ມີເດຍລາວແຂວງເຊກອງ ຂາວ-ພາບ: ແດນວົງວິຈິດ
ເມືອງທ່າແຕງແຂວງເຊກອງໄດ້ໄຂການສອບເສັງຈົບຊັ້ນ ມໍ7 ( ລະບົບບໍາລຸງສຳລັບປະຊາຊົນ ) ທົ່ວເມືອງຂື້ນຢ່າງເປັນທາງການ ໃນຕອນເຊົ້າວັນທີ 3 ສິງຫາ 2021 ທີ່ສູນສອບເສັງໂຮງຮຽນ ມ/ຕ ບ້ານ ກົກພຸງໄຕ້, ໂດຍມີ ທ່ານ ນາງ ແກ້ວອຸດອນ ດວງມະນີວົງ ຄະນະປະຈຳພັກເມືອງ,ມີຄະນະຫ້ອງການສຶກສາທິການ-ກິລາເມືອງ,ພາກສ່ວນກ່ຽວຂ້ອງຂັ້ນແຂວງ,ຄູ-ອາຈານ ແລະ ປະຊາຊົນພາຍໃນບ້ານເຂົ້າຮ່ວມ.

ທ່ານ ກົມມະລິນ ໜໍ່ແກ້ວ ຄະນະຫ້ອງການສຶກສາທິການ-ກິລາເມືອງທ່າແຕງກ່າວວ່າ: ສູນການສຶກສານອກໂຮງຮຽນພາຍໃນເມືອງ ແມ່ນເລັ່ງໃສ່ບໍາລຸງຍົກລະດັບການສຶກສາໃຫ້ ປະຊາຊົນໃນກຸ່ມເປົ້າໝາຍເກນອາຍຸ 18 ປີຂຶ້ນໄປທີ່ຮຽນບໍ່ຈົບຊັ້ນມັດທະຍົມຕອນຕົ້ນ ແລະ ຕອນປາຍ,ເຊິ່ງມີ ຄົນທີ່ຕົກຄ້າງ ແລະ ປະລະການຮຽນຈໍານວນໜຶ່ງທີ່ມາຈາກກຸ່ມບ້ານຕ່າງໆພາຍໃນເມືອງ,ການສອບເສັງຈົບຊັ້ນ ມໍ7 ( ລະບົບບໍາລຸງສໍາລັບປະຊາຊົນ ) ປີນີ້ມີ 5 ສູນສອບເສງ, ຄື: ສູນບ້ານ ກົກພຸງໄຕ້,ບ້ານ ຫ້ວຍດຳ,ບ້ານ ດອນຊາ, ບ້ານ ທົ່ງຫວາຍ ແລະ ບ້ານ ຈຸຮຸງເໜືອ, ມີນັກສອບເສັງທັງໝົດ 112 ຄົນ,ຍິງ 37 ຄົນ, ໂດຍຈັດອອກເປັນ 9 ຫ້ອງສອບເສັງ ແລະ ມີ 04 ວິຊາສອບເສັງຄື: ວິຊາພາສາລາວ-ວັນະຄະດີ,ຄະນິດສາດ,ຊີວະສາດ ແລະ ວິຊາສຶກສາພົນລະເມືອງ.

ໂອກາດນີ້ ທ່ານ ນາງ ແກ້ວອຸດອນ ດວງມະນີວົງ ຄະນະປະຈຳພັກເມືອງປະທານຄະນະຊີ້ນຳສອບເສັງຈົບຊັ້ນ ມ7 ( ລະບົບບໍາລຸງສໍາລັບປະຊາຊົນ ) ໄດ້ມີຄຳເຫັນວ່າ: ວຽກງານການສຶກສາແມ່ນທັກສະການພັດທະນາການຮໍ່າຮຽນ,ການສຶກສາແມ່ນການຮຽນຮູ້ທຸກສິ່ງໃຫ້ເຂົ້າໃຈຮຽນເພື່ອຮູ້, ສະນັ້ນ,ພັກ-ລັດຈຶ່ງໄດ້ສຸມໃສ່ກໍາລັງແຮງອັນມະຫານສານ,ລະດັບການສຶກສາຂອງຂັ້ນທ້ອງຖິ່ນທີ່ມີລະດັບການ ແລະ ມີຄວາມຈໍາເປັນທີ່ສຸດ,ປະຈຸບັນນີ້ກໍ່ຄືວິຊາສະເພາະທີ່ຕິດພັນບຸກຄົນໃນປະຈຸບັນເປັນວິຊາອາຊີບເສີມ,ໂດຍໄດ້ມີການສົ່ງເສີມຍົກລະດັບທາງດ້ານການຮຽນຮູ້ການບໍລິການ, ຄຽງຄູ່ກັບວິຊາສະເພາະຄວາມຮູ້ຄວາມສາມາດຂອງປະຊາຊົນໃນປະຈຸບັນ.

ປະທານ ຄະນະຊີ້ນໍາການສອບເສງຈົບຊັ້ນ ມໍ7 ບໍາລຸງ ຍັງເນັ້ນໜັກໃຫ້ຄະນະກຳມະການທີ່ຖືກແຕ່ງຕັ້ງຮັບຜິດຊອບການສອບເສັງຄັ້ງນີ້ ຈົ່ງຢຶດໝັ້ນຕໍ່ອຸດົມການ,ມີຈັນຍາບັນຕັ້ງໜ້າປະຕິບັດລະບຽບການສອບເສັງຢ່າງຈິງໃຈ, ຫຼີກລຽງການເຮັດຜິດກົດລະບຽບການສອບເສັງ ເພື່ອໃຫ້ການສອບເສັງດໍາເນີນໄປດ້ວຍຜົນສໍາເລັດຢ່າງສູງ. ເຊິ່ງການສອບເສັງຈະດຳເນີນເປັນເວລາ 02 ວັນ ໃນລະຫ່ວາງວັນທີ 3 – 4 ສິງຫາ 2021 ຈິ່ງສໍາເລັດ.