ມີເດດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ກອງປະຊຸມອົງການປົກຄອງ ແຂວງສາລະວັນ ຄັ້ງທີ 2 ສະໄໝທີ IX ໄດ້ສຸມໃສ່ຕີລາການຜົນການຈັດຕັ້ງປະຕິບັດວຽກງານຮອບດ້ານໃນໄລຍະ 6 ເດືອນຕົ້ນປີ ແລະ ຄົ້ນຄວ້າປະກອບຄຳຄິດເຫັນຢ່າງເລີກເຊີ່ງ ຕໍ່ກັບທິດທາງແຜນການໃນຕໍ່ໜ້າ, ເຊີ່ງໄດ້ສໍາເລັດລົງໃນວັນທີ 29 ກໍລະກົດ 2021 ທີ່ສະໂມສອນແຂວງ ໂດຍເປັນປະທານຂອງທ່ານ ປອ ໂພໄຊ ໄຊຍະສອນ ເຈົ້າແຂວງສາລະວັນ, ບັນດາທ່ານຮອງເລຂາພັກແຂວງ, ຄະນະປະຈຳພັກແຂວງ,ກຳມະການພັກແຂວງ, ສະມາຊິກສະພາປະຊາຊົນແຂວງ, ເຈົ້າເມືອງ 8 ຕົວເມືອງ, ຫົວໜ້າ-ຮອງພະແນກການ, ອົງການທຽບເທົ່າ ອອ້ມຂ້າງແຂວງ, ພະນັກງານຫຼັກແຫຼ່ງ ແລະ 3 ກຸ່ມທະນະຄານຂອງລັດເຂົ້າຮ່ວມ.

ທ່ານ ປອ ໂພໄຊ ໄຊຍະສອນ ກໍໄດ້ລາຍງານຜົນກອງປະຊຸມລັດຖະບານ ຊຸດທີ IX ເປີດກ້ວາງ ຄັ້ງທີ I ປີ 2021, ໂດຍຜ່ານລະບົບທາງໄກ ທີ່ໄດ້ພິຈາລະນາ ແລະ ຕົກລົງຮັບຮອງເອົາບັນຫາທີ່ສໍາຄັນ ເປັນຕົ້ນ: ການສະຫຼຸບຕີລາຄາການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ທິດທາງແຜນວຽກຈຸດສຸມ 6 ເດືອນທ້າຍປີ 2021 ຂອງລັດຖະບານ, ຕີລາຄາການຈັດຕັ້ງປະຕິບັດວຽກງານຂອງລັດຖະບານ, ຜົນການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດພະຍາດໂຄວິດ-19, ການແກ້ໄຂ ແລະ ການກຽມຄວາມພ້ອມຮັບມືກັບໄພພິບັດທາງທໍາມະຊາດ, ສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ, ບົດຕີລາຄາການປະຕິບັດແຜນພັດທະນາເສດຖະກິດສັງຄົມແຫ່ງຊາດ ແລະ ຮັບຮອງເອົາບາງນິຕິກໍາ ທີ່ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການກຽມຄວາມພ້ອມຮອບດ້ານໃນການປັບປຸງ, ສ້າງກົດຫມາຍ ແລະ ນິຕິກໍາໃນປີ 2021.

ຈາກນັ້ນ, ກອງປະຊຸມໄດ້ການລາຍງານການຈັດຕັ້ງປະຕິບັດວຽກງານຕ່າງໆຂອງແຂວງສາລະວັນ, ທັງໄດ້ຊີ້ແຈງ, ປະກອບຄໍາເຫັນຢ່າງພາວະວິໄສ ເປັນຕົ້ນ: ການຈັດຕັ້ງປະຕິບັດແຜນພັດທະນາເສດຖະກິດ 6 ເດືອນຕົ້ນປີ ແລະ ທິດທາງແຜນການ 6ເດືອນທ້າຍປີ 2021, ການຈັດຕັ້ງປະຕິບັດແຜນງົບປະມານແຫ່ງລັດ. ເຊີ່ງໄລຍະ 6 ເດືອນຜ່ານມາ ສາມາດຮັກສາໄດ້ສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ ແລະ ສູ້ຊົນເຮັດໃຫ້ລວມຍອດມູນຄ່າຜະລິດຕະພັນພາຍໃນ ເພີ່ມຂຶ້ນໃຫ້ໄດ້ 5-6% ແລະ ສ້າງມູນຄ່າເພີ່ມຕາມລາຄາໃນປີໃຫ້ໄດ້ປະມານ 4.930 ຕື້ກວ່າກີບ ສະເລຍຕໍ່ຄົນ/ປີ 10 ລ້ານກີບ ຂຶ້ນໄປ ຫລື 1.232 ໂດລາສະຫະລັດ, ໃນນັ້ນກະສິກໍາປ່າໄມ້ ເພີ່ມຂຶ້ນ 3,6% ກວມ 41%, ອຸດສາຫະກໍາ ເພີ່ມຂຶ້ນ 7,3% ກວມ 25%, ການບໍລິການ ແລະ ພາສີຂາເຂົ້າ ເພີ່ມຂຶ້ນ 6,5% ກວມ 34%, ຄາດຄະເນລວມຍອດລາຍຮັບທັງໝົດ 173,04 ຕືກີບ ແລະ ລາຍຈ່າຍປະມານ 370,35 ຕື້ກີບ, ມູນຄ່າສິນຄ້າສົ່ງອອກ 1.091 ຕືກວ່າກີບ ແລະ ມູນຄ່າສິນຄ້ານໍາເຂົ້າ 170 ຕື້ກວ່າກີບ. ວຽກງານວັດທະນະທຳ-ສັງຄົມ ແລະ ວຽກງານຂົງເຂດຕຸລາການ ກໍໄດ້ເຄື່ອນໄຫວຢ່າງຕັ້ງໜ້າ. ເຖີງວ່າໄດ້ພົບກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍດ້ານ ຕໍ່ກັບການຈັດຕັ້ງປະຕິບັດ, ການແກ້ໄຂຄວາມທຸກຍາກຂອງປະຊາຊົນ, ປະກົດການຫຍໍ້ທໍ້ໃນສັງຄົມ ແລະ ບັນຫາອື່ນໆ.

ທ່ານ ປອ ໂພໄຊ ໄຊຍະສອນ ໄດ້ເນັ້ນໃຫ້ເອົາໃຈໃສ່ເພີ່ມທະວີການຊີ້ນໍາໆພາຈັດຕັ້ງຜັນຂະຫຍາຍມະຕິ XI ຂອງສູນກາງພັກ, ມະຕິ IX ຂອງອົງຄະນະພັກແຂວງ ຖືເປັນບັນຫາສຳຄັນ ສຶກສາອົບຮົມການເມືອງແນວຄິດ ໃຫ້ຖັນແຖວພະນັກງານຢ່າງເລີກເຊີ່ງ, ເຖີງຖອງ, ກຳແໜ້ນໄດ້ເນື້ອໃນຈິດໃຈຂອງມະຕິຕ່າງທ ເພື່ອເຮັດໃຫ້ການຈັດຕັ້ງປະຕິບັດວຽກງານຕ່າງໆໃນຂົງເຂດຂອງຕົນຖືກຕ້ອງ ແລະ ສອດຄ່ອງ ໄປຕາມກົນໄກ, ແນວທາງນະໂບລາຍຂອງພັກຂອງລັດ ແລະ, ພ້ອມກັນບຸກບືນສູ້ຊົນເຮັດໃຫ້ບັນດາຕົວເລກຄາດໝາຍ ທີ່ບໍ່ບັນລຸ ໄດ້ຮັບການແກ້ໄຂ ດີຂຶ້ນກວ່າເກົ່າ ເປັນຕົ້ນ: ການຈັດເກັບລາຍຮັບ-ການຄຸ້ມຄອງລາຍຈ່າຍ, ການສົ່ງເສີມສົ່ງອອກສິນຄ້າ, ບັນຫາການທ້າທາຍຕ່າງໆລາຄາສິນຄ້າປ່ຽນແປງ ແລະ ອື່ນໆ, ຈັດຕັ້ງຜັນຂະຫຍາຍໂຄສະນາທາງຂໍ້ມູນຂ່າວສານຫລາຍຮູບແບບ ໃນສະພາບການໃໝ່ຄື ຮູບແບບວິຖີການດຳລົງຊີວິດແບບໃໝ່ໃນໄລຍະໂຄວິດ-19 ຢ່າງເປັນຂະບວນການ, ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ແລະ ສຸມໃສ່ແກ້ໄຂປະກົດ ການຫຍໍ້ທໍ້ຕ່າງໆໃນສັງຄົມ ຊຸກຍູ້, ສົ່ງເສີມການຜະລິດເປັນສິນຄ້າຂອງປະຊາຊົນໃຫ້ເປັນຂະບວນການຟົດຟື້ນກວ້າງຂວາງກວ່າເກົ່າເພື່ອໃຫ້ການຈັດຕັ້ງປະຕິບັດ ວຽກງານໃນ ຕໍ່ໜ້າບັນລຸຕາມຄາດໝາຍທີ່ວາງໄວ້.