ມີເດຍລາວແຂວງເຊກອງ ໂດຍ: ພອນ ບຸນອຸທິດ
ຕອນບ່າຍວັນທີ 28 ກໍລະກົດ 2021 ນີ້.ຢູ່ທີ່ສະໂມສອນບ້ານໝື່ນໃໝ່ເມືອງ ທ່າແຕງ ແຂວງ ເຊກອງໂຄງການສະມາຄົມ ເຢຍລະມັນ-ລາວ ເພື່ອການພັດທະນາໄດ້ຈັດພິທີມອບ-ຮັບໂຄງການກໍ່ສ້າງ ແລະສ້ອມແປງຊົນລະປະທານຂະໜາດນ້ອຍ 2 ແຫ່ງໃຫ້ປະຊາຊົນ ບ້ານໝືນໃໝ່ ແລະ ບ້ານກະປື ລະຫວ່າງ
ທ່ານ ມະນີວົງ ດາໄຫວສັນຕິ ຜູ້ບໍລິຫານໂຄງການສະມາຄົມ ເຢຍລະມັນ-ລາວ ເພື່ອການພັດທະນາເປັນຜູ້ມອບ ແລະ ທ່ານ ທະວີສັກ ບຸດພົຣມ ຮອງຫົວໜ້າ ຫ້ອງການກະສິກຳ ແລະ ປ່າໄມ້ເມືອງເປັນຜູ້ຮັບ ໂດຍມີທ່ານ ສຸພົນ ໄຊສະຫ່ງາ ຮອງເຈົ້າເມືອງທ່າແຕງ,ມີຜູ້ຕາງໜ້າພະແນກການກ່ຽວຂ້ອງຂັ້ນແຂວງ ແລະ ຂັ້ນເມືອງ,ແຂກຖືກເຊີນ,ອົງການປົກຄອງບ້ານຕະຫຼອດຮອດປະຊາຊົນກຸ່ມຜູ້ນໍາໃຊ້ນ້ຳ ເຂົ້າຮ່ວມເປັນສັກຂີພະຍານ.

ທ່ານ ຄໍາເທືອງ ແກ້ວຄໍາເຊືອງ ນາຍບ້ານ-ບ້ານໝືນໃໝ່ ແລະ ທ່ານ ຈັນທະລາ ສູນທະວົງ ຮອງນາຍບ້ານກະປື ໄດ້ຊີ້ແຈງຜົນສຳເລັດໃນການກໍ່ສ້າງ ແລະ ສ້ອມແປງຊົນລະປະທານຂະນາດນ້ອຍ 2 ແຫ່ງຢູ່ບ້ານໝືນໃໝ່ ແລະ ບ້ານກະປືເມືອງທ່າແຕງ ແຂວງເຊກອງ ເຊິ່ງແມ່ນທຶນສົມທົບລະຫ່ວາງໂຄງການສະມາຄົມ ເຢຍລະມັນ-ລາວ ເພື່ອການພັດທະນາ ແລະ ປະຊາຊົນ 2 ບ້ານຈໍານວນ 172.953,000 ກີບ.ເຊິ່ງໄດ້ດຳເນີນການກໍ່ສ້າງ ແລະ ສ້ອມແປງເກືອບ 2 ເດືອນຈິ່ງສຳເລັດ ໃນຂະນະທີ່ນໍາໃຊ້ໂຄງສ້າງສ້ອມແປງຂອງສອງຄອງເໝືອງຊົນລະປະທານຢູ່ບ້ານໝື່ນໃໝ່ ແລະ ບ້ານກະປືດ້ວຍ ເບຕົງເສີມເຫຼັກ ມີຄວາມຍາວ 270 ແມັດ,ກວ້າງ 1 ແມັດ,ໜາ 0,8 ແມັດ ເຊິ່ງສາມາດສະໜອງນ້ຳຫົດເນື້ອທີ່ການຜະລິດກະສິກຳປູກຝັ່ງ-ລ້ຽງສັດຈໍານວນ 81 ເຮັກຕາ,ມີ 64 ຄອບຄົວ,ໃນ 2 ບ້ານທີ່ໄດ້ຮັບຜົນປະໂຫຍດຈາກໂຄງການ,ທັງນີ້ການນໍາໃຊ້ ແລະ ປົກປັກຮັກສາຕ້ອງໄດ້ປະຕິບັດຕາມລະບຽບການຄຸ້ມຄອງຊົນລະປະທານໃຫ້ໄດ້ນໍາໃຊ້ຢ່າງຍາວນານ.