ໃນໂອກາດທີ່ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນ້ຳທາຂອງທ່ານ ປອ ປີເຕີ ເຮມ໋ອນ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສະຫະລັດອາເມລິກາ ປະຈຳສາທາລະນະລັດ ປະຊາທິປະໄຕ ປະຊາຊົນ ລາວ ພ້ອມດ້ວຍພັນລະຍາ ແລະ ຄະນະ, ວັນທີ 29 ກໍລະກົດ 2021 ທ່ານໄດ້ເຂົ້າຢ້ຽມຂໍ່ານັບ ແລະ ພົບປະທ່ານ ຄໍາໄຫຼ ສີປະເສີດ ເຈົ້າແຂວງໆຫຼວງນໍ້າທາ,ເຊິ່ງທ່ານໄດ້ລາຍງານການເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນໍ້າທາໃນຄັ້ງນີ້ ກ່ຽວກັບການຮ່ວມມືຂອງສະຖານທູດອາເມລິກາ ກັບລັດຖະບານລາວ ປີນີ້ແມ່ນຄົບຮອບ 5 ປີແຫ່ງການຮ່ວມມືລະຫວ່າງ 2 ປະເທດ ຫຼາຍດ້ານເປັນຕົ້ນແມ່ນ ດ້ານສາທາລະນະສຸກ, ດ້ານໂພສະນາການ, ການສຶກສາ, ເກັບກູ້ລະເບີດບໍ່ທັນແຕກ, ການຊ່ວຍເຫຼືອປັບປຸງສິ່ງແວດລ້ອມ, ດຶງດູດການລົງທຶນພາຍໃນ ພາຍນອກເຂົ້າປະເທດລາວ ແລະ ອື່ນໆ

ນອກນັ້ນຍັງໄດ້ຊ່ວຍເຫຼືອແຂວງຫຼວງນໍ້າທາຝຶກອົບຮົມແພດໝໍນັກລະບາດວິທະຍາເພື່ອເຝົ້າລະວັງພະຍາດຕ່າງໆ, ໃຫ້ການຊ່ວຍເຫຼືອວັກຊິນ, ຊ່ວຍເຫຼືອເຫຍື່ອການຄ້າມະນຸດ, ຊ່ວຍເຫຼືອຕໍ່ຕ້ານອັດສາຍະກໍາຂ້າມຊາດ, ຕໍ່ຕ້ານການຄ້າ-ຂາຍຢາເສບຕິດ ແລະ ແລກປ່ຽນການຮອງຮັບແຂວງຫຼວງນໍ້າທາທີ່ໄດ້ຮັບຜົນປະໂຫຍດຈາກທາງລົດໄຟ, ໂຄງການລົງທຶນອໍາມະຕະ, ເສັ້ນທາງເຊື່ອມຕໍ່ອິນເດຍ ແລະ ການຕ້ານສະກັດກັ້ນການແຜ່ລະບາດເຊື້ອພະຍາດໂຄວິດ-19 ຢູ່ພາຍໃນແຂວງ ແລະ ໄດ້ພົບປະຂະແໜງການທີ່ກ່ຽວຂ້ອງ ແລະ ໃຫ້ການຊ່ວຍເຫຼືອແວ່ນກວດພາຫະນະ ດ່ານພາສີຕື່ມອີກ.

ໂອກາດນີ້ທ່ານ ຄຳໄຫຼ ສີປະເສີດ ເຈົ້າແຂວງໆຫຼວງນ້ຳທາ ໄດ້ສະແດງຄວາມປິຕິຊົມຊື່ນຕ້ອນຮັບໃນໂອກາດທີ່ ທ່ານ ປອ ປີເຕີ ເຮມ໋ອນ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສະຫະລັດອາເມລິກາ ປະຈຳສາທາລະນະລັດ ປະຊາທິປະໄຕ ປະຊາຊົນ ລາວ ພ້ອມດ້ວຍພັນລະຍາ ແລະ ຄະນະທີ່ໄດ້ສະຫຼະເວລາລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຫຼວງນ້ຳທາຄັ້ງນີ້ ໃນຄະນະທີ່ທາງແຂວງພົບຄວາມຫຍຸ້ງຍາກຂອງການຕ້ານສະກັດກັ້ນການແຜ່ລະບາດເຊື້ອພະຍາດໂຄວິດ-19 ແຂວງຫຼວງນໍ້າທາໄດ້ຮັບວັກຊິນສ່ວນແບ່ງຈາກລັດຖະບານ ມາເຖິງປັດຈຸບັນແມ່ນຮອບທີ 2 ໄດ້ສັກໃຫ້ປະຊາກອນກວມ 10% ບວກໃສ່ການປະກອບສ່ວນຂອງທ່ານ ແລະ ພາກສ່ວນອື່ນໆກໍ່ຄິດວ່າໂຕເລກການຊັກວັກຊິນປີນີ້ຈະບັນລຸຕາມຄາດໝາຍຂອງລັດຖະບານວາງໄວ້, ຂອບໃຈທີ່ທ່ານປະກອບທຶນຮອນ, ເຕັກນິກວິຊາການດ້ານຕ່າງໆໃຫ້ແກ່ແຂວງຫຼວງນໍ້າທາ ພ້ອມນັ້ນທ່ານໄດ້ສະແດງຄວາມຊົມເຊີຍທີ່ທ່ານໄດ້ຮັບໜ້າທີ່ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສະຫະລັດອາເມລິກາ ປະຈຳສາທາລະນະລັດ ປະຊາທິປະໄຕ ປະຊາຊົນລາວ ອວຍພອນໃຫ້ທ່ານສືບຕໍ່ພາລະກິດຈົນໃຫ້ມັນສໍາເລັດ ແລະ ເຫັນດີຕາມແຜນການເຄື່ອນໄຫວຢູ່ຫຼວງນໍ້າທາຂອງທ່ານໃນຄັ້ງນີ້,

ອາທິດຜ່ານມາແຂວງຫຼວງນໍ້າທາກໍ່ໄດ້ປະສົບໄພທໍາມະຊາດ ນໍ້າຖ້ວມບໍລິເວນສະໜາມບິນ ແລະ ບັນດາເມືອງ ອັນໄດ້ສ້າງຄວາມເສຍຫາຍທາງດ້ານພື້ນຖານການຜະລິດຫຼາຍພໍສົມຄວນ, ແຮງງານຕ່າງປະເທດມາສູນກັກກັນບໍ່ຫຼາຍສະເລ່ຍເດືອນໜື່ງ 50 ຄົນ,ກ່ຽວກັບຄໍາຖາມແລກປ່ຽນຜົນປະໂຫຍດທາງລົດໄຟ ຕົ້ນຕໍແມ່ນໄດ້ຈາກທາງເສດຖະກິດ-ການລົງທຶນຢ່າງມະຫາສານ ທາງແຂວງໄດ້ກໍານົດ 8 ຈຸດສຸມຄື ດຶງດູດການລົງທຶນ, ສົ່ງເສີມການບໍລິການທາງຜ່ານ,ພັດທະນາວຽກງານການທ່ອງທ່ຽວ, ນໍາໃຊ້ 4 ທົ່ງພຽງ, ຄຸ້ມຄອງທີ່ດິນ, ປົກປັກຮັກສາສິ່ງແວດລ້ອມ, ພັດທະນາຊັບພະຍາກອນມະນຸດ ແລະ ຊຸກຍູ້ເຂດເສດຖະກິດພິເສດ, ໃຫ້ການຮ່ວມມືໂຄງການອໍາມະຕະ, ເສັ້ນທາງເຊື່ອມຕໍ່ອິນເດຍ ແລະ ການຮ່ວມມືຫຼວງນໍ້າທາ-ບໍ່ແກ້ວໃນວຽກງານການຕ້ານສະກັດກັ້ນການແຜ່ລະບາດເຊື້ອພະຍາດໂຄວິດ-19 ແລະ ທ່ານໄດ້ອວຍພອນໃຫ້ທ່ານທູດ, ພ້ອມດ້ວຍພັນລະຍາ ແລະ ຄະນະ ເຮັດວຽກໃຫ້ສໍາເລັດທຸກປະການ. ຂ່າວ: ສົມພອນ ຂຸນດາວົງ