຄືປັດຈຸບັນ ທີ່ມີຜົນງານທີ່ພົ້ນເດັ່ນຫຼາຍດ້ານ ພ້ອມກັນນີ້, ຈະໄດ້ນຳເອົາຄຳສະເໜີ ແລະ ບັນຫາຂໍ້ຫຍຸ້ງຍາກຕ່າງໆທີ່ ວສລ ໄດ້ປະເຊີນຢູ່ ໄປປຶກສາຫາລືກັບຂັ້ນເທິງກໍຄືລັດຖະບານ ເພື່ອຊອກຫາຫົນທາງແກ້ໄຂບັນຫາດັ່ງກ່າວ.

ຂໍໃຫ້ບັນດາສະຫາຍບຸກບືນ, ຕັ້ງໜ້າປະຕິບັດໜ້າທີ່ວຽກງານຂອງຕົນໃຫ້ສຳເລັດຕາມຂັ້ນເທິງມອບໝາຍໃຫ້ ແລະ ພ້ອມກັນຮັກສາມູນເຊື້ອອັນດີງາມຂອງຕົນຕໍ່ໄປ ໂດຍສະເພາະມູນເຊື້ອຮັກຊາດ ເປັນເຈົ້າຂອງປະເທດຊາດ, ຈິດໃຈປະຕິວັດຢ່າງບໍ່ຢຸດຢັ້ງ. ພ້ອມກັນພະຍາຍາມປະກອບສ່ວນຊຸກຍູ້, ປັບປຸງ ແລະ ຜັນຂະຫຍາຍວິທະຍຸຂອງພວກເຮົາໃຫ້ເຂັ້ມແຂງຂຶ້ນກວ່າເກົ່າ.ໃນຕອນບ່າຍຂອງວັນດຽວກັນ ທ່ານ ຈະເລີນ ເຢຍປາວເຮີ ຍັງໄດ້ໄປໂອ້ລົມພົບປະພະນັກງານໂທລະພາບແຫ່ງຊາດ ໂດຍມີ ທ່ານ ນາງ ສວນສະຫວັນ ວິິຍະເກດ ລັດຖະມົນຕີກະຊວງ ຖວທ ແລະ ຫົວໜ້າອົງການສື່ມວນຊົນຈຳນວນໜຶ່ງເຂົ້າຮ່ວມ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)