ໃນວັນທີ 2 ສິງຫາ 2021 ທີ່ພະແນກສຶກສາທິການ ແລະ ກິລາ ແຂວງຊຽງຂວາງ ໄດ້ຈັດພິທີເປີດກອງປະຊຸມຝຶກອົບຮົມກ່ຽວກັບການປົກຮັກສາມໍລະດົກໃນແຂວງຊຽງຂວາງ ໂດຍການເປັນປະທານຮ່ວມ ຂອງທ່ານ ທອງສີ ພັນທະວົງ ຮອງຫົວໜ້າພະແນກສຶກສາທິການ ແລະ ກິລາ ແຂວງງຊຽງຂວາງ ແລະ ທ່ານ ນາງ ທອງແດງ ສົມຈັນມະວົງ ຮອງເລຂາທິການ ຄະນະກຳມາທິການແຫ່ງຊາດ ເພື່ອອຸຍແນສໂກ, ຮອງຫົວໜ້າກົມພົວພັນຕ່າງປະເທດ ກະຊວງສຶກສາທິການ ແລະ ກິລາ. ພ້ອມນີ້ຍັງມີ ຕາງໜ້າພະແນນຖະແຫຼວງຂ່າວ, ວັດທະນະທຳ ແລະ ທ່ອງທ່ຽວ ແຂວງຊຽງຂວາງ, ຕາງໜ້າຫ້ອງການມໍລະດົກໂລກທົ່ງໄຫຫີນຊຽງຂວາງ, ກົມສື່ມວນຊົນ-ກົມມໍລະດົກ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ໂທລະພາບແຫ່ງຊາດລາວ, ອົງການອຸຍແນສໂກ, ຕາງໜ້າຄູອາຈານ ແລະ ນ້ອງນັກຮຽນ ຈຳນວນ 06 ໂຮງຮຽນ ຄື: ໂຮງຮຽນ ມສ ໂພນທອງ, ໂຮງຮຽນ ມສ ໂພນສະຫວັນ, ໂຮງຮຽນ ມສ ສີບຸນເຮືອງ, ໂຮງຮຽນສາມັນກິນນອນຊົນເຜົ່າ, ໂຮງຮຽນ ມສ ລາດງ່ອນ ແລະ ໂຮງຮຽນແຮັກມ່ານ ໄມເນີ ເຂົ້າຮ່ວມ ໃນລະຫວ່າງວັນທີ 2-7 ສິງຫາ 2021.

ຈຸດປະສົງແມ່ນເນັ້ນໃຫ້ຊາວໜຸ່ມ ມີສ່ວນຮ່ວມໃນການປົກປັກຮັກສາມໍລະດົກຂອງປະເທດ ກໍຄືມໍລະດົກໂລກທົ່ງໄຫຫີນແຂວງຊຽງຂວາງ ເພື່ອປູກຈິດສຳນຶກໃນການອະນຸລັກ ແລະ ປົກປັກຮັກສາມໍລະດົກທີ່ບັນພະບູລຸດປະໄວ້ໃຫ້ຄົນລຸ້ນຕໍ່ໄປໄດ້ສືບທອດ ແລະ ຊົມໃຊ້ເພື່ອໃຫ້ມີຄວາມຍືນຍົງ. ພ້ອມນີ້ ຍັງໄດ້ຝຶກອົບຮົມການສ້າງແຜ່ນພັບ ແລະ ຄຣີບວິດີໂອສັ້ນ ເພື່ອສ້າງເປັນຜະລິດຕະພັນໂຄສະນາ ແລະ ສື່ສານ ໃນການປົກປັກຮັກສາແຫຼ່ງມໍລະດົກທົ່ງໄຫຫີນຊຽງຂວາງ.

ການຝຶກອົບຮົມຄັ້ງນີ້ ຈະຊ່ວຍໃຫ້ກຸ່ມເປົ້າໝາຍຮັບຮູ້-ເຂົ້າໃຈຢ່າງເລິກເຊິ່ງ ແລະ ກວ້າງຂວາງຕໍ່ຄຸນຄ່າຂອງມໍລະດົກ, ຄວາມໝາຍຄວາມສຳຄັນໃນການອະນຸລັກ, ປົກປັກຮັກສາ ແລະ ການມີສ່ວນຮ່ວມຂອງຊາວໜຸ່ມພາຍໃນແຂວງຊຽງຂວາງ. ພ້ອມນີ້ ເພື່ອເປັນກຳລັງແຮງໃຫ້ແກ່ການພັດທະນາປະເທດຊາດ, ການກະຕຸກຊຸກຍູ້ຮັບການຊ່ວຍເຫຼືອຂອງນາງໆປະເທດຕໍ່ການປົກປັກຮັກສາ ເຊິ່ງແມ່ນບຸກຄົນໃນຊາດ ກໍຄືຄົນໃນທ້ອງຖິ່ນທີ່ເປັນເຈົ້າການໃນການປົກປັກຮັກສາ ກໍຄື ໄພຄຸກຄາມຈາກທຳມະຊາດ, ຈາກຄວາມບໍ່ສະຫງົບ, ຈາການຕໍ່ສູ້ການຍາດຊິງແກ່ງແຍ້ງ ແລະ ເກີດຈາການທ່ອງທ່ຽວທ່ອງ (ເພາະນັກທ່ອງທ່ຽວບາງກຸ່ມບໍ່ຮູ້ຄຸນຄ່າຂອງສະຖານທີ່ ຫຼື ວັດຖຸມໍລະດົກ) ເຊັ່ນ: ຫ້າມນັ່ງ, ຫ້າມຈັບບາຍ ຫຼື ປິນຂຶ້ນ, ຂີດຂຽນ ແຕ້ມຮູບ ຂຽນຕົວໜັງສື ຫຼື ຂີດສັນຍາລັກຕ່າງໆໃສ່ສະຖານທີ່ ຫຼື ວັດຖຸ ເຫຼົ່ານັ້ນ.

ໂດຍການສະໜັບສະໜູນຈາກ ອົງການອຸຍແນສໂກ ແລະ ຈັດຕັ້ງປະຕິບັດ: ຫ້ອງການເລຂາທິການ ຄະນະກຳມາທິການແຫ່ງຊາດລາວ ເພື່ອອຸຍແນສໂກ.

Medialaos MMD