ມີເດຍລາວແຂວງລວງພະບາງ ຂ່າວ: ສີສຸວັນ
ເມື່ອບໍ່ດົນຜ່ານມານີ້ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ໄດ້ນໍາພາຄະນະຜູ້ແທນຈາກສໍານັກງານນາຍົກລັດຖະ ມົນຕີ, ກະຊວງໂຍທາທິການ ແລະ ຂົນສົ່ງ,ກະຊວງຊັບພະຍາກອນ ແລະ ສິ່ງແວດລ້ອມ ແລະ ກໍາມະການພັກແຂວງນະຄອນຫຼວງວຽງຈັນ ລົງຢ້ຽມຢາມສະຖານທີ່ກໍ່ສ້າງສະຖານີລົດໄຟກາສີ ແລະ ສະຖານີລົດໄຟວັງວຽງ, ໂດຍໃຫ້ການຕ້ອນຮັບຢ່າງອົບອຸ່ນຈາກ ທ່ານ ຊຽວສຽນເຫວິ່ນຜູ້ອໍານວຍການໃຫຍ່ທາງລົດໄຟ ລາວ-ຈີນ.

ສໍາລັບລົງຢ້ຽມຢາມດ້ານພາກສະໜາມສະຖານີກາສີ ແລະ ສະຖານີວັງວຽງ ເຊິ່ງແມ່ນກຸ່ມບໍລິສັດກໍ່ສ້າງທາງລົດໄຟ ສປ ຈີນ ເປັນຜູ້ຮັບເໝົາກໍ່ສ້າງສະຖານີແຫ່ງນີ້ ແລະ ໃນການລົງຢ້ຽມຢາມໃນຄັ້ງນີ້ ທ່ານ ສອນໄຊ ຍັງໄດ້ຮັບຟັງການລາຍງານຈາກ ທ່ານ ຊຽວສຽນເຫວິ່ນ ຜູ້ອໍານວຍການໃຫຍ່ທາງລົດໄຟລາວ-ຈີນ ກ່ຽວກັບສະພາບຄວາມຄືບໜ້າໃນປັດຈຸບັນ ແລະ ບັນຫາທີ່ຕ້ອງໄດ້ມີການປະສານງານເພື່ອແກ້ໄຂຂອງສະຖານີທັງສອງແຫ່ງນີ້.ພ້ອມທັງຍັງໄດ້ຢ້ຽມຊົມການຕົບແຕ່ງພາຍໃນຂອງສະຖານີ,

ນອກຈາກນີ້ທ່ານຍັງໄດ້ສະແດງເຖິງຄວາມພຶ່ງພໍໃຈພາຍໃຕ້ຊ່ວງລະບາດຂອງພະບາດ COVID-19 ແຕ່ການກໍ່ສ້າງຂອງສະຖານີມີີຄວາມຄືບໜ້າຂຶ້ນ, ພ້ອມນີ້ທ່ານກໍຍັງໄດ້ໃຫ້ຄວາມເປັນຫ່ວງເປັນໃຍຕໍ່ວຽກງານດ້ານການໂດຍສານຂອງສະຖານີເຊິ່ງໄດ້ຖາມໄຖ່ລາຍລະອຽດກ່ຽວກັບ ການກໍ່ສ້າງທາງເຂົ້າອອກຂອງຂະບວນລົດໄຟ ຈຸດບ່ອນຈອດລົດໄຟ ແລະຂະບວນລົດໄຟບັນທຸກສິນຄ້າເປັນຕົ້ນ, ນອກຈາກນີ້ ທ່ານຍັງສະແດງໃຫ້ເຫັນວ່າ ປີນີ້ເຊິ່ງແມ່ນປີທີ່ສ້າງສາຍພົວພັນການທູດ ລາວ-ຈີນ ຄົບຮອບ 60 ປີ,ແລະກໍແມ່ນປີທີ່ຈະເປີດການນໍາໃຊ້ທາງລົດໄຟ ລາວ-ຈີນ, ລັດຖະບານ ສປປ ລາວ ຈະໃຫ້ຄວາມຊ່ວຍເຫຼືອ ແລະ ສະໜັບສະໜູນດ້ານການກໍ່ສ້າງທາງລົດໄຟລາວ-ຈີນຢ່າງເຕັມທີ່ພື່ອຮັບປະກັນເຖິງການບຸກໄປຂ້າງໜ້າຂອງການວິສະວະກໍາຢ່າງມີປະສິດທິພາບ.


ສະຖານີໂດຍສານທັງໝົດຂອງທາງລົດໄຟລາວ-ຈີນມີຢູ່ 10 ສະຖານີ, ເຊິ່ງໃນປັດຈຸບັນນີ້ແຕ່ລະສະຖານີກໍາລັງຢູ່ໃນຂັ້ນຕອນດ້ານຕົບແຕ່ງພາຍໃນ,ຄາດວ່າທ້າຍເດືອນກັນຍານີ້ຈະສໍາເລັດ. ຂ່າວໃຫ້ຮູ້ອີກວ່າໃນຕົ້ນເດືອນ ມິຖຸນາ ທີ່ຜ່ານມານີ້ ທ່ານ ສອນໄຊ ສີພັນດອນ ໄດ້ນໍາພາຄະນະລົງຢ້ຽມຢາມສະຖານີ ນະຄອນຫຼວງວຽງຈັນ ຕື່ມອີກ.