ມີເດຍລາວແຂວງສາລະວັນ ພາບ-ຂ່າວ: ທິດລານີ ໂຄດໂຍທາ.
ເນື່ອງຈາກແຮງງານລາວ ຍັງສືບຕໍ່ເດີນທາງກັບບ້ານເປັນຈຳນວນຫຼວງຫຼາຍ ແລະ ຕໍ່ເນື່ອງໃນແຕ່ລະວັນ, ເຊີ່ງອາດເຮັດໃຫ້ການນຳໃຊ້ສູນກັກກັນ, ຈຳກັດບໍລິເວນເຕັມກັບຈຳນວນທີ່ຖືກຮອງຮັບໄດ້ແລ້ວ. ມາໃນວັນທີ 1 ສີງຫາ 2021 ທີ່ຫ້ອງວ່າການແຂວງ, ຄະນະສະເພາະກິດໂຄວິດ-19 ແຂວງສາລະວັນ ໄດ້ປືກສາຫາລືກຽມຂະຫຍາຍສູນຈຳກັດບໍລິເວນເພີ່ມອີກ, ໂດຍການເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງ ຫົວໜ້າຄະນະສະເພາະກິດໂຄວິດ-19ພ້ອມດ້ວຍຄະນະສະເພາະກິດຂັ້ນແຂວງ ແລະ ເມືອງເຂົ້າຮ່ວມ.

ທ່ານ ສົມໃຈ ອຸ່ນຈິດ ຮອງເຈົ້າແຂວງ ຫົວໜ້າຄະນະສະເພາະກິດໂຄວິດ-19 ແຂວງ ໄດ້ເນັ້ນໃຫ້ຄະນະສະເພາະກິດຂັ້ນແຂວງ ແລະ ເມືອງ ປະເມີນສະຖານະການຢ່າງລະອຽດ, ກຽມແຜນຮອງຮັບຢ່າງຮີບດ່ວນ ຕໍ່ກັບການປະຕິບັດວຽກງານປ້ອງກັນພະຍາດໂຄວິດ-19 ເປັນຕົ້ນ: ກຽມດ້ານງົບປະມານ, ບຸກຄະລາກອນ,ເຈົ້າໜ້າທີ່,ທີມແພດ,ຢາ,ອຸປະກອນຮັບໃຊ້ ແລະ ສະຖານທີ່ກັກບໍລິເວນ ໃຫ້ສາມາດຮອງຮັບແຮງງານທີ່ຈະກັບມາ ໄດ້ຢ່າງພຽງພໍ.

ພ້ອມທັງສຸມໃສ່ການປີ່ນປົວ ຜູ້ທີ່ຕິດເຊື້ອພະຍາດໂຄວິດ-19 ໃຫ້ຫາຍດີ ແລະ ການປະຕິບັດຫຼັງໄດ້ຮັບການປີ່ນປົວຫາຍດີແລ້ວ ຮັບປະກັນຄວາມປອດໄພ ຄຽງຄູ່ກັນນີ້ ກໍ່ຕ້ອງເອົາໃຈໃສ່ໂຄສະນາ, ປະຊາສໍາພັນ ໃຫ້ປະຊາຊົນ ຮັບຮູ້ ແລະ ເຂົ້າໃຈກ່ຽວກັບມາດຕະການຕ່າງໆ ໃນການປ້ອງກັນການແຜ່ເຊື້ອພະຍາດໂຄວິດ-19 ບໍ່ໃຫ້ແຜ່ລາມອອກສູ່ວົງກວ້າງ.ທັງໄດ້ເນັ້ນໃຫ້ເອົາໃຈໃສ່ໃນການຕິດຕາມຂໍ້ມູນຂ່າວສານຕ່າງໆໃນສື່ສັງຄົມອອນລາຍ ອາດຈະເປັນການສ້າງຄວາມປັ່ນປວນ, ຮັບຮູ້ຂໍ້ມູນຂ່າວສານທີ່ຜິດ ແລະ ເຮັດໃຫ້ສັງຄົມ ແຕກຕື່ນ, ວິຕົກກັງວົນ ໃຫ້ຮີບຮ້ອນແກ້ຂ່າວ ແລະ ຊີ້ແຈງໃຫ້ສັງຄົມ ຮັບຮູ້, ເຂົ້າໃຈ, ເພີ່ມທະວີໂຄສະນາວຽກງານດ້ານສຸຂະສຶກສາ, ຊິດພົ່ນຢາຂ້າເຊື້ອສູນກັກບໍລິເວນ ແລະ ຈຸດທີ່ສ່ຽງອື່ນໆ ເພື່ອຕ້ານ ແລະ ສະກັດກັ້ນໃນທຸກຮູບແບບການແຜ່ລະບາດຂອງພະຍາດໂຄວິດ-19, ສືບຕໍ່ປະຕິບັດການສັກວັກຊິນ ສ້າງພູມຄຸມກັນຕໍ່ພະຍາດໂຄວິດ-19 ໃນທົ່ວສັງຄົມ.