ມີເດຍລາວແຂວງໄຊສົມບູນ ຂ່າວ: ສຸກສັນ ອ້ວນລິທິກຸນ ພະແນກແຜນການ ແລະ ການລົງທຶນ ແຂວງໄຊສົມບູນ ຈັດກອງປະຊຸມສະຫລຸບຖອດຖອນບົດຮຽນ ວຽກງານສົ່ງເສີມ ແລະ ຄຸ້ມຄອງການລົງທຶນ ເອກະຊົນ ພາຍໃນ ແລະ ຕ່າງປະເທດ ທົ່ວແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ໃນຕອນເຊົ້າຂອງວັນທີ 30 ກໍລະກົດ 2021 ນີ້, ທີ່ສະໂມສອນກອງບັນຊາການທະຫານແຂວງ ໂດຍການເຂົ້າຮ່ວມເປັນປະທານ ຂອງທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ, ມີຮອງເຈົ້າແຂວງ, ບັນດາທ່ານເຈົ້າເມືອງ, ຫົວໜ້າພະແນກການທີ່ກ່ຽວຂ້ອງ ແລະ ບັນດາມີບໍລິສັດຜູ້ລົງທຶນເອກະຊົນ ທັງພາຍໃນ ແລະ ຕ່າງປະເທດ ເຂົ້າຮ່ວມ.

ໃນກອງປະຊຸມ ທ່ານ ໄຊຍະເດດ, ວົງສາລະວັນ, ຫົວໜ້າພະແນກແຜນການ ແລະ ການລົງທຶນແຂວງ ໄດ້ຜ່ານບົດສະຫລຸບລາຍງານຫຍໍ້ ກ່ຽວກັບສະພາບການລົງທຶນເອກະຊົນພາຍໃນ ແລະ ຕ່າງປະເທດ ໃນໄລຍະ 6 ເດືອນຕົ້ນປີ ຜ່ານມາ ແລະ ທິດທາງແຜນການ 6 ເດືອນທ້າຍປີ 2021. ເຫັນວ່າການລົງທຶນຂອງພາກເອກະຊົນ ພາຍໃນ ແລະ ຕ່າງປະເທດມີບັນຍາກາດດີ, ເຊິ່ງສະແດງອອກຕົວເລກອະນຸມັດການລົງທຶນທັງໝົດ ສາມາດປະຕິບັດໄດ້ 17 ໂຄງການ, ມູນຄ່າການລົງທຶນ 748 ຕື້ກວ່າກີບ, ເທົ່າກັບ 78,44 ລ້ານໂດລາສະຫະລັດ ທຽບໃສ່ແຜນການປີ 2021 ລື່ນແຜນ 473,27 ຕື້ກີບ, ເທົ່າກັບ 172% (ແຜນການຄາດຄະເນພຽງແຕ່ 275 ຕື້ກີບ).

ໃນນັ້ນ: ວຽກທີ່ພົ້ນເດັ່ນ ໃນ 6 ເດືອນຕົ້ນປີ ແມ່ນການອະນຸມັດການລົງທຶນ ເພື່ອສຶກສາສໍາຫລວດ, ຊອກຄົ້ນແຮ່ທາດ, ວຽກສຶກສາສໍາຫລວດ ສ້າງບົດວິພາກເສດຖະກິດ-ເຕັກນິກດ້ານການທ່ອງທ່ຽວ 3 ໂຄງການ ເຫັນວ່າ ກິດຈະການນີ້ມີຜົນປະໂຫຍດຫລາຍຕໍ່ເສດຖະກິດ-ສັງຄົມ ຂອງແຂວງ, ສ້າງຜົນປະໂຫຍດໃຫ້ແຂວງ ກໍ່ຄືການເຮັດໃຫ້ປະຊາຊົນບັນດາເຜົ່າມີວຽກເຮັດງານທໍາ ແລະ ເຮັດໃຫ້ປະຊາຊົນຫລຸດພົ້ນອອກຈາກຄວາມທຸກຍາກເທື່ອລະກ້າວໃນອານາຄົດ. ພ້ອມດຽວກັນຍັງໄດ້ຕີລາຄາໃຫ້ເຫັນສະພາບບັນຫາໂດຍລວມ ກ່ຽວກັບຈຸດດີ ແລະ ຂໍ້ຄົງຄ້າງ, ວິທີແກ້ໄຂໃນການຈັດຕັ້ງປະຕິບັດວຽກງານດັ່ງກ່າວ ລວມເຖີງທິດທາງແຜນການ 6 ເດືອນທ້າຍປີ 2021.

ຈາກນັ້ນ ບັນດາຜູ່ເຂົ້າຮ່ວມໄດ້ພ້ອມກັນປະກອບຄໍາຄິດ-ຄໍາເຫັນ ຢ່າງກົງໄປ-ກົງມາ ແລະ ສ້າງສັນ ກ່ຽວກັບກົນໄກການປະສານງານລະຫວ່າງພາກລັດ ແລະ ເອກະຊົນ, ລະບຽບການຄຸ້ມຄອງໂຄງການຕ່າງໆ ທີ່ລະບຸໃວ້ໃນສັນຍາສໍາປະທານການລົງທຶນຂອງນັກລົງທຶນເອກະຊົນພາຍໃນ ແລະ ຕ່າງປະເທດ. ທັງນີ້ກໍເພື່ອແນໃສ່ໃຫ້ມີຄວາມສອດຄ່ອງກັບແນວທາງນະໂຍບາຍ ຍຸດທະສາດແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ ບົນພື້ນຖານຄວາມຖືກຕ້ອງຕາມກົດໝາຍ ແລະ ລະບຽບການ ຮັບປະກັນການບໍລິການການລົງທຶນ ໃຫ້ມີຄວາມສະດວກກະທັດຮັດ ວ່ອງໄວໂປ່ງໃສ ແລະ ມີປະສິດທິພາບ.