ກອງປະຊຸມເຜີຍແຜ່ເນື້ອໃນປື້ມຄູ່ມືສື່ມວນຊົນ ກັບສິດທິເດັກ ໃຫ້ແກ່ສືື່ມວນຊົນ 4 ແຂວງພາກເໜືອ ຂື້ນໃນວັນທີ 4 ສີງຫາ 2021 ນີ້ ທີ່ຫ້ອງປະຊຸມພະແນກ ຖວທ ແຂວງອຸດົມໄຊ ໂດຍ ມີທ່ານ ປີ່ນປາຖະໜາ ພັນທະມາລີ ຮອງປະທານສະມາຄົມນັກຂ່າວແຫ່ງ ສປປລາວ, ທ່ານ ວັນນະສີນ ສີມມະວົງ ຮອງຫົວໜ້າກົມສື່ມວນຊົນ, ທ່ານ ມະຫາໄຊ ເກດບຸນທັນ ຮອງຫົວໜ້າພະແນກ ຖວທ ແຂວງອຸດົມໄຊ, , ພ້ອມດ້ວຍນັກຂ່າວຈາກແຂວງຜົ້ງສາລີ, ຫຼວງນ້ຳທາ, ແຂວງບໍ່ແກ້ວ, ແຂວງອຸດົມໄຊ ພ້ອມດ້ວຍນັກຂ່າວ ນັກຈັດລາຍການຈາກລາຍການເປີດໃຈໄວໜຸ່ມແຂວງອຸດົມໄຊເຂົ້າຮ່ວມ.

ໃນໂອກາດກ່າວເປີດກອງປະຊຸມ ທ່ານ ປີ່ນປາຖະໜາ ພັນທະມາລີ ກໍ່ໄດ້ມີຄຳເຫັນຕໍ່ກອງປະຊຸມ ໂດຍລວມທ່ານໄດ້ຍົກໃຫ້ເຫັນຄວາມໝາຍຄວາມສຳຄັນຂອງການຈັດກອງປະຊຸມຄັ້ງນີ້ ໃນທາມກາງທີ່ທົ່ວໂລກພວມປະເຊີນກັບການລະບາດຂອງພະຍາດໂຄວິດ-19, ການຈັດຕັ້ງປະຕິບັດກ່ຽວກັບສິດທິເດັກ ໃນສົນທີສັນຍາ ເພື່ອເຮັດໃຫ້ເດັກນ້ອຍລາວໄດ້ຮັບສິດໃນການປົກປ້ອງ ສິດໃນການຢູ່ລອດ, ສິດທິໃນການມີສ່ວນຮ່ວມ, ສິດໃນການພັດທະນາ ເຊີ່ງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຮ່ວມກັບອົງການຢູນີເຊບ ສ້າງປື້ມສື່ມວນຊົນ ກັບສິດທິເດັກຂື້ນ, ໄດ້ກຳນົດກົດໝາຍລະບຽບການຕ່າງໆ ກ່ຽວກັບເດັກ, ໄດ້ສ່ອງແສງຊີວິດຕົວຈີງຂອງເດັກໃນການປົກປ້ອງ ໄດ້ຮັບການພັດທະນາ ຈາກປະເທດຊາດ ຈາກຜູ້ປົກຄອງຈາກສັງຄົມ ແລະ ຈາກສາກົນ.

ປື້ມສື່ມວນຊົນ ກັບ ສິດທິເດັກຫົວນີ້ ໄດ້ສັງລວມເອົາບັນຫາສໍາຄັນຕ່າງໆ ທີ່ສອດຄ່ອງ ກັບສົນທິສັນຍາວ່າດ້ວຍສິດທິເດັກ ແລະ ນິຕິກໍາທີ່ກ່ຽວຂ້ອງມາຜັນຂະຫຍາຍເປັນຄໍາແນະນໍາ ການລາຍງານ ເພື່ອຊ່ວຍໃຫ້ສື່ມວນຊົນລາວ ທີ່ເຮັດໜ້າທີ່ລາຍງານຂ່າວ ກ່ຽວກັບເດັກຕ້ອງໄດ້ຄໍານຶງເຖິງສິດທິເດັກຕະຫຼອດ. ນອກຈາກນັ້ນຍັງໄດ້ລວມເອົາຄຳແນະນຳ ຫົວຂໍ້ທີ່ອາດ ຈະເປັນຂ່າວ ໄດ້ຕະຫຼອດ ພ້ອມທັງແນະນຳສິ່ງທີ່ຕ້ອງກວດກ່ອນເຜີຍແຜ່ (ສິ່ງເຕືອນໃຈກ່ອນເຜີຍແຜ່ຂ່າວ) ສິ່ງທີ່ກ່າວມານັ້ນ ໄດ້ສະແດງໃຫ້ເຫັນເຖິງການປົກປ້ອງ ແລະ ສົ່ງເສີມສິດທິເດັກຂອງສື່ມວນຊົນ ໂດຍມີຈຸດປະສົງຕົ້ນຕໍແມ່ນເພື່ອໃຫ້ສື່ມວນຊົນ ລາຍງານຂ່າວກ່ຽວກັບເດັກດ້ວຍຄວາມຮັບຜິດຊອບ, ມີຄວາມຖືກຕ້ອງ, ສອດຄ່ອງກັບສົນທິສັນຍາວ່າດ້ວຍສິດທິເດັກກົດໝາຍ, ລະບຽບການ, ຫຼັກການໃນການປົກປ້ອງ, ສົ່ງເສີມສິດທິເດັກ ແລະ ຊ່ວຍໃຫ້ເດັກໄດ້ມີບົດບາດໃນສື່ມວນຊົນ. ນອກນີ້ຜູ້ເຂົ້າຮ່ວມກອງປະຊຸມຍັງຈະໄດ້ຮຽນຮູ້ກ່ຽວກັບເນື້ອໃນຕົ້ນຕໍໃນການລາຍງານຂ່າວກ່ຽວກັບເດັກ, ເດັກ ແລະ ການຖືກຈຳແນກ, ເດັກກັບຄອບຄົວທີ່ມີບັນຫາ, ແຮງງານເດັກ, ເດັກທີ່ກ່ຽວຂ້ອງກັບການປະທະກັນດ້ວຍອາວຸດ, ສຸຂະພາບຂອງເດັກ, ເດັກພິການ, ການຮັກສາຂໍ້ມູນກ່ຽວກັບເອກະລັກຂອງເດັກ, ການມີສ່ວນຮ່ວມຂອງເດັກກັບສື່ມວນຊົນ, ເດັກກັບສື່ສັງຄົມອອນລາຍ ແລະ ການມີສ່ວນຮ່ວມຂອງເດັກໃນວຽກງານອື່ນໆ. ພ້ອມນີ້ຍັງໄດ້ເປີດໂອກາດໃຫ້ຜູ້ເຂົ້າຮ່ວມໄດ້ສົນທະນາປະກອບຄວາມຄິດເຫັນເຂົ້າໃນຫົວຂໍ້ຕ່າງໆ ຂອງປື້ມຫົວດັ່ງກ່າວ ພ້ອມທັງເປີດກ້ວາງໃຫ້ຜູ້ເຂົ້າຮ່ວມໄດ້ຖາມ-ຕອບ ກອງປະຊຸມຄັ້ງນີ້ແມ່ນຈະໄດ້ດໍາເນີນໄປເປັນເວລາ 3 ວັນ ກໍ່ຄືວັນທີ່ 4-6 ສີງຫາ ຈື່ງສໍາເລັດ.

ພາບ-ຂ່າວ: ແສງອາທິດ