ມີເດຍລາວແຂວງຫຼວງນ້ຳທາ ວັນທີ່ 29 ກໍລະກົດ 2021 ຢູ່ທີ່ຫ້ອງວ່າການແຂວງຫຼວງນໍ້າທາ, ໄດ້ຈັດກອງປະຊຸມຄະນະສະເພາະກິດເພຶ່ອປ້ອງກັນ, ຄວບຄຸມ ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ – 19 ຂອງສອງແຂວງຄຶ: ແຂວງຫຼວງນໍ້າທາ ແລະ ແຂວງບໍ່ແກ້ວ, ໂດຍການເປັນປະທານຮວ່ມຂອງທ່ານ ຄໍາໄຫຼ ສີປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນໍ້າທາ, ທ່ານ ປະລິຍາເອກ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໆບໍ່ແກ້ວ, ຕະຫຼອດຮອດ ຄະນະສະເພາະກິດຂອງສອງແຂວງ, ເຂດພິເສດ ແລະ ຂະແໜງການທີ່ກ່ຽວຂ້ອງຂອງສອງແຂວງເຂົ້າຮວ່ມ.

ກອງປະຊຸມໄດ້ຮັບຟັງການລາຍງານການລະບາດຂອງພະຍາດໂຄວິດ – 19 ຂອງທັງສອງແຂວງໃຫ້ເຊີ່ງກັນ ແລະ ກັນຊາບ ເປັນຕົ້ນ, ຜົນການຈັດຕັ້ງປະຕິບັດ ມາດຕະການປ້ອງກັນ, ຄອບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ – 19 ສະພາບການຕິດເຊຶ້ອພາຍໃນແຂວງລວງນໍ້າທາມີທ່າອ່ຽງເພີ່ມຂື້ນ, ສ່ວນກໍລະນີທີ່ພົບແມ່ນການນໍາເຂົ້າມາຈາກຕ່າງແຂວງ ແລະ ເປັນການລັກລອບເຂົ້າແຂວງຫຼວງນໍ້າທາໂດຍບໍ່ໄດ້ຮັບການອະນຸຍາດ ຂອງຄົນຈີນ ເປັນຈໍານວນຫຼາຍ,ຈາກຄະນະສະເພາະກິດແຂວງຫຼວງນໍ້າທາ ນັບແຕ່ເດືອນມັງກອນ ມາຮອດ ເດືອນກໍລະກົດ 2021 ມີຜູ້ຕິດເຊື້ອນໍາເຂົ້າມາຜ່ານແຂວງຫຼວງນໍ້າທາທັງໝົດ 20 ກໍລະນີໃນນັ້ນມີຄົນຈີນ 14 ກໍລະນີ, ຍີງ 2 ຄົນ, ຄົນລາວມີ 6 ຄົນ, ຍິງ 4 ຄົນ, ປີ່ນປົວຫາຍດີ ແລະ ອອກໂຮງໝໍແຂວງ 16 ຄົນ, ຍັງນອນໂຮງໝໍ 4 ຄົນ ແລະ ເສຍຊິວິດ 0 ຄົນ.


ສະພາບການລະບາດຂອງພະຍາດໂຄວິດ – 19 ຂອງແຂວງບໍ່ແກ້ວ ເລີ່ມມີການລະບາດມາແຕ່ວັນທີ່ 22 ເມສາ 2021 ເຊິ່ງແມ່ນເກີດຈາກກໍລະນີນໍາເຂົ້າມາ ( ໂດຍແມ່ນຍິງສາວ ທີ່ເດີນທາງມາຈາກນະຄອນຫຼວງໃນວັນທີ 13 ເມສາ ມີປະຫວັດພົວພັນສໍາພັດໃກ້ສິດກັບກໍລະນີ 165 ຂອງນະຄອນ
ຫຼວງວຽງຈັນ ) ມາຮອດປະຈຸບັນມີຜູ້ຕິດເຊື້ອທັງໝົດ 495 ກໍລະນີ ( ຫວ້ຍຊາຍ 43 ຄົນ, ຕົ້ນເຜິ້ງ 4 ຄົນ, ປາກທາ 1 ຄົນ ແລະ ເຂດເສດຖະກິດສາມຫຼ່ຽມຄໍາ 450 ຄົນ, (ຈີນ 115 ຄົນ, ມຽນມາ 73 ຄົນ, ຄົນລາວ 249 ຄົນ, ໄທ 13 ຄົນ, ຫວຽດນາມ 2 ຄົນ.


ຈາກນັ້ນກອງປະຊຸມກໍ່ຄື ຄະນະນໍາ ແລະ ຄະນະສະເພາະກິດທັງ ສອງແຂວງ ໄດ້ປະກອບຄໍາຄິດຄໍາເຫັນ, ຄົ້ນຄວ້າ, ປຶກສາຫາລື ໄດ້ຕົກລົງເຫັນດີເປັນເອກະພາບຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ເຊັ່ນ: ສໍາເລັບຄົນຈີນຢູ່ແຂວງບໍ່ແກ້ວທີ່ມີຈຸດປະສົງຢາກເດີນທາງຜ່ານແຂວງຫຼວງນໍ້າທາເພຶ່ອກັບຄືນປະເທດແມ່ນໃຫ້ແຂວງບໍ່ແກ້ວນໍາເອົາພວກກ່ຽວເຂົ້າໄປຈໍາກັດບໍລິເວນຢູ່ສູນກັກກັນຂອງແຂວງບໍ່ແກ້ວກ່ອນ, ແລ້ວຈຶ່ງໃຫ້ຄະນະສະເພາະ
ກິດແຂວງບໍ່ແກ້ວ ປະສານພົວພັນນໍາຄະນະສະເພາະກິດແຂວງຫຼວງນໍ້າທາ, ເພຶ່ອຈັດສົ່ງພວກກ່ຽວເປັນທາງການ ໂດຍບໍ່ໃຫ້ເກີນ 100 ຫາ150 ຄົນຕໍ່ມື້ ແລະມີເຈົ້າໜ້າທີ່ຕໍາຫຼວດຕິດຕາມມາທຸກຄັ້ງ ແລະດໍາເນີນຂັ້ນຕອນຕ່າງໆໃຫ້ຖືກຕ້ອງ, ການຈັດສົ່ງແຮງງານມາແຕ່ເຂດສາມຫຼ່ຽມ ຄໍາ ແຮງງານລາວ ແລະ ແຮງງານຈີນ ຕ້ອງມີພາຫະນະຮັບປະກັນໃນການຈັດສົ່ງເປັນຕົ້ນ: ສາມາດຮັກສາໄລຍະຫາງບ່ອນນັ່ງ, ລະບົບການປ້ອງກັນການຕິດເຊື້ອ, ການອະນາໄມຄົນ ແລະ ພາຫະນະ, ການສົ່ງແຮງງານຈີນຕ້ອງສົ່ງໃຫ້ຮອດເຂດພິເສດບໍ່ເຕ່ນແດນງາມໂດຍມີເຈົ້າໜ້າທີ່ຄະນະສະເພາະກິດມາສົ່ງ ແລະມີການເຊັນມອບ – ຮັບແຮງງານດັ່ງກ່າວທີ່ສົ່ງມາ ລະຫວ່າງ ເຈົ້າໜ້າທີ່ຂອງແຂວງຫຼວງນໍ້າທາ ແລະ ແຂວງບໍ່ແກ້ວ, 2 ແຂວງເອກະພາບໃນການກໍານົດເອົາບໍລິສັດຂົນສົ່ງໂດຍສານ ຫຼື ຜູ້ປະກອບການທີ່ໄດ້ຮັບອະນຸຍາດດ້ານການຂົນສົ່ງ, ເພີ່ມທະວີສະກັດກັ້ນ, ປ້ອງກັນການລັກລອບເຂົ້າ – ອອກ ເມືອງແບບບໍ່ ຖຶກຕ້ອງຢ່າງເປັນເຈົ້າການ,

2 ແຂວງເຫັນດີສະເໜີຫາລັດ ຖະບານ ສປປ ລາວ ເພຶ່ອສະເໜີເຖິງ ສປ ຈີນ ໃຫ້ຮັບເອົາພົນລະເມືອງຈີນທີ່ມີເຈດຈໍານົງຢາກກັບຄືນປະເທດ ໂດຍບໍ່ຈໍາແນກຜູ້ທີ່ຕິດເຊື້ພະຍາດ ໂຄວິດ -19 ແລະ ຜູ້ທີ່ບໍ່ຕິດເຊື້ອພະຍາດ ໄປກວດກາ ແລະ ແຍກຢູ່ປະເທດຈີນ ແລະ ເຫັນດີຖອດຖອນບົດຮຽນແລກປ່ຽນຂໍ້ມູນໃນການຈັດຕັ້ງປະຕິບັດວຽກງານປ້ອງກັນພະ ຍາດໂຄວິດ-19 ໃນແຕ່ລະວັນໂດຍຜ່ານກອງປະຊຸມວີດີໂອທາງໄກ ແລະ ທາງສື່ອອນລາຍຕ່າງໆທີ່ສະດວກ ເພື່ອແກ້ໄຂສະ
ພາບການທີ່ອາດຈະເກີດຂື້ນໃນແຕ່ລະວັນໃຫ້ທັນກັບສະພາບການເພື່ອ ເຮັດໃຫ້ການແຜ່ລະບາດຂອງພະຍາດໂຄວິດ – 19 ໃນປັດຈຸບັນ ແລະ ໃນຕໍ່ໜ້າໃຫ້ໝົດໄປ.
ຂ່າວ: ສົມພອນ ຂຸນດາວົງ