ມື້ກ່ອນພີ່ນ້ອງທາງພາກໃຕ້ເລົ່າສູ່ຟັງວ່າ: ກ່ອນຈະເປັນບ້ານແດງຍ້ອນລູກ-ຫຼານ ກັບມາແລ້ວກັກຕົວບໍ່ຄົບກຳນົດ ເລີຍແຜ່ເຊື້ອວ່າຊັ້ນ! (ແຮງງານມາແຕ່ໄທ) ຍິນແລ້ວຜູ້ຂຽນກໍ່ກັງວົນໃຈ ເພາະຕົວເລກການຕິດເຊື້ອຫຼາຍຂື້ນສູ່ມື້ ສະນັ້ນ ພໍ່ແມ່ຜູ້ປົກຄອງ-ນາຍບ້ານບໍ່ຕ້ອງປົກປິດລູກຫຼານ ມາແລ້ວກໍ່ຕ້ອງປະຕິບັດຕາມຂັ້ນຕອນ ຂອງຄະນະສະເພາະກິດເພີ່ນວາງອອກ ຫາກບໍ່ແມ່ນໄປທ່ຽວເລາະບ້ານໃຕ້-ບ້ານເໜືອເນີ! ຮອດຍາມນີ້ຄັນສະຖາບັນຄອບຄົວ-ອຳນາດການປົກຄອງບ້ານຢ່ອນຍານມັນເຫັນຜົນທັນຕາໂລດ; ເລື່ອງນີ້ຫາກທ່ານຕິດ ຕາມຂ່າວແຜ່ເຊື້ອໃນຊຸມຊົນເບີ່ງແມ໋ ໂດຍສະເພາະແມ່ນການເລາະຂອງຜູ້ຕິດເຊື້ອບໍ່ວ່າຢູ່ເຂດແຂວງໃດ? ກໍ່ເປັນຕາຢ້ານທັງນັ້ນ ມັນສ່ຽງແທ້ເນີພີ່ນ້ອງເອີຍ! ເຫດໃດຈື່ງບໍ່ພາກັນຢ້ານກັນກົວ.

ສຳລັບຢູ່ນະຄອນຫຼວງວຽງຈັນນີ້ ກໍ່ປະກົດວ່າຢາກໂຍະຍານແລ້ວ! ຄົນອອກມາເຄື່ອນໄຫວຫຼາຍແລ້ວ; ບໍ່ສົນໃສ່ຜ້າປິດປາກ-ດັງແລ້ວ (ອ້າງວ່າສັກຢາຄົບສອງເຂັມ) ບໍ່ແມ່ນແຕ່ຢູ່ທ້ອງຕະຫຼາດ; ຫ້າງຮ້ານ; ຮ້ານກາເຟເນີ! ຢູ່ສຳນັກງານ-ອົງການກໍ່ບໍ່ໃສ່ແລ້ວ ບໍ່ທໍ່ນັ້ນຍັງເລີ່ມຊຸມແຊວເປັນຈຸ້ມເປັນຈຸ້ມ ໂດຍອ້າງວ່າບໍ່ຫຼາຍຄົນ ທຸກຄົນລ້ວນແຕ່ສັກວັກຊິນສອງເຂັມໝົດແລ້ວ!.

ໂອຍ! ຟ້າເອີຍຍິນແລ້ວ ເຫັນແລ້ວສັງມາກັງວົນໃຈແທ້ເດ! ຮອບ III ມັນຊິບໍ່ມາຢາມອີກບໍ່?.

ແພດໝໍ-ຄະນະສະເພາະກິດ ເພີ່ນເຕືອນເພີ່ນຖະແຫຼງທຸກມື້ເລື່ອງ New Normal ຂ່າວຄົນຕິດເຊື້ອເຖີງວ່າສັກວັກຊິນຄົບສອງເຂັມກໍ່ມີອອກມາໃຫ້ເຫັນເປັນຕົວຢ່າງແລ້ວ! ເຫດໃດຈື່ງບໍ່ຢ້ານກົວ ບໍ່ເຄັ່ງຄັດຕໍ່ຕົນເອງ; ຮູ້ບໍ່ວ່າການກະທຳຂອງເຮົາມັນມີຜົນຕໍ່ຄົນອ້ອມຂ້າງ ເປັນຕົ້ນຄົນຮັກ ຄົນແພງ ແລະ ສັງຄົມບ້ານເມືອງ!.

ຂໍນຳທ້ອນ ຂໍນົບ ຂໍໄຫວ້ໃຫ້ເຄັ່ງຄັດນຳກັນແດ່!

ທິດດີ