ພິທີເຊັນສັນຍາລົງທືນສ້າງສູນເຕັກນິກກະສິກຳຕົວແບບ ວຽງໄຊ ໄດ້ຈັດຂື້ນໃນຕອນເຊົ້າວັນທີ 27 ກໍລະກົດ 2021 ນີ້ ຢູ່ທີ່ຫ້ອງປະຊຸມພະແນກແຜນການ ແລະ ການລົງທືນແຂວງ ລະຫວ່າງ ທ່ານ ຄອນທອງ ມະນີວອນ ຫົວໜ້າພະແນກແຜນການ ແລະ ການລົງທືນແຂວງ ແລະ ທ່ານ ຄຳຜີວ ວົງສະຫວັນຕາງໜ້າກຸ່ມບໍລິສັດ ພົງສະຫວັນ ຈຳກັດ ຮ່ວມເຊັນເປັນສັກຂີພິຍານມີ ທ່ານ ຄຳ ໂຮມມີໄຊ ເຈົ້າເມືອງໆວຽງໄຊ ແລະ ທ່ານ ໄຈເພັດ ເຮືອງຖາວອນ ຮອງຫົວໜ້າ ພະແນກກະສິກຳ ແລະ ປ່າໄມ້ແຂວງ ໂດຍຊ້ອງໜ້າທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ, ມີຫົວໜ້າ-ຮອງຫົວໜ້າພະແນກການ, ຂະແໜງການ, ຜູ້ຕາງໜ້າກຸ່ມບໍລິສັດ ພົງສະຫວັນ ຈຳກັດ ພ້ອມດ້ວຍພະນັກງານວິຊາການຈາກພາກສ່ວນທີ່ກ່ຽວຂ້ອງເຂົ້າຮ່ວມນຳ

         ໂຄງການກໍ່ສ້າງສູນເຕັກນິກກະສິກຳຕົວແບບ ວຽງໄຊ ຕັ້ງຢູ່ເຂດກຸ່ມ5 ບ້ານນາໄກ່ ເມືອງວຽງໄຊແຂວງຫົວພັນ ເຊີ່ງແມ່ນ ກຸ່ມບໍລິສັດ ພົງສະຫັວນ ຈຳກັດເປັນຜູ້ສຳປະທານທີ່ດິນຂອງລັດໃນເນື້ອທີ່ 27 ເຮັກຕາກວ່າ ໄລຍະສໍາປະທານ 30 ປີ ດ້ວຍອັດຕາຄາເຊົ່າຕາມລະບຽບ ແລະ ກົດໝາຍຂອງ ສປປລາວ ໂດຍໄດ້ນຳໃຊ້ທືນເຂົ້າໃນການພັດທະນາເຂດດັ່ງກ່າວຈຳນວນ 1 ຕື້ກີບ,ມີ 3 ກິດຈະກຳຫຼັກຄື: ສ້າງເປັນສູນຕົວແບບທາງດ້ານກະສິກຳ – ການບໍລິການ, ເປັນແຫຼ່ງທ່ອງທ່ຽວທາງວັດທະນະທໍາ ແລະ ແຫຼ່ງທ່ອງທາງທ່ຽວທໍາມະຊາດ, ປະຈຸບັນກຸ່ມບໍລິສັດ ພົງສະຫວັນ ຈຳກັດ ໄດ້ລົງທືນຢູ່ແຂວງຫົວພັນຈຳນວນ 6 ໂຄງການ, ພາຍຫຼັງສູນດັ່ງກ່າວກໍ່ສ້າງສຳເລັດຈະເຮັດໃຫ້ກິດຈະກໍາດ້ານການກະສິກຳ ຢູ່ແຂວງຫົວພັນໄດ້ຮັບການພັດທະນາດີຂື້ນ, ສາມາດຕອບສະໜອງຄວາມຕ້ອງການໃຫ້ແກ່ສັງຄົມໄດ້ດີກວ່າເກົ່າ ທັງເປັນການສ້າງວຽກເຮັດງານທຳ, ລາຍຮັບໃຫ້ປະຊາຊົນພາຍໃນບ້ານທີ່ໂຄງການຕັ້ງຢູ່ເພີ່ມຂື້ນ ແລະ ເປັນການປະກອບສ່ວນເຂົ້າໃນການພັດທະນາເສດຖະກິດ – ສັງຄົມຂອງແຂວງຫົວພັນ ໃຫ້ຂະຫຍາຍຕົວຂື້ນເລື້ອຍໆ.

ພາບ-ຂ່າວ: ໄມຄໍາ ແຂວງຫົວພັນ