ຕອນບ່າຍວັນທີ 2 ສິງຫານີ້ ທີ່ສະໂມສອນສູນການສຶກສານອກໂຮງຮຽນ ແຂວງອຸດົມໄຊ ໄດ້ຈັດພິທີເປີດບັ້ນສອບເສັງຈົບຊັ້ນ ມ7 ລະບົບບຳລຸງ ສົກຮຽນ 2020-2021 ຂຶ້ນ ໂດຍການເປັນປະທານຂອງທ່ານ ສົມສະນິດ ສຸດທິວົງ ຮອງຫົວໜ້າພະແນກສຶກສາທິການ ແລະ ກິລາ, ເຂົ້າຮ່ວມມີ ທ່ານ ອຸ່ນເຮືອນ ເພັດສະລາ ຮອງຫົວໜ້າພະແນກ ຕິດຕາມ ແລະ ປະເມີນຜົນ ກົມການສຶກສານອກໂຮງຮຽນ, ກະຊວງສຶກສາທິການ ແລະ ກິລາ, ມີຄະນະອຳນວຍການ, ຄູ-ອາຈານ ພ້ອມດ້ວຍນັກສອບເສັງ ເຂົ້າເສັງ ທັງໝົດ 25 ຄົນ, ຍິງ 5 ຄົນ.


ບັ້ນສອບເສັງ ມ7 ລະບົບບຳລຸງນີ້ ພິທີກໍໄດ້ຜ່ານບັນດາເນື້ອໃນເອກະສານທີ່ກ່ຽວຂ້ອງກັບການສອບເສັງ ໂດຍສະເພາະ ແມ່ນກົດລະບຽບຂອງການສອບເສັງ ເພື່ອໃຫ້ຄະນະກຳມະການ, ຄູ-ອາຈານ ນັກຮຽນໄດ້ຮັບຮູ້, ເຂົ້າໃຈແຈ້ງ ແລະ ເປັນເຈົ້າການໃນການຈັດຕັ້ງປະຕິບັດເນື້ອໃນກົດລະບຽບດັ່ງກ່າວ ໃຫ້ໄດ້ຮັບໝາກຜົນ. ໂອກາດກ່າວ ທ່ານ ສົມສະນິດ ສຸດທິວົງ ຮອງຫົວນ້າພະແນກສຶກສາທິການ ແລະ ກິລາ ກໍໄດ້ມີບາງຄຳເຫັນໂອລົມຕໍ່ຄະນະກຳມະການ ແລະ ນັກສອບເສັງ ໃຫ້ເອົາໃຈໃສ່ບາງບັນຫາທີ່ສຳຄັນ ການປະຕິບັດຕາມກົດລະບຽບຂອງການສອບເສັງ ຮັກສາສຸຂະພາບຂອງຕົນໃຫ້ດີ ມາຂຶ້ນຫ້ອງເສັງໃຫ້ທັນເວລາ ຄະນະກຳມະການກໍຕ້ອງປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ມີຄວາມບໍລິສຸດສັດຊື່ ຮັບປະກັນໃຫ້ແກ່ການສອບເສັງມີຄຸນນະພາບ ແລະ ມີຜົນສຳເລັດຕາມລະດັບຄາດໝາຍທີ່ວາງໄວ້.