ວັນທີ 2 ສິງຫານີ້ ທີ່ສະໂມສອນເມືອງໄຊ ສ່ວຍສາອາກອນປະຈຳແຂວງອຸດົມໄຊ ໄດ້ຈັດພິທີເປີດຂະບວນການເດີນສຳຫຼວດກຳນົດເງື່ອນໄຂການຈັດແບ່ງຂະໜາດຂອງວິສາຫະກິດທົ່ວແຂວງອຸດົມໄຊ ໂດຍການເປັນປະທານຂອງ ທ່ານ ປອ ສຸລິຍາ ສຸພິທັກ ກຳມະການພັກແຂວງ, ຫົວໜ້າພະແນກການເງິນ ແຂວງອຸດົມໄຊ, ມີ ທ່ານ ຍົມມະລາ ວໍລະຈິດ ຫົວໜ້າສ່ວຍສາອາກອນປະຈຳແຂວງ, ມີກໍາມະການພັກເມືອງ, ຫົວຫນ້າ, ຮອງຫົວຫນ້າຫ້ອງການ, ຄະນະກໍາມະການ ທີ່ເດີນສໍາຫຼວດຖານຂໍ້ມູນລາຍຮັບຂັ້ນແຂວງ-ຂັ້ນເມືອງ, ຄະນະສ່ວຍສາອາກອນ 6 ເມືອງ ຕະຫຼອດຮອດ ອົງການປົກຄອງບ້ານ 24 ບ້ານໃນເທດສະບານເມືອງໄຊ ເຂົ້າຮ່ວມ.

        ຈຸດປະສົງການເດີນສໍາຫຼວດໃນຄັ້ງນີ້ ແມ່ນເພື່ອຮັບປະກັນໃຫ້ແກ່ການຈັດຕັ້ງປະຕິບັດການກໍານົດເງື່ອນໄຂການຈັດແບ່ງຂະຫນາດຂອງວິສາຫະກິດໃຫ້ເປັນເອກະພາບໃນຂອບເຂດທົ່ວແຂວງ ແລະ ສ້າງຄວາມສະດວກໃນການຄຸ້ມຄອງ, ກວດກາ ແລະ ຕິດຕາມ ການເກັບລາຍຮັບສ່ວຍສາອາກອນ ພ້ອມທັງຊຸກຍູ້ຫົວຫນ່ວຍວິສາຫະກິດ ເຂົ້າສູ່ລະບົບອາກອນມູນຄ່າເພີ່ມ ໂດຍສອດຄ່ອງຕາມທິດທາງ, ແນວທາງນະໂຍບາຍຂອງພັກ-ລັດຖະບານ ກໍຄື ກະຊວງການເງິນວາງອອກ ບົນພື້ນຖານຖືກຕ້ອງຕາມກົດຫມາຍ ແລະ ລະບຽບການໄດ້ກໍານົດ, ຫລຸດຜ່ອນຊ່ອງຫວ່າງການສວຍໂອກາດຕ່າງໆ ແລະ ຫາງສຽງຂອງສັງຄົມໃຫ້ຫຼຸດລົງເທື່ອລະກ້າວ ແລະ ຫັນເຂົ້າສູ່ການປະຕິບັດລະບຽບກົດຫມາຍໃຫ້ຫຼາຍຂຶ້ນ. ຄຽງຄູ່ກັນນັ້ນຍັງເປັນການປຸກລະດົມ ແລະ ສ້າງຄວາມເຂົ້າໃຈໃຫ້ແຕ່ລະພາກສ່ວນຈະເປັນຂະແຫນງສ່ວຍສາອາກອນ, ຂະແຫນງການທີ່ກ່ຽວຂ້ອງ, ອົງການປົກຄອງທ້ອງຖິ່ນ ຕະຫຼອດຮອດຫົວຫນ່ວຍວິສາຫະກິດ ຮັບຮູ້ການຫັນເປັນທັນສະໄຫມໃນການແຈ້ງມອບພັນທະອາກອນ ແລະ ພັນທະອື່ນໆຜ່ານລະບົບທະນາຄານດ້ວຍຕົນເອງໃຫ້ຫຼາຍຂຶ້ນ ເພື່ອຫຼຸດຜ່ອນການຊໍາລະເປັນເງິນສົດ ແນໃສ່ການຈັດເກັບລາຍຮັບໃນທ້າຍປີນີ້ໃຫ້ບັນລຸຕາມແຜນການ. ການເດີນສຳຫລວດຄັ້ງນີ້ ຈະໃຊ້ເວລາ 1 ເດືອນຈິ່ງສຳເລັດ.

ພາບ-ຂ່າວ: ແສງອາທິດ