ທ້າຍອາທິດຜ່ານມານີ້, ໜ່ວຍພັກພະແນກແຜນການ ແລະ ການລົງທຶນ ແຂວງສາລະວັນ ໄດ້ຮັບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ຄັ້ງທີ I ປະຈໍາປີ 2020. ໂດຍການເຂົ້າຮ່ວມຂອງ ສະຫາຍ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນໍາວຽກງານການເມືອງແນວຄິດ ແລະວຽກພັກ-ພະນັກງານ, ສະຫາຍ ປອ ໂພສີ ແກ້ວສີພັນດອນ ກຳມະການພັກແຂວງ ເລຂາໜ່ວຍພັກ ຫົວໜ້າພະແນກແຜນການ ແລະ ການລົງທຶນແຂວງ, ມີສະຫາຍຮອງເລຂາໜ່ວຍພັກ, ຄະນະພັກ, ສະມາຊິກພັກ ພ້ອມດ້ວຍແຂກທີ່ຖືກເຊີນເຂົ້າຮ່ວມ.

ສະຫາຍ ບຸນລົມ ອິນສຸທາ ຮອງເລຂາໜ່ວຍພັກ ຮອງຫົວໜ້າພະແນກແຜນການ ແລະ ການລົງທຶນແຂວງ ໄດ້ຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ຜ່ານມາ ແມ່ນໄດ້ເອົາໃຈໃສ່ປະຕິບັດໜ້າທີ່ວຽກງານ ມີຜົນສຳເລັດໃນແຕ່ລະດ້ານ ທາງດ້ານດີ, ຂໍ້ຄົງຄ້າງ ແລະບົດຮຽນທີ່ຖອດຖອນໄດ້, ສາມາດປະຕິບັດໄດ້ຕາມມາດຖານເງື່ອນໄຂ ຂອງຄະນະພັກຂັ້ນເທີງວາງອອກກໍ່ຄື: ທິດທາງແຜນການຂອງໜ່ວຍພັກຕົນກໍານົດໄວ້ ແລະ ໄດ້ປະເມີນນຳພາດ້ານຄຸນທາດການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນການນຳພາ, ດ້ານປະຕິບັດໜ້າທີ່ການເມືອງ ໄດ້ເປັນຢ່າງດີ ໄດ້ຖືເອົາການສຶກສາອົບຮົມການເມືອງ-ແນວຄິດ, ເຊືີ່ອມຊຶມບັນດາມະຕິ, ຄຳສັ່ງ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ສະເເດງອອກໃນການຈັດຕັ້ງປະຕິບັດວຽກງານວິຊາສະເພາະຢູ່ບັນດາໜ່ວຍງານທີ່ຂຶ້ນກັບການນໍາພາຂອງແຕ່ລະໜ່ວຍພັກ ແນໃສ່ສ້າງໃຫ້ພະນັກງານສະມາຊິກພັກ ມີຄຸນທາດການເມືອງໜັກແໜ້ນ, ເອົາໃຈໃສ່ຕິດຕາມ, ກວດກາ ແລະ ແກ້ໄຂຜົນການດໍາເນີນຊີວິດການເມືອງດ້ວຍຄວາມຮັບຜິດຊອບສູງ, ປັບປຸງກໍ່ສ້າງໜ່ວຍພັກ ຂອງຕົນໃຫ້ມີຄວາມປອດໃສ, ເຂັັ້ມແຂງ, ໜັກແໜ້ນ ແລະເອົາໃຈໃສ່ປະຕິບັດໜ້າທີີ່ການເມືອງທີ່ຂັ້ນເທິງມອບໝາຍໃຫ້ໃນແຕ່ລະໄລຍະໃຫ້ມີຜົນສໍາເລັດ. ຈາກນັ້ນກໍ່ໄດ້ມອບໃບຢັ້ງຢືນໜ່ວຍພັກ, ປອດໃສ, ເຂັ້ມແຂງ ແລະ ໜັກແໜ້ນ ຄັ້ງທີ I ປະຈໍາປີ 2020 ໃຫ້ກັບໜ່ວຍພັກພະແນກແຜນການ ແລະ ການລົງທຶນ, ໂດຍໃຫ້ກຽດມອບຂອງ ສະຫາຍ ນາງ ບຸນທະວີ ດວງລາສີ, ຮັບໂດຍ: ສະຫາຍ ປອ ໂພສີ ແກ້ວສີພັນດອນ ພ້ອມຄະນະ.

ຕອນທ້າຍ, ທ່ານ ນາງ ບຸນທະວີ ດວງລາສີ ກໍ່ໄດ້ໂອ້ລົມ ແລະ ຊີ້ທິດເຍືອງທາງ, ກ່ອນອື່ນທ່ານກໍ່ໄດ້ສະແດງຄວາມຍ້ອງຍໍຊົມເຊີຍຄະນະໜ່ວຍພັກ ແລະ ສະມາຊິກພັກ ທີ່ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານຈົນໄດ້ຮັບຜົນສຳເລັດຫຼາຍດ້ານ, ພ້ອມທັງເນັ້ນໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດ, ເຊື່ອມຊຶມບັນດາມະຕິ, ຄຳສັ່ງ ແລະເອກະສານສຳຄັນຕ່າງໆຂອງພັກຂອງຊາດ ໃຫ້ແກ່ສະມາຊິກພັກ-ພະນັກງານລັດຖະກອນໃນຄວາມຮັບຜິດຊອບຂອງຕົນ, ເອົາໃຈໃສ່ກໍ່ສ້າງ, ປັບປຸງ, ແບບແຜນການນຳພາ, ແບບແຜນວິທີເຮັດວຽກໃຫ້ເປັນປົກກະຕິ ແລະ ມີຄຸນນະພາບ ແລະ ສືບຕໍ່ຍົກສູງບົດບາດການນຳພາຂອງພັກ ແລະຄວາມເປັນແບບຢ່າງນຳໜ້າຂອງສະມາຊິກພັກໃຫ້ຄື່ອນໄຫວຕາມພາລະບົດບາດ, ສິດ ແລະໜ້າທີ່ຂອງຕົນໃຫ້ມີຜົນສຳເລັດ.
ຂ່າວ: ທິດລານີ ໂຄດໂຍທາ.