ມີເດຍລາວແຂວງຳປາສັກ ຂ່າວ-ພາບ: ພຸດທະສິນ ວົງວິໄລທອງ ຕອນເຊົ້າວັນທີ 30 ກໍລະກົດ 2021 ນີ້ທີ່ສະໂມສອນເມືອງໂຂງ ແຂວງຈຳປາສັກ ໄດ້ຈັດພິທີປາຖະກະຖາ ວັນຄ້າຍວັນເກີດປະທານ ສຸພານຸວົງ ຄົບຮອບ 112 ປີ, ວັນເຊັນສົນທິສັນຍາມິດຕະພາບການຮ່ວມມື ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 44 ປີ ແລະ 59 ປີ ໃຫ້ພະນັກງານຫຼັກແຫຼ່ງນຳພາ, ພະນັກງານ-ລັດຖະກອນ, ກຳລັງ ປກສ-ປກຊ ໃນທົ່ວເມືອງ ໃຫ້ໄດ້ຮັບຮູ້ ແລະ ເຊື່ອມຊືມເຂົ້າໃຈຢ່າງເລິກເຊິ່ງ ໂດຍມີຄົນເຂົ້າຮ່ວມຈຳນວນ 119 ຄົນ, ຍິງ 27 ຄົນ.

ໃຫ້ກຽດເຂົ້າຮ່ວມເປັນປະທານໃນພິທີ ແລະ ຂຶ້ນບັນຍາຍເອກະສານໂດຍທ່ານ ນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໆໂຂງ, ທ່ານ ພູວັນ ສີສຸພົນ ຮອງເລຂາພັກເມືອງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກພະນັກງານ; ໂອກາດນີ້ ເຈົ້າເມືອງໆໂຂງ ໄດ້ຍົກໃຫ້ເຫັນໂດຍຫຍໍ້ກ່ຽວກັບຊີວິດ ແລະ ການເຄື່ອນ ໄຫວປະຕິວັດຂອງປະທານ ສຸພານຸວົງ, ພ້ອມທັງຜົນງານ ແລະ ຄຸນງານມຄວາມດີ. ປະທານ ສຸພານຸວົງ ແມ່ນເປັນຜູ້ນໍາທີ່ມີຄວາມຈົ່ງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ ຍາມໃດກໍ່ໄດ້ຍົກສູງສະຕິ ລະບຽບວິໃນຕໍ່ການຈັດຕັ້ງ ນັບຖືໝູ່ຄະນະ, ເອື້ອເຟື້ອຮັກແພງມິດສະຫາຍຢ່າງຈິງໃຈ, ດໍາລົງຊີວິດຢ່າງສັດຊື່ສຸຈະລິດ ແລະ ງ່າຍດາຍ, ເພີ່ນແມ່ນປັນຍາຊົນຜູ້ຍິ່ງໃຫຍ່ ເປັນເຊື້ອເຈົ້າຜູ້ໜຶ່ງທີ່ມີນໍ້າໃຈຮັກຊາດອັນດູດດື່ມ,ມີຈິດໃຈຕໍ່ສູ້ທີ່ອາດຫານກ້າແກ່ນ, ມີທັດສະນະຫຼັກໝັ້ນອັນໜັກແໜ້ນ ແລະ ນໍ້າໃຈເສຍສະຫຼະອັນສູງສົ່ງເພື່ອຊາດ ເພື່ອປະຊາຊົນ ປະທານ ສຸພານຸວົງ ໄດ້ເລີ່ມຈາກນັກຮັກຊາດທີ່ແທ້ຈິງ ກາຍເປັນນັກປະຕິວັດທີ່ກ້າແກ່ນ, ເປັນໜຶ່ງໃນບັນດາຜູ້ນໍາທີ່ດີເດັ່ນ ແລະ ເຄົາລົບຮັກຂອງປະຊາຊົນລາວບັນດາເຜົ່າ.

ໂອກາດນີ້ ປະທານກອງປະຊຸມ ຍັງໄດ້ເນັ້ນໜັກໃຫ້ບັນດາພະນັກງານ, ສະມາຊິກພັກຈົ່ງພ້ອມກັນຮຽນເອົາທັດສະນະຫຼັກໝັ້ນການເມືອງໜັກແໜ້ນ, ເຊື່ອໝັ້ນຕໍ່ການນຳພາຂອງພັກ ກໍຄືແນວທາງປ່ຽນແປງໃໝ່, ເອົາໃຈໃສ່ເຝິກຜົນຕົນເອງໃຫ້ກາຍເປັນພະນັກງານຮຸ່ນສືບທອດທີ່ຈົ່ງຮັກພັກດີຕໍ່ພັກ ແລະ ປະເທດຊາດ; ອອກແຮງສຶກສາຮ່ຳຮຽນ ທິດສະດີມາກ-ເລນິນ, ເຕັກນິກວິທະຍາສາດ, ພາສາຕ່າງປະເທດ ແລະ ວິຊາຊີບໃນຂະແໜງການຕ່າງໆ ເພື່ອໃຫ້ຕົນເອງມີຄວາມຮັບຮູ້ຄວາມສາມາດສູງ, ປະກອບສ່ວນເຂົ້າໃນການສ້າງສາພັດທະນາປະເທດຊາດ, ພ້ອມກັນນັ້ນ ກໍຕ້ອງສ້າງຕົນເອງໃຫ້ເປັນຄົນກ້າຫານ, ກ້າຄິດ, ກ້າສະແດງອອກ ເພື່ອປະກອບຄຳຄິດຄຳເຫັນທີ່ເປັນປະໂຫຍດໃນການຈັດຕັ້ງປະຕິບັດແນວທາງແຜນນະໂຍບາຍຂອງພັກ ແລະ ກົດໝາຍຂອງລັດ; ຕ້ອງດຳລົງຊີວິດດ້ວຍຄວາມຊື່ສັດປອດໃສຂາວສະອາດ, ດຸໝັ່ນອອກແຮງງານ, ສ້າງເສດຖະກິດຄອບຄົວ, ປະຢັດມັດຖະຍັດ, ພ້ອມກັນຕ້ານ ແລະ ສະກັດກັ້ນປະກົດການຫຍໍ້ທໍ້ໃນສັງຄົມ; ທີ່ສຳຄັນແມ່ນ ຕ້ອງໃຫ້ຮ່ຳຮຽນເອົາຄຸນສົມບັດສິນທຳປະຕິວັດ ແລະ ແບບແຜນດຳລົງຊີວິດຂອງປະທານ ສຸພານຸວົງ ແລ້ວນຳມາໝູນໃຊ້ໃຫ້ແທດເໝາະກັບຕົນເອງ ເພື່ອໃຫ້ເກີດປະໂຫຍດ.