ມີເດຍລາວແຂວງຫຼວງພະບາງ
ຕອນເຊົ້າວັນທີ 4 ສິງຫາ 2021ນີ້ ກອງພັນ 415 ທະຫານແຂວງຫຼວງພະບາງ ໄດ້ຈັດກອງປະຊຸມສະຫຼຸບວຽກງານຮອບດ້ານປະຈໍາ 6 ເດືອນຕົ້ນປີ 2021 ໂດຍການເປັນປະທານຂອງສະຫາຍ ພັນໂທ ສີຈັນ ໄຊຍະວັນ ເລຂາຄະນະພັກຮາກຖານ, ຫົວໜ້າການເມືອງກອງພັນ 415, ເປັນກຽດເຂົ້າຮ່ວມມີ ສະຫາຍ ພັນໂທ ຫຸມເພັງ ທໍາມະວົງຈິດ ຮອງເລຂາຄະນະພັກຮາກຖານ, ຫົວໜ້າການທະຫານກອງພັນ 415 ທະຫານແຂວງຫຼວງພະບາງ, ມີຄະນະພັກ – ຄະນະບັນຊາກອງພັນ, ກອງຮ້ອຍຂື້ນກັບ ແລະ ພະນັກງານ – ນັກຮົບເຂົ້າຮ່ວມ.

ສະຫາຍ ພັນຕີ ວິສອນ ດວງມະນີ ຄະນະພັກຮາກາຖານ ຮອງຫົວໜ້າການເມືອງກອງພັນ 415 ໄດ້ຂື້ນຜ່ານບົດສະຫຼຸບທັງສອງພາກ ໂດຍໄດ້ຍົກໃຫ້ເຫັນຜົນງານຫຼາຍດ້ານອັນພົ້ນເດັ່ນ ເປັນຕົ້ນແມ່ນວຽກງານເຮັດໃຫ້ສະພາບມີຄວາມສະຫງົບ ແມ່ນໄດ້ຈັດຕັ້ງກໍາລັງຫັນລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ, ຊີ້ນໍາກໍາລັງເຄື່ອນໄຫວແກ້ໄຂໜໍ່ແໜ່ງທີ່ຈະກໍ່ຄວາມບໍ່ສະຫງົບ, ຕິດພັນກັບການຈັດຕັ້ງກຽມພ້ອມສູ້ຮົບ ແລະ ກອບກູ້ໄພພິບັດ ແລະ ປ້ອງກັນເປົ້າໝາຍຍຸດທະສາດ. ວຽກງານກໍ່ສ້າງກໍາລັງແມ່ນໄດ້ລົງເລິກ ສຶກສາອົບຮົມການເມືອງນໍາພາແນວຄິດຂອງພະນັກງານ – ນັກຮົບດ້ວຍຫຼາຍຮູບແບບຢ່າງຕໍ່ເນື່ອງ, ຕິດພັນກັບການປັບປຸງກໍ່ສ້າງພັກ – ກໍ່ສ້າງພະນັກງານ ແລະ ອົງການຈັດຕັ້ງມະຫາຊົນ ໂດຍຖືສໍາຄັນທາງດ້ານຄຸນນະພາບ. ຜ່ານມາໄດ້ຕີລາຄ່າຈັດແບ່ງປະເພດການເມືອງປະຈໍາປີ 2021 ປະເພດ I ມີ 326 ສະຫາຍ, ປະເພດ II ມີ 7 ສະຫາຍ ແລະ ປະເພດ IV ມີ 19 ສະຫາຍ.

ວຽກງານຮັບປະກັນພະລາທິການ ກົມກອງມີສັດລ້ຽງປະເພດງົວ 78 ໂຕ, ແບ້ 139 ໂຕ, ໝູ 61 ໂຕ, ສັດປີກ 350 ໂຕ ແລະ ສັດນໍ້າ 7.500 ໂຕ. ຜ່ານມາໄດ້ເກັບກູ້ຜົນຜະລິດປ່ອນຜັກເຂົ້າເຮືອນຄົວໄດ້ 3.800 ກິໂລ ແລະ ຂາຍອອກສູ່ຕະຫຼາດ 7.513 ກິໂລ, ນອກຈາກນີ້ຍັງໄດ້ສໍາເລັດການກໍ່ສ້າງເຮືອນຄົວໃຫ້ 3 ກອງຮ້ອຍທີ່ຂື້ນກັບເປັນເງິນ 66 ລ້ານກີບ, ສໍາເລັດການຕັ້ງເຮືອນເກັບມ້ຽນລົດໃຫ້ 2 ກອງຮ້ອຍ, ເຮືອນຍາມປະຕູໂຂງ, ສະໂມສອນນ້ອຍ ແລະ ບ່ອນອື່ນໆຕື່ມອີກພາຍໃນກົມກອງເປັນມູນຄ່າ 55.150.000 ກີບ, 6 ເດືອນຜ່ານມາກົມກອງຍັງມີແຫຼ່ງລາຍຮັບຈາກການຂາຍພືດຜັກຊະນິດຕ່າງໆ, ຂາຍສັດລ້ຽງ, ຮັບຈາກການປ້ອງກັນໂຄງການ ແລະ ການບໍການຕ່າງໆລວມທັງໝົດ 235.378.000 ກີບສາມາດບັນລຸໄດ້ 672.500 ກີບຕໍ່ຄົນຕໍ່6ເດືອນ, ໃນບົດສະຫຼຸບຍັງໄດ້ຍົກໃຫ້ເຫັນດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ທີ່ສອດຫ້ອຍໃນທຸກຂົງເຂດວຽກງານຂອງກົມກອງ ເຊິ່ງເປັນບ່ອນອີງ ແລະ ເອກະພາບນໍາໄປຈັດຕັ້ງປະຕິບັດໃນທິດທາງແຜນການ 6 ເດືອນທ້າຍປີນີ້ ໃຫ້ໄດ້ຮັບໝາກຜົນສູງຂື້ນລື່ນເກົ່າ.

ຕອນທ້າຍກອງປະຊຸມ ສະຫາຍ ພັນໂທ ສີຈັນ ໄຊຍະວັນ ເລຂາຄະນະພັກຮາກຖານ, ຫົວໜ້າການເມືອງກອງພັນ 415 ໄດ້ມີຄໍາເຫັນໂອ້ລົມ ເຊິ່ງໄດ້ຮຽກຮ້ອງມາຍັງຄະນະພັກ – ຄະນະບັນຊາບັນດາກົມກອງທີ່ຂື້ນກັບ ຈົ່ງເພີ່ມທະວີສຶກສາອົບຮົມການເມືອງ ນໍາພາແນວຄິດໃຫ້ພະນັກງານ – ນັກຮົບຢ່າງເລິກເຊິ່ງເຖິງທຸກເປົ້າໝາຍ ແນໃສ່ເຮັດໃຫ້ເຂົາເຈົ້າມີຄວາມຕື່ນຕົວທາງດ້ານການເມືອງ ແລະ ຍົກສູງສະຕິຕໍ່ການຈັດຕັ້ງ, ມີຄຸນສົມບັດ, ສິນທໍາປະຕິວັດ. ພ້ອມກັນນີ້ຍັງໄດ້ເນັ້ນໜັກໃຫ້ສືບຕໍ່ເພີ່ມທະວີບົດບາດການນໍາພາ, ບັນຊາ ແລະ ຍົກສູງນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອແນໃສ່ຍົກລະດັບປັບປຸງຊີວິດການເປັນຢູ່ຂອງອ້າຍນ້ອງໃຫ້ນັບມື້ດີຂື້ນ, ສູ້ຊົນບຸກທະລຸທິດສ້າງນັກຮົບວັດທະນະທໍາ ແລະ ກົມກອງວັດທະນະທໍາໃຫ້ບັນລຸຕາມເປົ້າໝາຍທີ່ຂັ້ນເທິງໄດ້ກໍານົດໄວ້.
ໂດຍ: ສົມພອນ ສຸວັນທອນ.