ມີເດຍລາວແຂວງຫຼວງພະບາງ ຂ່າວ: ສີສຸວັນ ພິທີເຊັນບົດບັນທຶກຄວາມເຂົ້າໃຈກ່ຽວກັບການແຕ່ງຕັ້ງ ທະນາຄານ ມາຣູຮານ ເຈແປນ ລາວ ຈໍາກັດເປັນຄູ່ຮ່ວມມືຍຸດທະສາດໃນການສົ່ງເສີມ MSMEs ໃນ ນະຄອນ ຫຼວງພະບາງ ກໍຄືແຂວງຫຼວງພະບາງ ໄດ້ຈັດຂຶ້ນໃນ ວັນທີ 30 ກໍລະກົດ 2021 ນີ້ທີ່ທະນາຄານມາຣູຮານ ສາຂາແຂວງຫຼວງພະບາງ, ລະຫວ່າງ ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ ກັບ ທ່ານ ແອນໂທນີ້ ຊິນ ຜູ້ອໍານວຍການໃຫຍ່ ທະນາຄານມາຣູຮານ ເຈແປນ ລາວ, ມີຮອງຫົວໜ້າພະແນກອຸດສາຫະກໍາ ແລະ ການຄ້າແຂວງ, ສະພາອຸດສາຫະກໍາ ແລະ ການຄ້າ ແຂວງ ພ້ອມດ້ວຍພະນັກງານທະນາຄານເຂົ້າຮ່ວມເປັນສັກຂີພິຍານ.

ຈຸດປະສົງຫຼັກກໍເພື່ອແຕ່ງຕັ້ງໃຫ້ທະນາຄານມາ ຣູຮານ ເຈແປນ ລາວ ຈໍາກັດ ເປັນຄູ່ຮ່ວມມືຍຸດທະສາດ ໃນການສົ່ງເສີມ ແລະ ສະໜັບສະໜູນຫົວໜ່ວຍທຸລະກິດຈຸນລະວິສາຫະກິດ ທຸລະກິດຂະໜາດນ້ອຍ ແລະ ກາງ ທີ່ດໍາເນີນການຢູ່ພາຍໃນນະຄອນຫຼວງພະບາງ ກໍຄືພາຍໃນແຂວງຫຼວງພະບາງ ແລະ ການຮ່ວມມືແມ່ນບໍ່ພຽງແຕ່ກວມລວມເຖິງການຈັດຫາແຫຼ່ງທຶນເພື່ອສະໜອງໃຫ້ແກ່ຫົວໜ່ວຍທຸລະກິດຂະໜາດນ້ອຍ,ຂະໜາດກາງເທົ່ານັ້ນ ແຕ່ເປັນການຮ່ວມມືໃນການໃຫ້ຫົວໜ່ວຍທຸລະກິດຈຸນລະວິສາຫະກິດ ທຸລະກິດຂະໜາດນ້ອຍ ແລະ ກາງ ໃນການເຂົ້າເຖິງລະບົບນິເວດໃນການພັດທະນາ SMEs ຂອງທະນາຄານຕື່ມອີກ, ຊ່ວຍໃນການປະສານງານ,ສົ່ງເສີມ ແລະ ໂຄສະນາເປັນຂົວຕໍ່ລະຫວ່າງຫົວໜ່ວຍທຸລະກິດ, ສ້າງການມີສ່ວນຮ່ວມກັບຫົວໜ່ວຍທຸລະກິດເພື່ອການຮ່ວມມື ແລະ ເປັນຄູ່ຄ້າກັນ,ບົນພື້ນຖານຄວາມເໝາະສົມ ຈັດຫາແຫຼ່ງທຶນ,ຝຶກອົບຮົມ,ແນະນໍາ,ຈັດຫາວິທີການສໍາລະສະສາງທີ່ແທດເໝາະກັບຫົວໜ່ວຍ MSMEs ລວມທັງການມີສ່ວນຮ່ວມທາງການເງິນໂດຍນໍາໃຊ້ MJ Sabai ການເຮັດທະລະກໍາທາງການເງິນຜ່ານຕົວແທນຂອງທະນາຄານມາຣູຮານ ເຈແປນ ລາວ ຈໍາກັດ.

ໃນວັນດຽວກັນ ທ່ານ ວຽງທອງ ຫັດສະຈັນ ເຈົ້ານະຄອນ ຫຼວງພະບາງ, ທ່ານ ແອນໂທນີ້ ຊິນ ຜູ້ອໍານວຍການໃຫຍ່ ທະນາຄານມາຣູຮານ ເຈແປນ ລາວ ຈໍາກັດ ພ້ອມຄະນະ ກໍໄດ້ເຂົ້າຮ່ວມພິທີເປີດທະນາຄານຕົວແທນ MJ Sabai ສາຂາທີ່ບ້ານນາສ້າງເຫວີຍ, ບ້ານຄົກວາ ນະຄອນຫຼວງພະບາງ ຕື່ມອີກ.