ກອງປະຊຸມ ສະຫຼຸບວຽກງານ 6 ເດືອນຕົ້ນປີ 2021 ຂອງອົງການໄອຍະການ ປະຊາຊົນ ແຂວງອຸດົມໄຊ ຈັດຂຶ້ນໃນທ້າຍອາທິດຜ່ານມາ ທີ່ຫ້ອງປະຊຸມຂອງຕົນ ໂດຍການເປັນປະທານຂອງ ທ່ານ ບຸນທ່ຽງ ວິໄລວົງ ຫົວຫນ້າອົງການ ໄອຍະການ ປະຊາຊົນ ແຂວງອຸດົມໄຊ.

ໃນກອງປະຊຸມ ໄດ້ຮັບຟັງການລາຍງານສະພາບລວມການຈັດຕັ້ງປະຕິບັດວຽກງານຮອບດ້ານ ໃນໄລຍະ 6 ເດືອນຕົ້ນປີ 2021 ບົດສະຫລຸບໄດ້ຍົກໃຫ້ເຫັນ ດ້ານດີ, ຜົນງານ ແລະ ດ້ານອ່ອນ, ຂໍ້ຄົງຄ້າງ ຂອງການເຄື່ອນໄຫວວຽກງານແຕ່ລະດ້ານຂອງອົງການໄອຍະການ ດ້ານການເມືອງແນວຄິດ, ຈັດຕັ້ງ, ພັກ – ພະນັກງານ, ວຽກງານວິຊາສະເພາະ ແລະ ວຽກງານຫ້ອງການ. ໃນນັ້ນ ແມ່ນການເຄື່ອນໄຫວວຽກງານວິຊາສະເພາະ ເປັນຕົ້ນແມ່ນ ການແກ້ໄຂຄຳຮ້ອງ ແລະ ຄະດີ ເຊິ່ງຜ່ານມາມີຄຳຮ້ອງຂອງພົນລະເມືອງ ສະເຫນີຜ່ານການຈັດຕັ້ງເຂົ້າມາ ອົງການໄອຍະການ ປະຊາຊົນແຂວງ ທັງຫມົດ ຈຳນວນ 44 ສະບັບ ສາມາດແກ້ໄຂໄດ້ ຈຳນວນ 43 ສະບັບ ແລະ ພວມຄົ້ນຄວ້າແກ້ໄຂ ຈຳນວນ 1 ສະບັບ, ມີຄະດີເກີດຂຶ້ນທັງຫມົດ 85 ເລື່ອງ, ຄະດີອາຍາ 80 ເລື່ອງ ແລະ ຄະດີແພ່ງ 5 ເລື່ອງ ສາມາດແກ້ໄຂຄະດີຂັ້ນຕົ້ນໄດ້ແລ້ວ ຈຳນວນ 72 ເລື່ອງ, ຍັງຄ້າງພວມແກ້ໄຂ 13 ເລື່ອງ, ການແກ້ໄຂຄະດີ ຂັ້ນອຸທອນ ສາມາດປະຕິບັດໄດ້ ຈຳນວນ 7 ເລື່ອງ ແລະ ພວມແກ້ໄຂ 1 ເລື່ອງ. ນອກນັ້ນ ຍັງຍົກໃຫ້ເຫັນເຖິງການແກ້ໄຂຄໍາຮ້ອງ ແລະ ຄະດີ ຂອງອົງການ ໄອຍະການເຂດ ເຊິ່ງໄລຍະ 6 ເດືອນຜ່ານມາ ອົງການໄອຍະການເຂດສາມາດແກ້ໄຂຄໍາຮ້ອງ ໄດ້ທັງຫມົດ 5 ສະບັບ ເທົ່າກັບ 100%, ແກ້ໄຂຄະດີ ໄດ້ທັງຫມົດ 39 ເລື່ອງ ໃນນັ້ນ ຄະດີອາຍາ 24 ເລື່ອງ ແລະ ຄະດີ ແພ່ງ 15 ເລື່ອງ, ຍັງຄ້າງ ພວມແກ້ໄຂ 1 ເລື່ອງ. ສ່ວນວຽກງານ ວິຊາສະເພາະດ້ານອື່ນໆ ໂດຍສະເພາະແມ່ນ ວຽກງານຕິດຕາມ, ກວດກາ ການປະຕິ ບັດຄຳຕັດສິນຂອງສານ, ຄຳຖະແຫລງຂອງອົງການໄອຍະການ ປະຊາຊົນເຂດ, ການເກັບກຳສະຖິຕິອາຊະຍາກຳ,ການປະຕິບັດກົດຫມາຍຂອງອົງການສືບສວນ-ສອບສ່ວນ, ການປະຕິບັດກົດຫມາຍຢູ່ຄ້າຍຄຸມຂັງ-ດັດສ້າງ ກໍໄດ້ເຄື່ອນໄຫວ ແລະ ມີຜົນສຳເລັດຕາມແຜນການທີ່ໄດ້ກຳນົດໄວ້ ແລະ ມີບາງຫນ້າວຽກທີ່ຍັງຈັດຕັ້ງປະຕິບັດບໍ່ທັນໄດ້ດີ ເຊິ່ງມັນສະແດງອອກ ຄື: ການປະຕິບັດແຜນງານ, ໂຄງການ, ການແກ້ໄຂຄະດີ, ຄຳຮ້ອງ ຍັງຊັກຊ້າ, ບໍ່ທັນຕາມກຳນົດເວລາ, ມີແຕ່ປະລິມານ ຍັງຄຸນນະພາບ, ການຕິດຕາມ, ກວດກາ ການປະຕິບັດກົດຫມາຍ ຍັງບໍ່ທັນເຂັ້ມແຂງຢູ່ໃນບາງຂົງເຂດ ໂດຍສະເພາະແມ່ນ ເຈົ້າຫນ້າທີ່ພາສີ ແລະ ປ່າໄມ້ຍັງເຮັດບໍ່ທັນໄດ້.

ນອກຈາກການສະຫຼຸບວຽກງານ 6 ເດືອນຕົ້ນປີ 2021 ແລ້ວ ກອງປະຊຸມ ຍັງໄດ້ຜ່ານແຜນ ການເຄື່ອນໄຫວໃນໄລຍະ 6 ເດືອນ ທ້າຍປີ 2021 ເພື່ອເປັນບ່ອນອີງໃນການຈັດຕັ້ງປະຕິບັດວຽກງານໃຫ້ມີປະສິດທິພາບ ແລະ ມີຜົນສຳເລັດ. ກອງປະຊຸມ ມີ ຄະນະ, ຫົວຫນ້າ, ຮອງຫົວຫນ້າຂະແຫນງ ຕະຫລອດຮອດພະນັກງານ-ລັດຖະກອນ ພາຍໃນອົງການໄອຍະການ ປະຊາຊົນແຂວງ ແລະ ອົງການໄອຍະການປະຊາຊົນເຂດ ເຂົ້າຮ່ວມ.

ພາບ-ຂ່າວ: ແສງອາທິດ