ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊສົມບູນ ໄດ້ຈັດກອງປະຊຸມເຜີຍແຜ່ແຜນພັດທະນາການທ່ອງທ່ຽວ ແຂວງໄຊສົມບູນ ສຳລັບປີ 2021-2025 ຂຶ້ນໃນຕອນເຊົ້າຂອງວັນທີ 4 ສິງຫາ 2021 ນີ້ ທີ່ຫ້ອງປະຊຸມຂອງພະແນກ ໂດຍການເປັນປະທານຂອງທ່ານ ຕົ່ງມົວ ຊົວໂກ້, ຮອງເຈົ້າແຂວງໄຊສົມບູນ, ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງ, ມີຮອງຫົວໜ້າພະແນກ, ຫົວໜ້າຂະແໜງ-ຮອງຂະແໜງ ພ້ອມດ້ວຍພະນັກງານວິຊາການພາຍໃນພະແນກ ເຂົ້າຮ່ວມ.

ໃນໂອກາດນີ້ ທ່ານ ຕົ່ງມົວ ຊົວໂກ້ ໄດ້ມີຄຳເຫັນ ແລະ ກ່າວເປີດກອງປະຊຸມ ຢ່າງເປັນທາງການ ເຊິ່ງທ່ານໄດ້ຍົກໃຫ້ເຫັນເຖິງຄວາມໝາຍສຳຄັນ ຂອງວຽກງານພັດທະນາການທ່ອງທ່ຽວ ໂດຍມີ 5 ທ່າແຮງ, 8 ເປົ້າໝາຍ 31 ແຜນງານ 128 ໂຄງການ ໃນການພັດທະນາແຫລ່ງທ່ອງທ່ຽວ, ວັດທະນະທຳ ໃຫ້ມີຄຸນນະພາບ ທົ່ວແຂວງໄຊສົມບູນ, ພັດທະນາ ແລະ ສົ່ງເສີມການທ່ອງທ່ຽວ ໃຫ້ກາຍເປັນຈຸດໝາຍປາຍທາງການທ່ອງທ່ຽວ ທາງດ້ານທຳມະຊາດ ແລະ ປະຫວັດສາດ ທີ່ມີຄຸນນະພາບ, ເປັນມິດກັບສິ່ງແວດລ້ອມ ຕາມທິດສີຂຽວ ແລະ ຍືນຍົງ, ປົກປັກຮັກສາ ແລະ ເສີມຂະຫຍາຍວັດທະນະທຳ ທີ່ເປັນເອກະລັກຂອງທ້ອງຖິ່ນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງແຂວງ, ຊ່ວຍສ້າງລາຍຮັບໃຫ້ປະຊາຊົນທ້ອງຖິ່ນ ຢ່າງກວ້າງຂວາງ.

ຈາກນັ້ນໄດ້ຮັບຟັງການຜ່ານຂໍ້ຕົກລົງ ຂອງທ່ານເຈົ້າແຂວງໄຊສົມບູນ ວ່າດ້ວຍການຮອງຮັບ ແລະ ປະກາດໃຊ້ແຜນພັດທະນາການທ່ອງທ່ຽວ ແຂວງໄຊສົມບູນ ສຳລັບປີ 2021-2025 ແລະ ໄດ້ຮັບຟັງການເຜີຍແຜ່ແຜນພັດທະນາການທ່ອງທ່ຽວ ສຳລັບປີ 2021-2025 ຈາກທ່ານ ຄຳຜ່ານ ອຸດສີບຸນມີ, ຮອງຫົວໜ້າຂະແໜງທ່ອງທ່ຽວແຂວງ. ຈຸດປະສົງໃນການເຜີຍແຜ່ໃນຄັ້ງນີ້ ກໍເພື່ອເປັນການຜັນຂະຫຍາຍດຳລັດ ວ່າດ້ວຍນະໂຍບາຍການພັດທະນາເສດຖະກິດ ແຂວງໄຊສົມບູນ ສະບັບເລກທີ 414/ລບ ໃຫ້ປະກົດຜົນເປັນຈິງ, ແນໃສ່ພັດທະນາພື້ນຖານໂຄ່ງລ່າງ ແລະ ສ້າງສິ່ງອຳນວຍຄວາມສະດວກ ໃຫ້ແກ່ວຽກງານທ່ອງທ່ຽວ ເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານທ່ອງທ່ຽວ ໃຫ້ມີແຜນງານ, ໂຄງການລະອຽດ ໂດຍແທດເໝາະກັບສະພາບຕົວຈິງຂອງທ້ອງຖິ່ນ, ສອດຄ່ອງຕາມແນວທາງຂອງພັກ-ລັດ. ເວົ້້າລວມ-ເວົ້າສະເພາະ ກໍຄືແຜນພັດທະນາເສດຖະກິດ-ສັງຄົມຂອງແຂວງ ແຕ່ລະໄລຍະ ສາມາດປະກອບສ່ວນຢ່າງຕັ້ງໜ້າເຂົ້າໃນການພັດທະນາ ແຂວງໄຊສົມບູນ ໃຫ້ຈະເລີນກ້າວໜ້າ ເພື່ອຊ່ວຍຫລຸດຜ່ອນຄວາມທຸກຍາກ ຂອງປະຊາຊົນບັນດາເຜົ່າ ໃຫ້ໄດ້ຮັບການປັບປຸງດີຂຶ້ນເລື້້ອຍໆ.