ມີເດຍລາວແຂວງຫຼວງພະບາງ
ວັນທີ 30 ກໍລະກົດ 2021 ນີ້, ຢູ່ທີ່ສະໂມສອນຂອງເມືອງຈອມເພັດ ກອງບັນຊາການປກສແຂວງຫຼວງພະບາງ ໄດ້ຈັດກອງປະຊຸມສະຫຼຸບວຽກງານປ້ອງກັນ ໂຄງການກໍ່ສ້າງເສັ້ນທາງລົດໄຟລາວ-ຈີນ ປະຈຳ. 6 ເດືອນຕົ້ນປີ ແລະທິດທາງແຜນການ 6 ເດືອນ ທ້າຍປີ 2021 ຂື້ນ, ໂດຍການເປັນປະທານ ຂອງສະຫາຍ ພັນເອກ ທາ ລຽນປະດິິດ ຮອງກອງບັນຊາການປກສແຂວງ ຫຼວງພະບາງ ມີຄະນະຊີ້ນໍາໂຄງການ, ອານຸກໍາມະການປ້ອງກັນ, ຄະນະຮັບຜິດຊອບປະສານງານຂັ້ນເມືອງ 3 ເມືອງຄື: ນະຄອນຫຼວງພະບາງ, ເມືອງຈອມເພັດ ແລະ ເມືອງຊຽງເງິນເຂົ້າຮ່ວມ.

ສະຫາຍ ພັນໂທ ບຸນມີ ຄູນມະນີ ຮອງກອງພົນເຄື່ອນທີ່ແຂວງຫຼວງພະບາງ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດວຽກງານປ້ອງກັນໂຄງການກໍ່ສ້າງເສັ້ນທາງລົດໄຟລາວ-ຈີນ ໃນໄລຍະ 6 ເດືອນຜ່ານມາ, ຊຶ່ງຄະນະຮັບຜິດຊອບ ແລະ ກໍາລັງປ້ອງກັນຢູ່ແຕ່ລະຈຸດ ແມ່ນໄດ້ເອົາໃຈໃສ່ເຄື່ອນໄຫວເຮັດໜ້າທີ່ໃນການປ້ອງກັນເວນຍາມ ຕາມສະຖານທີ່ພັກເຊົາ, ແຄ້ມທີ່ພັກ, ອຸມົງແລະ ສະຖານທີ່ກໍ່ສ້າງຕ່າງໆ ເພື່ອຮັບປະກັນໄດ້ຄວາມສະຫງົບປອດໄພໂດຍພື້ນຖານ, ຈັດຕັ້ງກໍາລັງກຽມພ້ອມສູ້ຮົບ ຕະຫຼອດ 24 ຊົ່ວໂມງ, ໃນນັ້ນ, ໄດ້ອອກລາດຕະເວນຕາມອຸໂມງ ແລະ ສະຖານທີ່ຕ່າງໆ ໄດ້ 46 ຄັ້ງ, ປ້ອງກັນກໍາມະກອນ ຈີນ-ລາວ ຮຽກຮ້ອງຄ່າແຮງງານ ຈໍານວນ 5 ຄັ້ງ, ປ້ອງກັນການນໍາຂັ້ນສູງຂອງຈີນ ແລະ ລາວ ລົງຢ້ຽມຢາມ ແລະ ເຮັດວຽກຢູ່ຈຸດບ້ານພອນໄຊ ນະຄອນ ຫຼວງພະບາງ 1 ຄັ້ງ, ເກີດມີຄົນບໍ່ດີລັກຊັບລວມໜູ່ຈໍານວນ 14 ຄັ້ງ, ກັກຕົວ 19 ຄົນ, ກັກລົດຮຸນໄດ 5 ຄັນ; ໄດ້ເຮັດບົດບັນທຶກສຶກສາອົບຮົມ ແລະໄກ່ເກ່ຍຢູ່ຂັ້ນເຈົ້າໜ້າທີ່ ແລະ ບໍລິສັດ ສໍາເລັດແລ້ວ 4 ລາຍ,

ແຜນໃນຕໍ່ໝ້າຈະສືບຕໍ່ສືກສາອົບຮົມການເມືອງ ນຳແນວຄິດໃຫ້ແກ່ອ້າຍນ່ອງເປັນປົກກະຕິ ຈະປະຕິບັດ ແລະຊັບຊ້ອນບັນດາຈຸດທີ່ມີຄວາມຈຳເປັນຄືນໃໜ່ ແລະຈະມີນະໂຍບາຍໃຫ້ພະນັກງານ-ນັກຮົບຜູ້ທີ່ມີຄວາມຫ້າວຫັນບຸກບືນຕໍ່ໝ້າທີ່ວຽກງານ ຈະສືບຕໍ່ສານສົມທົບກັບກອງບັນຊາການທະຫານແຂວງ ,ຫ້ອງເສນາ ແລະຄະນະປະສານງານຂັ້ນແຂວງລົງກວດກາຈຸດຫຼໍ່ແຫຼມຕາມແລວທາງລົດໄຟຄືນໃໝ່, ຈາກນັ້ນ, ບັນດາກົມກອງທີ່ເຂົ້າຮ່ວມກອງປະຊຸມ ກໍ່ໄດ້ພັດປ່ຽນກັນລາຍງານການຈັດຕັ້ງປະຕິບັດ ການເຄື່ອນໄຫວວຽກງານປ້ອງກັນເວນຍາມ ໃນຂອບເຂດຄວາມຮັບຜິດຊອບຂອງຕົນ ເພື່ອຍົກໃຫ້ເຫັນ ຂໍ້ດີ, ຂໍ້ສະດວກ, ຂໍ້ຫຍຸ້ງຍາກ ແລະ ວິທີການແກ້ໄຂໃນຕໍ່ໜ້າ ຮັບປະກັນໃຫ້ວຽກງານປ້ອງກັນໂຄງການກໍ່ສ້າງເສັ້ນທາງລົດໄຟລາວ-ຈີນ ໃຫ້ມີຄວາມສະຫງົບປອດໄພ.
ໂອກາດດັ່ງກ່າວນີ້ສະຫາຍ ພັນເອກ ທາ ລຽນປະດິິດ ຮອງກອງບັນຊາການປກສແຂວງ ຫຼວງພະບາງ ໄດ້ຮຽກຮ້ອງມາຍັງແຕ່ລະກົມກອງ ທີ່ເຮັດໜ້າທີ່ປ້ອງກັນ ໂຄງການກໍ່ສ້າງເສັ້ນທາງລົດໄຟລາວ-ຈີນ ຕ້ອງປະຕິບັດ ຕາມທິດຊີ້ນໍາຂອງຂັ້ນເທີງໃຫ້ເຂັ້ມງວດ ເປັນຕົ້ນ, ເອົາໃຈໃສ່ການປ້ອງກັນ ເວນຍາມຕາມແຕ່ລະຈຸດ, ປົກປັກຮັກສາພາຫະນະຮັບໃຊ້ທີ່ຂັ້ນເທີງປະກອບໃຫ້ ບໍ່ໃຫ້ເປ່ເພ ແລະ ນໍາໃຊ້ໃຫ້ຍາວນານ.
ຂ່າວ: ນາງ ຕາດໍາ ກະເສີມສຸກ