ມີເດຍລາວແຂວງເຊກອງ
ປະຈຸບັນຊຸມຊົນໃນເກນອາຍຸ 18-60 ປີຢູ່ເມືອງທ່າແຕງ ແຂວງເຊກອງຈໍານວນ 2.325 ຄົນໄດ້ສັກວັກຊິນປ້ອງກັນພະຍາດໂຄວິດ 19 ສໍຳເລັດແລ້ວ ໃນຂະນະກຸ່ມເປົ້າໝາຍທົ່ວເມືອງມີ 9.828 ຄົນຈະສັກໃຫ້ສຳເລັດ 100%.

ທ່ານ ກໍລະກັນ ບຸດສະບາ ຫົວໜ້າຫ້ອງການສາທາລະນະສຸກ ຮອງປະທານຄະນະກຳມະການສະເພາະກິດ ປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ເມືອງທ່າແຕງໃຫ້ຮູ້ວ່າ: ມາຮອດປະຈຸບັນຫ້ອງການສາທາລະນະສຸກກໍຄືຄະນະກຳມະການສະເພາະກິດປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂັ້ນເມືອງໄດ້ມີຄວາມພະຍາຍາມສືບຕໍ່ເອົາໃຈໃສ່ຢ່າງຕັ້ງໜ້າໃນການປ້ອງກັນເພື່ອບໍ່ໃຫ້ພະຍາດດັ່ງກ່າວເກີດຂຶ້ນໃນຊຸມຊົນໂດຍໄດ້ຈັດຕັ້ງຈຸດກວດກັ່ນກອງ,ວັດແທກອຸນຫະພູມ,ເກັບຕົວຢ່າງ ແລະ ເກັບກຳຂໍ້ມູນຄົນເຂົ້າ-ອອກເມືອງຢ່າງເຂັ້ມງວດໂດຍຖືເອົານິຕິກຳ,ຄໍາສັ່ງ,ແຈ້ງການຂອງສູນກາງ,ແຂວງ ແລະ ເມືອງເປັນອາວຸດໃນການຈັດຕັ້ງປະຕິບັດ,ເຊິ່ງມາຮອດປະຈຸບັນຊຸມຊົນໄດ້ຮັບການສັກວັກຊິນຊີໂນຟຣາມ ( sinofharm) ແລ້ວ 3 ຄັ້ງ.

ຫົວໜ້າຫ້ອງການສາທາລະນະສຸກເມືອງທ່າແຕງຮຽກຮ້ອງໃຫ້ຊຸມຊົນເປົ້າໝາຍໃນເກນອາຍຸເອົາໃຈໃສ່ເຂົ້າຮ່ວມສັກວັກຊິນ (sinofharm)ຄັ້ງທີ 3 ຂອງຮອບທີ 2 ຫຼື ເຂັມທີ 2 ເລີ່ມແຕ່ ວັນທີ 2 – 6 ສິງຫາ ສ່ວນ ວັກຊີນ ຈອນສັນ ແອນ ຈອນສັນຈຳນວນ 3 ພັນກ່ວາ ໂດສ ຈະເລີ່ມສັກແຕ່ວັນທີ 9 ສິງຫາ 2021 ນີ້ ເປັນຕົ້ນໄປຢູ່ທີ່ເດີ່ນໂຮງໝໍເມືອງທ່າແຕງ