ມີເດຍລາວແຂວງເຊກອງ ໃນຕອນບ່າຍວັນທີ 3 ສິງຫາ 2021 ໜ່ວຍພັກຮາກຖານຄະນະບໍລິຫານງານຊາວໜຸ່ມ (ຄຊປປລ) ແຂວງ ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນ ສະມາຊິກພັກປະຊາຊົນ ປະຕິວັດລາວສະໄໝສຳຮອງຈຳນວນ 1 ສະຫາຍ,  ໂດຍການເປັນປະທານຂອງສະຫາຍ ບຸນຫຼາຍ ບຸດທິ ກຳມະການປະຈໍາພັກແຂວງ, ຫົວໜ້າຄະນະຈັດຕັ້ງແຂວງ, ມີສະຫາຍ ປອ ຕຸລາວັນ ວົງໄຊ ເລຂາໜ່ວຍພັກຮາກຖານ, ເລຂາ ຄຊປປລ ແຂວງ ພ້ອມດ້ວຍຄະນະໜ່ວຍພັກ, ສະມາຊິກພັກສົມບູນ-ສຳຮອງ ແລະແຂກຖືກເຊີນເຂົ້າຮ່ວມ.

ໃນພິທີສະຫາຍ ກາວິນ ແກ້ວຈັນທະວົງ ຫົວໜ້າຂະແໜງກໍ່ສ້າງພັກ, ຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 444/ຄຈພຂ, ລົງວັນທີ 15 ກໍລະກົດ 2021 ວ່າດ້ວຍຮັບເອົາມະຫາຊົນກ້າວໜ້າເຂົ້າພັກສະໄໝສໍາຮອງ, ຄະນະປະຈໍາພັກແຂວງເຊກອງເຫັນດີຮັບຮອງເອົາມະຫາຊົນກ້າວໜ້າຈໍານວນ 1 ສະຫາຍ, ຍິງ 1 ສະຫາຍ ເຂົ້າເປັນສະມາຊິກພັກປະຊາຊົນ ປະຕິວັດລາວສະໄໝສໍາຮອງ ເຊິ່ງຜູ້ກ່ຽວໄດ້ຜ່ານການຮໍ່າຮຽນສະໜັບສະໜູນ ແລະກົດລະບຽບຂອງພັກເປັນຢ່າງດີ, ມີຄວາມສາມັກຄີ ແລະຫ້າວຫັນໃນການປະຕິບັດໜ້າທີ່ວຽກງານວິຊາສະເພາະທີ່ໄດ້ຮັບມອບໝາຍ.

ໂອກາດນີ້ ສະຫາຍ ບຸນຫຼາຍ ບຸດທິ ໄດ້ເນັ້ນໃຫ້ສະມາຊິກພັກສໍາຮອງ ກໍຄືສະມາຊິກພັກທຸກສະຫາຍເອົາໃຈໃສ່ຄົ້ນຄວ້າເຊື່ອມຊຶມແນວທາງນະໂຍບາຍ, ມະຕິຄຳສັ່ງຂອງພັກ, ລັດຖະທຳມະນູນ ແລະກົດໝາຍຂອງລັດ, ເພີ່ມທະວີຍົກສູງພາລະບົດບາດການນຳພາຂອງພັກເຂົ້າໃນທຸກຂົງເຂດວຽກງານ, ຕັ້ງໜ້າປະກອບສ່ວນເຂົ້າໃນການກໍສ້າງພັກເຮັດໃຫ້ພັກປອດໃສ, ໜັກແໜ້ນ, ເຂັ້ມແຂງທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ເຂັ້ມແຂງທາງດ້ານແບບແຜນວິທີນຳພາ, ດຳເນີນການຕຳນິຕິຊົມຕົນເອງ ແລະຕິຊົມໝູ່ເພື່ອນເປັນປະຈຳຢ່າງເຂັ້ມງວດ, ຍົກສູງສະຕິປົກປັກຮັກສາພັກ ແລະຮັກສາຄວາມສາມັກຄີພາຍໃນໃຫ້ມີຄວາມແໜ້ນຍິ່ງໆຂຶ້ນ.
ຂ່າວ:ພຸດທະສອນ