ມີເດຍລາວແຂວງວຽງຈັນ ພາບ-ຂ່າວ: ແຫວນຄຳ. ກອງປະຊຸມເປີດຂຶ້ນໃນວັນທີ 4 ສິງຫາ 2021 ຢູ່ທີ່ສະໂມສອນໃຫຍ່ຫ້ອງວ່າການເມືອງໝື່ນ ພາຍໃຕ້ການເປັນປະທານຂອງທ່ານ ຄຳເຫຼັກ ທອງສະຫວັນ ກຳມະການພັກເເຂວງ ,ເລຂາຄະນະພັກຮາກຖານ ຫົວໜ້າພະແນກ ການເງິນແຂວງວຽງຈັນ,ມີທ່ານ ຄຳຜູແກ້ວ ດວງສີ ກຳມະການພັກເມືອງ ຮອງເຈົ້າເມືອງໆໝື່ນ, ມີຄະນະຮັບຜິດຊອບຂັ້ນເເຂວງ ,ຫ້ອງການ-ການເງິນເມືອງໝື່ນ ,ບັນດາຫ້ອງການອ້ອມຂ້າງເມືອງ,ຫົວໜ້າທະນາຄານ,ນັກທຸລະກິດ,ຜູ້ປະກອບການ ແລະ ຊາວຄ້າ-ຂາຍ ທົ່ວເມືອງເຂົ້າຮ່ວມ.

ກອງປະຊຸມຄັ້ງນີ້ແມ່ນໄດ້ຮັບຟັງການເຜີຍແຜ່ບັນດາເອກະສານ, ພ້ອມທັງຮັບຟັງຄຳເເນະນຳກ່ຽວກັບການນຳໃຊ້ລະບົບ (TaxRIS) ຈາກຄະນະທີມງານຂັ້ນເເຂວງ, ຈາກທະນາຄານທຸລະກິດຂອງລັດ ແລະ ເອກະຊົນ ໂດຍສະເພາະແມ່ນກົນໄກ,ຂັ້ນຕອນ ,ວິທີການຈັດຕັ້ງປະຕິບັດຕົວຈິງ, ຂອດການປະສານສົມທົບ ເພື່ອເຮັດໃຫ້ບັນດາໜ້າວຽກ ກໍ່ຄືແຜນການດຳເນີນງານໄປຕາມຂັ້ນຕອນ ຢ່າງມີປະສິດທະພາບ, ປະສິດທິຜົນ ເພາະວ່າລະບົບດັ່ງກ່າວນີ້ ເປັນລະບົບທີ່ທັນສະໄໝ ສາມາດເຊື່ອມໂຍງ ກັບລະບົບຄຸ້ມຄອງຂໍ້ມູນການເງິນເເຫ່ງລັດ ລະບົບ ( Rtis) ຂອງຄັງເງິນແຫ່ງຊາດ, ລະບົບຂໍ້ມູນວິສາຫະກິດ ອີອາເອັມ ( ERM) ຂອງອຸດສາຫະກໍາ ແລະ ການຄ້າ, ລະບົບຄຸ້ມຄອງພາສີແບບອັດຕະໂນມັດ ອາຊີກຸດະ ( ASYCUDA) ແລະ ລະບົບອື່ນໆ.

ກອງປະຊຸມໄດ້ຮັບຟັງການປະກອບຄຳເຫັນ ຈາກບັນດາຂະແໜງການຂັ້ນແຂວງ,ຂັ້ນເມືອງ ພ້ອມດ້ວຍບັນດານັກທະລະກິດ,ທະນາຄານ ແລະ ຜູ້ປະກອບການອື່ນໆ ເພື່ອສ້າງຄວາມເປັນເອກະພາບ ນອກຈາກນີ້ພາຍຫຼັງສຳເລັດກອງປະຊຸມຄັ້ງນີ້ເເລ້ວ ຂັ້ນຕອນຕໍ່ໄປ ແມ່ນຍັງຈະໄດ້ຈັດຝຶກອົບຮົມວຽກງານດັ່ງກ່າວ ໃຫ້ແກ່ພະນັກງານວິຊາການກ່ຽວຂ້ອງຂັ້ນເມືອງ ແລະ ຜູ້ປະກອບການໃຫ້ສາມາດນຳໃຊ້ລະບົບ ແລະ ປະຕິບັດກົນໄກການເເຈ້ງ – ມອບອາກອນດ້ວຍຕົນເອງ ຜ່ານລະບົບ (TaxRIS) ແລະ ຊໍາລະຜ່ານລະບົບທະນາຄານໃນຕໍ່ໜ້າ.
ຕອນທ້າຍກອງປະຊຸມຍັງໄດ້ຮັບຟັງການມີຄຳເຫັນໂອ້ລົມ ຂອງທ່ານ ຄຳເຫຼັກ ທອງສະຫວັນ ກຳມະການພັກເເຂວງ ,ເລຂາຄະນະພັກຮາກຖານ ຫົວໜ້າພະແນກ ການເງິນແຂວງວຽງຈັນ ຕື່ມອີກ.