ມີເດຍ/າວແຂວງຜົ້ງສາລີ ຂ່າວໂດຍ : ເຢັ່ງ ວົງແຫວນ ປກສ ເມືອງໃໝ່
ຕອນແລງຂອງວັນທີ 02 ສິງຫາ 2021 ທີ່ກອງບັນຊາການ ປ້ອງກັນຄວາມສະຫງົບເມືອງໃໝ່ ໄດ້ເປີດກອງປະຊຸມ ຄະນະກໍາມະການ ແກ້ໄຂປະກົດການຫຍໍ້ທໍ້ ແລະ ຄວບຄຸມຢາເສບຕິດຂັ້ນເມືອງ ຂຶ້ນຢ່າງເປັນທາງການ ໂດຍການເປັນປະທານຂອງທ່ານ ດຣ ພອນສະຫວັນ ມະນິວົງສີ ກໍາມະການພັກເມືອງ, ຮອງເຈົ້າເມືອງ ຜູ້ຊິ້ນໍາວຽກງານວັດທະນາທໍາ-ສັງຄົມ ມີບັນດາຄະນະກໍາມະການ, ເລຂາຊ່ວຍວຽກ ທີ່ຖືກແຕ່ງຕັ້ງເຂົ້າຮ່ວມທັງໝົດ 14 ສະຫາຍ, ຍິງ 03 ສະຫາຍ.

ໃນກອງປະຊຸມທ່ານ ພັນໂທ ຫົງຄຳ ສັດສະດີ ກຳມະການປະຈຳພັກເມືອງ ເລຂາຄະນະພັກຮາກຖານ, ຫົວໜ້າກອງບັນຊາການ ປກສ ເມືອງໃໝ່. ໄດ້ຂຶ້ນຜ່ານຂໍ້ຕົກລົງ ເຈົ້າເມືອງ ສະບັບເລກທີ 237/ຈມ, ລົງວັນທີ 02 ສິງຫາ 2021. ວ່າດ້ວຍການແຕ່ງຕັ້ງຄະນະກໍາມະການຮັບຜິດຊອບຊິ້ນໍາວຽກງານ ແກ້ໄຂປະກົດການຫຍໍ້ທໍ້ ແລະ ຂໍ້ຕົກລົງ ເຈົ້າເມືອງ ສະບັບເລກທີ 239/ຈມ, ລົງວັນທີ 02 ສິງຫາ 2021. ວ່າດ້ວຍການແຕ່ງຕັ້ງຄະນະກໍາມະການກວດກາ ແລະ ຄວບຄຸມຢາເສບຕິດ. ທັງ 02 ເນຶ້ອໃນຂໍ້ຕົກລົງ ຍັງໄດ້ຊິ້ແຈ້ງໃຫ້ບັນດາຄະນະກໍາມະການຮູ້ເຖິງພາລະບົດບາດ ສິດ ແລະ ໜ້າທີ່ ກ່ຽວກັບການຄວບຄຸມຢາເສບຕິດ ແລະ ແກ້ໄຂປະກົດການຫຍໍ້ທໍ້ ນັບແຕ່ເມືອງລົງຮອດຂັ້ນບ້ານ. ເພື່ອແນ່ໃສ່ການຄົ້ນຄວ້າ ແລະ ຈັດຕັ້ງຜັນຂະຫຍາຍນີຕິກໍາ ທີ່ພົວພັນເຖິງບັນຫາຢາເສບຕິດ, ປະກົດການຫຍໍ້ທໍ້ຂອງເມືອງ, ຂອງຄະນະກໍາມະການແຫ່ງຊາດລາວ. ພ້ອມດຽວກັນນັ້ນ ສະຫາຍຍັງໄດ້ຜ່ານເອກະສານ ນີຕິກໍາ ການສະກັດກັ້ນຕ້ານຢາເສບຕິດ ແລະ ແກ້ໄຂປະກົດການຫຍໍ້ທໍ້ ແຕ່ສູນກາງລົງມາຮອດທ້ອງຖິ່ນ ໃຫ້ບັນດາອະນຸກໍາມະການເຂົ້າໃຈຢ່າງຈະແຈ້ງ ແລະ ນໍາໄປຈັດຕັ້ງປະຕິບັດໃຫ້ປະກົດຜົນເປັນຈິງ. ຈາກນັ້ນ ທ່ານຍັງໄດ້ເຊີນໃຫ້ແຕ່ລະພາກສວ່ນມີຄໍາເຫັນຕໍ່ກອງປະຊຸມ ຄົ້ນຄວ້າ ເອກະພາບ ຕາມແຜນງານ, ໂຄງການ ທີ່ຈະສຸມໃສ່ແກ້ໄຂປະກົດການຫຍໍ້ທໍ້ໃນຕໍ່ໜ້າຢ່າງກົງໄປກົງມາ.

ຕອນທ້າຍກອງປະຊຸມຍັງໄດ້ຮັບຟັງຈາກການໂອ້ລົມຂອງທ່ານປະທານກອງປະຊຸມ ເຊິ່ງທ່ານໄດ້ເໜັ້ນໜັກບາງເນຶ້ອໃນຈິດໃຈ ເປັນຕົ້ນແມ່ນໃຫ້ ອະນຸກໍາມະການ ສ້າງແຜນລົງ ໂຄສະນາ ສຶກສາອົບຮົມ, ປຸກຈິດສໍານຶກ, ເຜີຍແຜ່ອະທິບາຍຜົນຮ້າຍ, ຄວາມອັນຕະລາຍ ຂອງຢາເສບຕິດ, ຊິ້ນໍາຊຸກຍູ້ ການຈັດຕັ້ງປະຕິບັດວຽກງານກວດກາ ແລະ ຄວບຄຸມຢາເສບຕິດ, ຕິດຕາມ ແລະ ແກ້ໄຂສະພາບການລັກລອບປູກຝິ່ນ ແລະ ການຊົມໃຊ້ຢາເສບຕິດປະເພດຕ່າງໆ ພ້ອມທັງສະກັດກັ້ນປະກົດການຫຍໍ້ທໍ້ທີ່ຈະເກີດຂຶ້ນດ້ວຍຫຼາຍຮູບແບບໃນສະເພາະໜ້າ ແລະຍາວນານ ພາຍໃນເມືອງໃຫ້ມີຄວາມຫຼຸດນ້ອຍຖອຍລົງເທື່ອລະກ້າວ