ມີເດຍລາວແຂວງຈຳປາສັກ ຂ່າວ: ທັດຊະນະ ຄອບຄົວ ທ່ານ ບຸນຍັງ ວໍລະຈິດ ອະດີດປະເທດປະເທດແຫ່ງ ສປປ ລາວ ໄດ້ມອບເງິນ ຈຳນວນ 100 ລ້ານກີບ, ໃຫ້ອົງການປົກຄອງ ແຂວງຈຳປາສັກ ເພື່ອປະກອບສ່ວນ ເຂົ້າໃນວຽກງານປ້ອງກັນ ສະກັດກັ້ນ, ຄວບຄຸມ ແລະ ແກ້ໄຂການລະບາດ ພະຍາດ COVID-19.

ພິທີມອບ-ຮັບ ດັ່ງກ່າວ, ໄດ້ມີຂຶ້ນໃນວັນທີ 4 ສິງຫາ 2021 ນີ້, ທີ່ຫ້ອງວ່າການແຂວງຈຳປາສັກ, ເຊິ່ງຕາງໜ້າມອບໂດຍ ທ່ານ ຄໍາມະນີ ອິນທິລາດ ອະດີດລັດຖະມົນຕີກະຊວງພະລັງງານ ແລະບໍ່ແຮ່ ແລະ ກ່າວຮັບໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີຫົວໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ຂັ້ນແຂວງ ແລະພາກສ່ວນກ່ຽວຂ້ອງ ເຂົ້າຮ່ວມພິທີ.

ໃນໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ຕາງໜ້າ ອົງການປົກຄອງ ແລະປະຊາຊົນ ຊາວແຂວງຈຳປາສັກ ໄດ້ສະແດງຄວາມຂອບໃຈ ແລະຮູ້ບຸນຄຸນໄປຍັງ ທ່ານ ບຸນຍັງ ວໍລະຈິດ ອະດີດປະເທດປະເທດແຫ່ງ ສປປ ລາວ ພ້ອມຄອບຄົວ ແລະລູກຫລານ ທີ່ມີຄວາມເປັນຫ່ວງເປັນໄຍ ຕໍ່ ປະຊາຊົນ ແລະໄດ້ໃຫ້ການສະໜັບສະໜູນ ອົງການປົກຄອງ ແຂວງຈຳປາສັກ ໃນວຽກງານປ້ອງກັນ, ຄວບຄຸມ ແລະ ຕ້ານການລະບາດຂອງພະຍາດໂຄວິດ-19, ພ້ອມກັນນັ້ນ ກໍ່ໄດ້ຊົມເຊີຍ ທ່ານ ຄໍາມະນີ ອິນທິລາດ ໃນການມາເຄື່ອນໄຫວວຽກງານຢູ່ແຂວງຈຳປາສັກ ໃນເທື່ອນີ້. ແລະ ຜ່ານມາ ແຂວງຈຳປາສັກ ແມ່ນໄດ້ເພີ່ມທະວີຄວາມເອົາໃຈໃສ່ ແລະ ວາງມາດຕະການ ສະກັດກັ້ນ, ປ້ອງກັນ ແລະ ຄວາມຄຸມການລະບາດຂອງພະຍາດ ໂຄວິດ-19 ໃນທົ່ວແຂວງ ແນໃສ່ ເພື່ອຮັບປະກັນບໍ່ໃຫ້ແຜ່ລະບາດອອກສູ່ຊຸມຊົນໃນວົງກວ້າງແຕ່ຫົວທີ, ແລະໄດ້ສຸມໃສ່ ປັບປຸງ ຍົົກລະດັບ ໂຮງໝໍພາກສະໜາມ ແລະສູນຈຳກັດບໍລິເວນຂອງແຮງງານ ທີ່ເຂົ້າມາຈຳນວນຫລາຍ ເພື່ອ ໃຫ້ພຽງພໍກັບຄວາມຕ້ອງການ.