ຂ່າວ:ສີສຸວັນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ໄດ້ໂອ້ລົມການນໍາຂອງແຂວງໃນ ວັນທີ 3 ສິງຫາ 2021 ທີ່ສະໂມສອນໃຫຍ່ຂອງຫ້ອງວ່າການປົກຄອງແຂວງ,ມີບັນດາຄະນະລັດຖະມົນຕີຈາກກະຊວງ,ຮອງເຈົ້າແຂວງ,ຫົວໜ້າພະແນກການອ້ອມຂ້າງແຂວງເຂົ້າຮ່ວມ.

ທ່ານ ຄຳຂັນ ຈັນທະວີສຸກ ເຈົ້າແຂວງໆຫຼວງພະບາງ ໄດ້ຂຶ້ນລາຍງານສະພາບລວມຂອງການພັດທະນາແຂວງຫຼວງພະບາງໃຫ້ທ່ານຮອງນາຍົກຮັບຊາບ ໂດຍລວມແລ້ວແຂວງຫຼວງພະບາງແມ່ນຍັງສຶບຕໍ່ມີຄວາມສະຫງົບແລະມີຄວາມເປັນລະບຽບຮຽບຮ້ອຍທາງສັງຄົມໂດຍພຶ້ນຖານ, ການຂະຫຍາຍຕົວທາງດ້ານເສດຖະກິດຂອງແຂວງໃນປີ 2021 ນີ້ຄາດວ່າຈະຂະຫຍາຍຕົວໃນລະດັບ 4,1%(ແຜນການແມ່ນ 4,5%) ລວມຍອດມູນຄ່າຜະລິດຕະພັນພາຍໃນ ຈີດີພີ ສະເລ່ຍຕໍ່ຫົວຄົນເທົ່າກັບ 17,44 ລ້ານກີບ.

ໂຄງປະກອບເສດຖະກິດທີ່ໄດ້ຮັບຜົນກະທົບຫຼາຍກວ່າໝູ່ແມ່ນ ດ້ານການບໍລິການ-ການທ່ອງທ່ຽວ.ການເກັບລາຍຮັບເຂົ້າງົບປະມານແຫ່ງລັດຮອດທ້າຍເດືອນ ກໍລະກົດ 2021 ໄດ້ 166,63 ຕື້ກີ, ເທົ່າກັບ45,90%,ລາຍຈ່າຍປະຕິບັດໄດ້ 325,46 ຕື້ກີບ.ສາມາດຍາດແຍ່ງທຶນເຂົ້າໃນການພັດທະນາໄດ້ທັງໝົດ 1.236 ຕື້ກີບ. ໃນ 6 ເດືອນຜ່ານມາສາມາດສ້າງຄອບຄົວພົ້ນທຸກໄດ້ 835 ຄອບຄົວ,ປັດຈຸບັນຄອບຄົວທຸກຍາກຍັງເຫຼືອ 25.413 ຄອບຄົວ ໃນທົ່ວແຂວງ ພ້ອມນີ້ຍັງມີວຽກງານຫຼາຍດ້ານທີ່ພົ້ນເດັ່ນພາຍໃຕ້ການເອົາໃຈໃສ່ຊີ້ນໍາຢ່າງຖຶກທິດຂອງການນໍາແຕ່ລະໜ່ວຍງານ. ພ້ອມນີ້ຍັງໄດ້ຮັບຟັງປະກອບຄໍາຄິດຄໍາເຫັນຈາກບັນດາທ່ານລັດຖະມົນຕີ,ຮອງລັດຖະມົນຕີ ແລະຄະນະທີມງານຈາກກະຊວງຕື່ມອີກ.
ໂອກາດນີ້ ທ່ານຮອງນາຍົກລັດຖະມົນຕີ ກໍໄດ້ເປັນກຽດໂອ້ລົມຕໍ່ພິທີໂດຍໄດ້ເນັ້ນໃຫ້ການນໍາຂອງແຂວງ,ບັນດາພະແນກການຕ່າງໆສຶບຕໍ່ຊີ້ນໍາໆພາຈັດຕັ້ງປະຕິບັດໜ້າທີ່ວຽກງານໃຫ້ບັນລຸແຜນ, ເອົາໃຈໃສ່ແກ້ໄຂຂໍ້ຄົງຄ້າງຕ່າງໆ ໂດຍສະເພາະແມ່ນຄຸມເຂັ້ມການແຜ່ລະບາດຂອງພະຍາດໂຄວິດ-19 ແນໃສ່ໃຫ້ການພັດທະນາແຂວງຫຼວງພະະບາງມີບາດກ້າວຂະຫຍາຍຕົວຂຶ້ນໄປເລື້ອຍໆ.

ໂອກາດທີ່ໄດ້ລົງມາເຄື່ອນໄຫວແລະເຮັດວຽກຢູ່ແຂວງຫຼວງພະບາງ ທ່ານຮອງນາຍົກໄດ້ມອບເງິນ ຈຳນວນ 280 ລ້ານກີບ ໃຫ້ແຂວງຫລວງພະບາງຕື່ມອີກ ເພື່ອເປັນທຶນປະກອບສ່ວນ ນຳໃຊ້ເຂົ້າໃນວຽກງານປ້ອງກັນ ແລະ ຄວບຄຸມ ການແຜ່ລະບາດພະຍາດໂຄວິດ-19 ແລະ ວຽກງທີ່ຈໍາເປັນ ແລະ ຮີບດ່ວນຕ່າງໆ ພາຍໃນແຂວງ ເປັນກຽດຮັບໂດຍ ທ່ານ ຄຳຂັນ ຈັນທະວີສຸກ ເຈົ້າແຂວງໆຫລວງພະບາງ.