ມີເດຍລາວແຂວງບໍ່ແກ້ວ ກອງປະຊຸມສ່ອງແສງລາຍງານວຽກງານຮອບດ້ານ 6 ເດືອນ ຂອງຂົງເຂດວັດທະນະທຳ-ສັງຄົມ ແຂວງບໍ່ແກ້ວ ໄດ້ໄຂຂຶ້ນຢ່າງເປັນທາງການ ໃນວັນທີ 3 ສິງຫາ 2021ນີ້ ທີ່ຫ້ອງປະຊູມພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ບໍ່ແກ້ວ ໂດຍການເຂົ້າຮ່ວມເປັນປະທານຂອງ ທ່ານ ຄຳຜະຫຍາ ພົມປັນຍາ ຮອງເຈົ້າແຂວງ ບໍ່ແກ້ວ ຜູ້ຊີ້ນຳຂົງເຂດວັດທະນະທຳ-ສັງຄົມແຂວງ, ມີກຳມະການພັກແຂວງ, ຫົວໜ້າ, ຮອງຫົວໜ້າພະແນກການ, ຂົງເຂດວັດທະນະທຳສັງຄົມ, ມີຫົວໜ້າ, ຮອງຂະແໜງ ເຂົ້າຮ່ວມ.

ກອງປະຊຸມ ໄດ້ພັດປ່ຽນກັນສ່ອງແສງລາຍງານ ສະພາບການຈັດຕັ້ງປະຕິບັດວຽກງານຮອບດ້ານໃນຂະແໜງຕົນຮັບຜິດຊອບ ໂດຍຍົກໃຫ້ເຫັນ ບັນດາວຽກງານທີ່ພົນເດັ່ນ, ດ້ານອອນ, ຂໍ້ຄົງຄ້າງ, ບາງບົດຮຽນທີ່ຖອດຖອນໄດ້ ໂດຍສະເພາະແມ່ນວຽກງານ ໃນພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ພະແນກສຶກສາທິການ ແລະ ກິລາແຂວງ, ພະແນກແຮງງານສະຫວັດດີການ ແລະ ສັງ ຄົມແຂວງ, ພະແນກຍຸຕິທຳແຂວງ, ພະແນກພາຍໃນແຂວງ, ພະແນກສຶກສາທິການ ແລະ ກິລາແຂວງ ພ້ອມທັງຍົກເຫັນວຽກງານຈຸດສຸມສະເພາະໜ້າ ແລະ ຍາວນານ ແນໃສ່ເຮັດໃຫ້ການເຄື່ອນໄຫວວຽກງານໃນຂົງເຂດວັດທະນະທຳ-ສັງຄົມຖືກຕ້ອງສອດຄອງກັບການປ່ຽນ ແປງໃໝ່ຂອງພັກ-ລັດ.

ທ່ານ ຄຳຜະຫຍາ ພົມປັນຍາ ຮອງເຈົ້າແຂວງ ໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ ພ້ອມທັງເນັ້ນໜັກໃຫ້ບັນດາພະແນກການສືບຕໍ່ ເຄື່ອນໄຫວຕາມພາລະບົດບາດສິດ ແລະ ໜ້າທີ່ຂອງຕົນ, ສຳລັບພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ໃຫ້ສືບຕໍ່ພົວພັນຜູ້ປະກອບ ເພື່ອລະດົມທຶນຂະຫຍາຍໂທລະໂຄ່ງ ຢູ່ບັນດາຕະຫຼາດ 04 ຕະຫຼາດຄື: ຕະຫຼາດວັງວິວ, ຕະຫຼາດສາຍມະນີ, ຕະຫຼາດສີດອນມີ ແລະ ຕະຫຼາດຈີນ ໃຫ້ຜູ້ປະກອບການໄດ້ມີສ່ວນຮ່ວມ, ປຸກລະດົມບັນດາພະແນກການມີສ່ວນຮ່ວມໃນການເຜີຍແຜ່ພາລະບົດບາດຂອງຕົນຜ່ານສື່ໃຫ້ກວ້າງຂວາງ ພ້ອມກັນລົງກວດກາບັນດາຮ້ານອາຫານຮ້ານກິນດື່ມ, ຫົວໜ່ວຍທຸລະກິດ, ຜູ້ປະກອບການໃຫ້ປະຕິບັດຕາມຄຳສັ່ງຂອງຂັ້ນເທິງວາງອອກຢ່າງເຂັ້ມງວດ, ສືບຕໍ່ການສ້າງການທ່ອງທ່ຽວສູ່ເຂດຊົນນະບົດ.

ໄລຍະພັກຮຽນໃຫ້ຈັດຊຸດຝຶກອົບຮົມໃຫ້ ນັກ ຮຽນວິຊາຊີບ, ນັກຮຽນຊົນເຜົ່າ ຫຼື ສອນເພື້ມດ້ານວິຊາຕ່າງໆ. ລົງຕິດຕາມສຶກສາອົບຮົມດ້ານການເມືອງແນວຄິດໃຫ້ບັນດາຄະນະຮັບ ຜິດຊອບວຽກງານສຶກສາຢູ່ຂັ້ນເມືອງ, ໂຮງຮຽນໃຫ້ມີຈັນຍາບັນ, ຈັນຍາທຳ ເປັນແບບຢ່າງ, ເພື່ອກະກຽມເປີດສົກຮຽນໃໝ່. ການກຳນົດຕຳ ແໜ່ງງານຕ້ອງຕິດພັນກັບຄວາມຮູ້ຄວາມສາມາດ, ປະສົບການ, ພ້ອມກັນ ລົງເຄື່ອນໄຫວກວດກາຕິຕາມການເຄື່ອນໄຫວຂອງນັກລົງທຶນຂອງພາກລັດ, ເອກະຊົນ ທັງພາຍໃນ ແລະ ຕ່າງປະເທດ ເປັນຕົ້ນແມ່ນການເຄື່ອນຍ້າຍ ແຮງງານ ເຂົ້າ-ອອກ, ເອົາໃຈໃສ່ຊຸກຍູ້ວຽກງານສັກວັກຊິນປ້ອງກັນໂຄວິດ-19 ໃຫ້ບັນລຸຕາມແຜນຂອງລັດຖະບານວາງໄວ້, ພ້ອມທັງຕິດຕາມ ແລະ ແກ້ໄຂການລະບາດຂອງພະຍາດໂຄວິດ -19, ພະຍາດໄຂ້ຍຸງລາຍຢ່າງໃກ້ສິດ, ສືບຕໍ່ສຶກສາອົບຮົມກ່ຽວກັບຮຽນກົດໝາຍ 45 ວັນ ໃຫ້ບັນດາພະແນກການອ້ອມຂ້າງແຂວງ ແລະ ບັນດາ ເມືອງ, ບ້ານໃຫ້ທົ່ວເຖິງ.
ຂ່າວ-ພາບ: ບຸນເພັດ