ມີເດຍລາວແຂວງສາລະວັນ ພາບ-ຂ່າວ: ສິດຕາ ເພັດວົງສາ
ວັນທີ 29 ກໍລະກົດ 2021 ຢູ່ທີ່ສະໂມສອນເມືອງຕະໂອ້ຍ ໄດ້ມີພິທີປະກາດ ແລະ ມອບໃບຢັ້ງຢືນໃຫ້ຄອບຄົວ ຢຸດຕິການຖ່າຍຊະຊາຍ, ໂດຍການເປັນປະທານຂອງ ທ່ານ ເພັດສະໜອນ ຫຼວງລາດ ຮອງເຈົ້າເມືອງໆຕະໂອ້ຍ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ນາງ ດຣ ວິລະພັນ ແກ້ວເມກ ຫົວໜ້າຫ້ອງການສາທາລະນະສຸກເມືອງ ແລະ ທ່ານ ເພັງພະຈັນ ພົນອາສາ ຜູ້ບໍລິຫານຫ້ອງການແພຣນສາກົນ ປະຈຳແຂວງ, ມີຫົວໜ້າຫ້ອງການ, ຮອງຫ້ອງການຕ່າງໆອ້ອມຂ້າງເມືອງ ແລະພະນັກງານວິຊາການທີ່ກ່ຽວຂ້ອງ, ນາຍບ້ານ, ຮອງນາຍບ້ານ ເຂົ້າຮ່ວມ

ຄອບຄົວດັ່ງກ່າວໃນຈຳນວນ 153 ແມ່ນນອນຢູ່ໃນ 5 ບ້ານ ຄື: ບ້ານປີຕຽນ 18 ຄອບຄົວ, ບ້ານພໍ່ເຊັນນ້ອຍ 17 ຄອບຄົວ, ຊຶງຕະມອງ 3 ຄຸ້ມ, ມີ 84 ຄອບຄົວ, ບ້ານປຣ່ອຍຊາຍ 22 ຄອບຄົວ ແລະ ບ້ານສະບອງກົກໄຮ 12 ຄອບຄົວ ມີປະຊາກອນທັງໝົດ 1 ພັນກວ່າຄົນ, ຍິງ 500 ກວ່າຄົນ ທີ່ມີຄວາມເຂັ້ມແຂງ ແລະ ເປັນເຈົ້າການຈັດຕັ້ງປະຕິບັດວຽກງານຊຸມຊົນເປັນເຈົ້າການດ້ານສຸຂະອະນາໄມ (ຊຈສ) ແລະ ເອົາໃຈໃສ່ຫຼາຍດ້ານໃນການດຳລົງຊີວິດ ແລະ ເຮັດໃຫ້ມີສຸຂະພາບແຂງແຮງ, ຫ່າງໄກຈາກພະຍາດຕ່າງໆ, ທັງໄດ້ປະຕິບັດຕາມມາດຖານ, ເງື່ອນໄຂ ແລະ ຕົວຊີ້ບອກ ເປັນຕົ້ນ: ແມ່ນໄດ້ຜ່ານການປະເມີນ 4 ດາວ, 10 ມາດຖານ. ຜ່ານການປະເມີນຂອງຄະນະກຳມະການ ເຫັນວ່າມາດຖານເງື່ອນໄຂຄື: ເມື່ອກ່ອນປະຊາຊົນ ນຳໃຊ້ວິດຖ່າຍແມ່ນບໍ່ໄດ້ຮອດ 10% ແຕ່ປະຈຸບັນນີແມ່ນປະຕິບັດໄດ້ 100%, ການລ້າງມື້ໃສ່ສະບູ ປະຕິບັດໄດ້ 80-100%, ນໍ້າດື່ມ-ນໍາໃຊ້ຄົວເຮືອນທີ່ສະອາດ 80-96% ແລະ ອະນາໄມສິ່ງແວດລ້ອມ 82-92%. ເຊີ່ງບາງຄອບຄົວ ກໍ່ສາມາດປະຕິບັດໄດ້ 80% ຫາ 100%, ໃນແຕ່ລະມາດຖານ.

ໄລຍະຜ່ານມາ ເມືອງຕະໂອ້ຍ ສາມາດຊຸກຍູ້, ສົ່ງເສີມ ແລະ ປະກາດບ້ານ ( ຊຈສ ) ແລ້ວຈຳນວນ 37 ບ້ານ ເທົ່າກັບ 66% ຂອງຈຳນວນທັງໝົດ 56 ບ້ານ ແລະ ສະເພາະ 6 ເດຶອນທ້າຍປີ 2021 ຈະສືບຕໍ່ປະກາດໃຫ້ໄດ້ອີກ 7 ບ້ານ. ຈາກນັ້ນ ທ່ານ ນາງ ດຣ ວິລະພັນ ແກ້ວເມກ ຫົວໜ້າຫ້ອງການສາທາລະນະສຸກເມືອງ ກໍ່ໄດ້ມອບໃບຢັ້ງຢືນ ໃຫ້ແກ່ຄອບຄົວ ທີ່ໄດ້ຮັບການຢັ້ງຢືນ ເປັນຄອບຄົວຢຸດຕິການຖ່າຍຊະຊາຍ