ມີເດຍລາວແຂວງຄຳມ່ວນ ກອງປະຊຸມຄະນະບໍລິຫານງານພັກແຂວງຄຳມ່ວນ ຄັ້ງທີ 04 ສະໄໝທີ X ໄດ້ໄຂຂຶ້ນທີ່ເຮືອນຮັບແຂກ ເລກ 01 ໃນວັນທີ 29 ກໍລະກົດ 2021 ໂດຍພາຍໃຕ້ການເປັນປະທານຂອງສະຫາຍ ວັນໄຊ ພອງສະຫວັນ ກໍາມະການສູນກາງພັກ, ເລຂາຄະນະບໍລິຫານງານພັກແຂວງຄຳມ່ວນ, ມີບັນດາສະຫາຍໃນຄະນະປະຈຳ, ກຳມະການພັກແຂວງ, ເລຂາພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກຂະແໜງການອ້ອມຂ້າງແຂວງເຂົ້າຮ່ວມ.

ວາລະດຳເນີນກອງປະຊຸມ ໄດ້ຮັບຟັງການຜ່ານຮ່າງບົດສະຫຼຸບຕີລາຄາໃນ 04 ຂົງເຂດວຽກງານ ເປັນຕົ້ນແມ່ນ: ການນຳພາ-ຊີ້ນຳ ຂອງຄະນະບໍລິຫານງານພັກແຂວງໃນໄລຍະ 06 ເດືອນຕົ້ນປີ, ທິດທາງແຜນການ 06 ເດືອນທ້າຍປີ 2021 ແລະ ວຽກງານຈຸດສຸມໃນ 03 ເດືອນຕໍ່ໜ້າ, ການຈັດຕັ້ງປະຕິບັດໂຄງການຄໍ້າປະກັນສະບຽງອາຫານ ແລະ ຜະລິດເປັນສິນຄ້າ ຕິດພັນກັບການຮັບມືໄພພິບັດ (ຕ້ານແລ້ງ-ຕ້ານຖ້ວມ), ການກວດກາຕີລາຄາການຈັດຕັ້ງປະຕິບັດດຳລັດ 348/ລບ ກ່ຽວກັບການແກ້ໄຂຄວາມທຸກຍາກຂອງປະຊາຊົນ, ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນພະຍາດໂຄວິດ-19, ສະພາບການຄຸ້ມຄອງແຮງງານ ແລະ ແຜນພັດທະນາສີມືແຮງງານ.

ເຊິ່ງໃນໄລຍະ 06 ເດືອນຜ່ານມາ ສະພາບການຂະຫຍາຍຕົວເສດຖະກິດຂອງແຂວງແມ່ນຢູ່ໃນລະດັບ 3,7% ຄິດເປັນມູນຄ່າລາຄາໃນປີ ເທົ່າກັບ 4.313 ຕື້ກີບ ສະເລ່ຍຕໍ່ຫົວຄົນເທົ່າກັບ 1.020 ໂດລາສະຫະລັດ. ໃນນີ້ຂະແໜງກະສິກຳຂະຫຍາຍຕົວ 1,6% ກວມເອົາ 24,53% ຂອງ GDP, ຂະແໜງອຸດສາຫະກໍາ ຂະຫຍາຍຕົວ 1,8% ກວມເອົາ 52,82% ແລະ ຂະ ແໜງບໍລິການຂະຫຍາຍຕົວ 3,7% ກວມເອົາ 22,65%, ມູນຄ່າການນຳເຂົ້າ-ສົ່ງອອກສົ່ງສິນຄ້າ ບັນລຸ 306,21 ລ້ານໂດລາສະຫະລັດ ໃນນີ້ມູນຄ່າການສົ່ງອອກ ບັນລຸໄດ້ 184,49 ລ້ານໂດລາ ເທົ່າກັບ 47,76% ຂອງແຜນການປີ, ມູນຄ່ານຳເຂົ້າ ບັນລຸ 121,71 ລ້ານໂດລາ ເທົ່າກັບ 53,76% ຂອງແຜນການປີ, ທາງດ້ານການຜະລິດກະສິກໍາ ແຜນການຜະລິດເຂົ້າປີ 2021 (ລວມ ລະດູແລ້ງ-ລະດູຝົນ) ໃນເນື້ອທີ່ 100.025 ເຮັກຕາ ໃນນັ້ນຜະລິດເປັນສະບຽງອາຫານ 67.278 ເຮັກຕາ, ປະຕິບັດໄດ້ 62.091 ເຮັກຕາ ເທົ່າກັບ 92,29%, ຜະລິດເປັນສິນຄ້າ 32.474 ເຮັກຕາ ປະຕິບັດໄດ້ 32.458 ເຮັກຕາ ເທົ່າກັບ 99,12%.

ໃນນັ້ນສິ່ງທີ່ພົ້ນເດັ່ນແມ່ນການຜະລິດເຂົ້ານາແຊງ ໃນປີ 2021 ປະຕິບັດໄດ້ 12.696 ເຮັກຕາ ລື່ນແຜນການ 12% (ແຜນ 11.362 ເຮັກຕາ), ການປູກພືດລະດູແລ້ງ ປະຕິບັດໄດ້ 10.130 ເຮັກຕາ ລື່ນແຜນ 02% (ແຜນ 9.905), ການປູກພືດລະດູຝົນ ປະຕິບັດໄດ້ 8.817 ເຮັກຕາ ລື່ນແຜນການ 42,79% (ແຜນ 6.175 ເຮັກຕາ), ດ້ານວຽກງານປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ເລີ່ມແຕ່ວັນທີ 01 ມັງກອນ ຫາວັນທີ 28 ກໍລະກົດ 2021 ມີຈໍານວນແຮງງານທີ່ເຂົ້າສູນຈຳກັດບໍລິເວນລວມທັງໝົດ 2.724 ຄົນ ໃນນັ້ນ ກັກກັນຄົບ 14 ວັນ 2.179 ຄົນ, ກວດພົບຜູ້ຕິດເຊື້ອໂຄວິດ-19 ລວມທັງໝົດ 138 ຄົນ, ປິ່ນປົວຫາຍດີແລ້ວ 37 ຄົນ ທັງໝົດເເມ່ນເຊື້ອພະຍາດນຳເຂົ້າມາຈາກປະເທດເພື່ອນບ້ານ, ໄດ້ຮັບວັກຊິນປະເພດ ຊີໂນຟາມ ຈຳນວນ 80.600 ໂດສ ແລະ ອັດສຕາເຊັນນີກາ 6.000 ໂດສ ເຊິ່ງໄດ້ເລີ່ມສັກວັກຊິນແຕ່ວັນທີ 09 ມີນາ ມາຮອດວັນທີ 28 ກໍລະກົດ 2021 ສາມາດສັກໄດ້ແລ້ວໃນເຂັມທີ 01 ຈຳນວນ 45.328 ຄົນ ແລະ ເຂັມທີ 02 ຈຳນວນ 32.594 ຄົນ, ໄດ້ຮັບວັກຊິນ ຈອນສັນ ແອນ ຈອນສັນ ຈຳນວນ 62.800 ໂດສ ໃນນັ້ນແມ່ນໄດ້ມີແຜນທີ່ຈະສັກເລີ່ມແຕ່ວັນທີ 09 ສິງຫາ ເປັນຕົ້ນໄປ, ທາງດ້ານວຽກງານແຮງງານ ແມ່ນໄດ້ເກັບກຳຂໍ້ມູນແຮງງານລາວກັບມາຈາກ ປະເທດໄທ ໃນຊ່ວງການແຜ່ລະບາດຂອງພະຍາດ ໂຄວິດ-19 ແລະ ແຮງງານຫວ່າງງານພາຍໃນ ມີຈໍານວນທັງໝົດ 14.589 ຄົນ. ໃນນີ້ ແຮງງານກັບມາຈາກໄທ 13.264 ຄົນ ແລະ ແຮງງານຫວ່າງງານພາຍໃນ 1.325 ຄົນ.

ສຳລັບການຄຸ້ມຄອງແຮງງານພາຍໃນ ທົ່ວແຂວງມີຫົວໜ່ວຍແຮງງານທັງໝົດ 495 ຫົວໜ່ວຍ, ມີຜູ້ອອກແຮງງານທັງໝົດ 20.335 ຄົນ. ໃນນັ້ນແຮງງານຕ່າງປະເທດມີ 5.569 ຄົນ ເຊິ່ງແຍກອອກເປັນ 03 ຂົງເຂດຄື: ຂົງເຂດອຸດສາຫະກຳ 168 ຫົວໜ່ວຍ ມີແຮງງານ 16.420 ຄົນ, ຂົງເຂດກະສິກຳ 35 ຫົວໜ່ວຍ ມີແຮງງານ 1.377 ຄົນ ແລະ ຂົງເຂດບໍລິການ 292 ຫົວໜ່ວຍ ມີແຮງງານ 2.538 ຄົນ.