ຕອນເຊົ້າວັນທີ 3 ສິງຫານີ້ ທີ່ຫ້ອງປະຊຸມພະແນກ ພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວ (ຖວທ) ແຂວງອຸດົມໄຊ ສະມາຊິກພັກ, ພະນັກງານ ຫຼັກແຫລ່ງທົ່ວພະແນກ ຖວທ ໄດ້ເຊື່ອມຊຶມການເຜີຍແຜ່ ເອກະສານສຳຄັນຂອງພັກ ໂດຍສະເພາະແມ່ນ ມະຕິຂອງກົມການເມືອງສູນກາງພັກ ວ່າດ້ວຍການຍົກສູງຄຸນນະພາບວຽກງານການເມືອງ – ແນວຄິດ ໃນໄລຍະໃຫມ່ ແລະ ມະຕິ ວ່າດ້ວຍການເພີ່ມທະວີ ການນຳພາຂອງພັກ ຕໍ່ວຽກງານວັດທະນະທຳ ໃນໄລຍະໃຫມ່ ໂດຍມີ ທ່ານ ບຸນກວມ ມິດເມືອງໄຊ ຄະນະພັກຮາກຖານ, ຮັກສາການ ຫົວຫນ້າພະແນກ ຖວທ ແລະ ທ່ານ ມະຫາໄຊ ເກດບຸນພັນ ຮອງຫົວຫນ້າພະແນກ ຖວທ ໃຫ້ກຽດຜັດປ່ຽນກັນຂຶ້ນເຜີຍແຜ່.

ການເຜີຍແຜ່, ເຊື່ອມຊຶມ ແມ່ນປະຕິບັດຕາມແຈ້ງການແນະນໍາຂອງຄະນະໂຄສະນາອົບຮົມແຂວງ ເພື່ອເປັນການຜັນຂະຫຍາຍເນື້ອໃນ, ຈິດໃຈ ມະຕິຂອງກົມການເມືອງສູນກາງພັກ ໃຫ້ກວ້າງຂວາງ ແລະ ເປັນເອກະພາບໃນການຈັດຕັ້ງປະຕິບັດຢູ່ຂອບເຂດທົ່ວປະເທດ ແນ່ໃສ່ເຮັດໃຫ້ສະມາຊິກພັກ, ພະນັກງານຫລັກແຫລ່ງພາຍໃນພະແນກ ຖວທ ແຂວງອຸດົມໄຊ ຮັບຮູ້, ເຂົ້າໃຈ ຢ່າງເລິກເຊິ່ງ ແລະ ພ້ອມກັນນຳໄປຈັດຕັ້ງປະຕິບັດໃນເຂດຄວາມຮັບຜິດຊອບຂອງຕົນໃຫ້ມີຜົນສຳເລັດ.

ໂດຍລວມແລ້ວ ກໍເພື່ອສ້າງການຫັນປ່ຽນໃໝ່ມີຄວາມແຂງແຮງ, ເລິກເຊິ່ງ ແລະ ຮອບດ້ານ, ການຍົກສູງຄຸນນະພາບຂອງວຽກງານການເມືອງ – ແນວຄິດ ໃຫ້ຕອບສະຫນອງໄດ້ຕາມຄວາມຮຽກຮ້ອງຕ້ອງການຂອງຫນ້າທີ່ການເມືອງໃນໄລຍະໃຫມ່, ເພື່ອປຸກລະດົມກຳລັງແຮງທຸກພາກສ່ວນ ປະກອບສ່ວນຢ່າງຕັ້ງຫນ້າເຂົ້າໃນການແກ້ໄຂ ບັນຫາຫຍໍ້ທໍ້ ທາງດ້ານວັດທະນະທຳ ແລະ ເປັນເຈົ້າການປົກປັກຮັກສາ, ເສີມຂະຫຍາຍມູນເຊື້ອວັດທະນະທຳອັນດີງາມຂອງຊາດ ກໍຄື ຂອງແຂວງ ແລະ ຂອງເມືອງ ໃຫ້ນັບມື້ອຸດົມສົມບູນ, ເປັນກຳລັງແຮງຊຸກດັນໃຫ້ແກ່ການພັດທະນາເສດຖະກິດ-ສັງຄົມ ຂອງແຂວງ ບັນລຸຕາມລະດັບຄາດຫມາຍ. ການເຜີຍແຜ່, ເຊື່ອມຊຶມ ມີຄະນະພັກ, ຄະນະພະແນກ, ສະມາຊິກພັກ, ພະນັກງານ-ລັດຖະກອນ ພາຍໃນພະແນກ ຖວທ ເຂົ້າຮ່ວມຮັບຟັງ.

ພາບ-ຂ່າວ: ແສງອາທິດ