ຍັງອີກບໍ່ພໍທໍ່ໃດມື້; ວັນສື່ມວນຊົນລາວກໍ່ຈະວຽນມາບັນຈົບຄົບຮອບອີກວາລະໜື່ງ ເຊີ່ງປີນີ້ແມ່ນຄົບຮອບ 71 ປີ (13 ສິງຫາ 1950 – 13 ສິງຫາ 2021) ສະນັ້ນ ເລີຍຕັ້ງບັນຫາການຍ້ອງຍໍມາແລກປ່ຽນ.

ຕ້ອງຍອມຮັບນຳກັນວ່າໃນການເຮັດວຽກເຮັດງານນີ້ຄົນເຮົາກໍ່ຕ້ອງການຄຳຍ້ອງຍໍ-ສັນລະເສີນ ຫາກແມ່ນເຮັດສຳເລັດໜ້າທີ່ການງານໄປຄຽງຄູ່ກັບການຕຳໜິສົ່ງຂ່າວນໍ? ເພາະມັນແມ່ນອາຫານບຳລຸງທາງຈິດໃຈໃຫ້ບຸກບືນ-ຫ້າວຫັນ-ຈຶກຈັກ ວ່າຊັ້ນສາ!.

ໃນການຕໍ່ສູ້ກັບການລະບາດ ຂອງພະຍາດໂຄວິດ-19 ໂດຍສະເພາະແມ່ນໃນຮອບສອງນີ້; ຫາງສຽງສັງຄົມໄດ້ຕັ້ງບັນຫາເລື່ອງການຍ້ອງຍໍ-ສັນລະເສີນ ແພດ-ໝໍ ທີ່ພວກເພີ່ນອິດເມື່ອຍ-ສູ້ຊົນ ເຮັດຫຼ້ອນໜ້າທີ່ຢ່າງສະຫງ່າງາມໃນການປີ່ນປົວຜູ້ຕິດເຊື້ອຢ່າງທັນການ ພາໃຫ້ຕົວເລກຜູ້ເສຍຊີວິດໜ້ອຍເມື່ອທຽບໃສ່ປະເທດອື່ນ.

ສະນັ້ນ ຈື່ງຢາກໃຫ້ການຈັດຕັ້ງ-ຂັ້ນເທີງ ພິຈາລະນາຍ້ອງຍໍ-ສັນລະເສີນ ດ້ວຍຫຼາຍຮູບການ ເຊັ່ນວ່າ: ໃຫ້ນາມມະຍົດແພດປະຕິວັດ, ແພດປະຊາຊົນໄປຄຽງຄູ່ກັບການມອບຫຼຽນໄຊ; ໃບຍ້ອງຍໍ… ເລື່ອງນີ້ຄິດວ່າການຈັດຕັ້ງກ່ຽວຂ້ອງເພີ່ນຮັບຮູ້ ແລະ ຊອກຫາເວລາທີ່ເໝາະສົມນໍ! ເພື່ອບໍ່ໃຫ້ເຫດການມັນຖືກແກ່ຍາວທັງເປັນການໃຫ້ກຽດຢ່າງສົມສັກສີແກ່ພວກເພີ່ນ ບໍ່ແມ່ນແຕ່ແພດ-ໝໍ ຂະແໜງການອື່ນທີ່ກ່ຽວຂ້ອງຜູ້ປະກອບສ່ວນເຂົ້າໃນບັ້ນຮົບນີ້ ກໍ່ຕ້ອງໄດ້ຮັບການຍ້ອງຍໍ-ສັນລະເສີນເຊັ່ນກັນ ເປັນຕົ້ນແມ່ນກຳລັງປ້ອງກັນຊາດ-ປ້ອງກັນຄວາມສະຫົງບ; ພວກເພີ່ນແມ່ນກຳລັງສຳຄັນໃນການປ້ອງກັນການເລັດລອດເຂົ້າມາຂອງຜູ້ຄົນຕ່າງຖີ່ນ-ຕ່າງແດນ ທີ່ມາແຜ່ເຊື້ອພະຍາດຄືດັ່ງພວກເຮົາເຫັນເປັນຂ່າວຜ່ານມາ ນອກຈາກນັ້ນກຳລັງສຳຄັນອີກໃນການເຮັດໃຫ້ສັງຄົມມີຄວາມສະຫົງບ-ທຸ່ນທ່ຽງ ກ້າວໄປຕາມແນວທາງຂອງພັກ-ລັດ ໃນການປ້ອງກັນພະຍາດໂຕຮ້າຍກາດນີ້ ກໍ່ຄື: ນັກຮົບປະຈັນບານທາງດ້ານການເມືອງ-ແນວຄິດ.

ນັບແຕ່ມີການລະບາດ ຂອງພະຍາດໂຄວິດ-19 ມາທັງຮອບ I ແລະ ຮອບ II ນັກຮົບສື່ມວນຊົນ ທີ່ເປັນກອງປະຈັນບານດ້ານການເມືອງ-ແນວຄິດ ກໍ່ໄດ້ເຮັດໜ້າທີ່ຂອງຕົນຢ່າງບໍ່ຮູ້ອິດ-ຮູ້ເມື່ອຍ ໂດຍບໍ່ມີມື້ພັກ; ລາຍງານເຫດການຕ່າງໆ ທີ່ເກີດຂື້ນໃນໂລກ ແລະ ພາຍໃນປະເທດ ເປັນຕົ້ນແມ່ນແນວທາງຂອງພັກ-ລັດ ກໍ່ຄືຄະນະສະເພາະກິດໃນການຕ້ານພະຍາດໂຕຮ້າຍກາດມັດຈຸລາດບໍ່ມີສຽງນີ້ ຢ່າງຕໍ່ເນື່ອງ-ລຽນຕິດ ໃນແຕ່ລະວັນ; ແຕ່ລະຊົ່ວໂມງຂ່າວ; ເຖີງແມ່ນວ່າການລົງເກັບກຳຂໍ້ມູນມີຄວາມສ່ຽງຕໍ່ການຕິດເຊື້ອກໍ່ຕາມແຕ່ບໍ່ເຄີຍງໍ້ງ່ຽງ ແລະ ທໍ້ຖອຍ ບໍ່ທໍ່ນັ້ນນັກຮົບສື່ມວນຊົນພວກເຮົາຍັງຕອບໂຕ້ ແລະ ອະທິບາຍຕໍ່ຖ້ອຍທຳນອງບິດເບືອນຂອງຄົນບໍ່ດີຈຳນວນໜື່ງຈາກພາຍນອກ ກໍ່ຄື: ສື່ຈາກປະເທດໃກ້ຄຽງ (ໄທ) ທີ່ມັກສ້າງຂ່າວປ່າວກຸສົນບິດເບືອນສະພາບຄວາມເປັນຈີງ; ໃສ່ຮ້າຍປ້າຍສີພັກ-ລັດ ກໍ່ຄືການຈັດຕັ້ງພວກເຮົາໃນການປີ່ນປົວຜູ້ຕິດເຊື້ອ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໄດ້ຢ່າງເໝາະສົມກັບແຕ່ລະໂອກາດ; ເຮັດໃຫ້ປະຊາຊົນບັນດາເຜົ່າທົ່ວປະເທດພວກເຮົາຮັບຮູ້ທັນເລ້ຫຼ່ຽມຂອງພວກເຂົາ ສະແດງອອກຢ່າງເດັ່ນຊັດກໍ່ແມ່ນກໍລະນີພີ່ນ້ອງຮ່ວມຊາດພວກເຮົາທີ່ໄປອອກແຮງງານຢູ່ປະເທດໃກ້ຄຽງ (ໄທ) ທີ່ກັບຄືນປະເທດ ເຊີ່ງພັກ-ລັດ ພວກເຮົາມີແນວທາງທີ່ເປັນທຳ ໃນການຕ້ອນຮັບ ແລະ ປີ່ນປົວຕໍ່ພີ່ນ້ອງຜູ້ຕິດເຊື້ອພະຍາດໂຄວິດ-19 ຢ່າງເປັນທາງການຕາມຫຼັກວິຊາການແພດໃນທຸກກໍລະນີ.

ວັນທີ 13 ສິງຫາ ທີ່ຈະມາເຖີງນີ້ແມ່ນວັນລະນຶກແຫ່ງການສ້າງຕັ້ງສື່ມວນຊົນລາວ; ນັກຮົບປະຈັນບານພວກເຮົາຄິດວ່າຫາກການຈັດຕັ້ງ-ຂັ້ນເທີງ ມີຮູບການຍ້ອງຍໍ-ສັນລະເສີນ ດ້ວຍຮູບການຕ່າງໆ ເຊັ່ນວ່າ: ນາມມະຍົດນັກຂ່າວແຫ່ງຊາດ; ນັກຂ່າວປະຊາຊົນ; ນັກຂ່າວດີເດັ່ນ ພ້ອມດ້ວຍຫຼຽນໄຊ-ໃບຍ້ອງຍໍປະເພດຕ່າງໆ ຈະດີທີ່ສຸດ ເພາະມັນແມ່ນກຳລັງໃຈຊຸກຍູ້ໃຫ້ພວກເຮົາບຸກທະລຸໃນໜ້າທີ່ວຽກງານຂອງຕົນ ໃນຄວາມເປັນຈີງເຖີງແມ່ນວ່າຍັງບໍ່ໄດ້ຮັບການຍ້ອງຍໍໃນໂອກາດນີ້ກໍ່ມີໂອກາດອື່ນ ພວກເຮົາຈະບໍ່ຖືເປັນຂໍ້ອ້າງໃດໆ ນັກຮົບພວກເຮົາຈະສືບຕໍ່ເຮັດສຳເລັດໜ້າທີ່ວຽກງານຂອງຕົນແບບປະຕິວັດບຸກ; ເພື່ອຮັກສາກຽດສັກສີຂອງນັກຮົບປະຈັນບານທາງດ້ານວຽກງານການເມືອງ-ແນວຄິດ ທີ່ການຈັດຕັ້ງ-ຂັ້ນເທີງມອບໝາຍໃຫ້ສຳເລັດຜົນສູງສຸດ.

ນໍ້າໃນວັນສື່ມວນຊົນລາວ ໝັ້ນຍືນ!

ທິດດີ