ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ວັນທີ 4 ສິງຫາ 2021 ນີ້, ຢູ່ສະໂມສອນເມືອງໂພນໄຊ ແຂວງຫຼວງພະບາງ ສະຫາຍ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ ພ້ອມດ້ວຍຕາງໜ້າພະແນການຂອງແຂວງ ໄດ້ເຄື່ອນໄຫວຊີ້ນໍາ ກອງປະຊຸມຄົບຄະນະບໍລິຫານງານພັກເມືອງໂພນໄຊ ເປີດກວ້າງຄັ້ງທີ 6 ສະໄໝທີ IX ປະຈໍາ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2021 ໂດຍການເປັນປະທານສະຫາຍ ທອງຈັນ ລັດຕະນະປະດິດ ກຳມະການພັກແຂວງ ເລຂາຄະນະບໍລິຫານງານພັກເມືອງໂພນໄຊ,ມີຄະນະປະຈຳພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ປກສ-ປກຊ ພ້ອມດ້ວຍເລຂາ-ຮອງເລຂາພັກບ້ານທົ່ວເມືອງ ເຂົ້າຮ່ວມ.

ການມາຊີ້ນໍາຂອງສະຫາຍ ເລຂາພັກແຂວງ ຄັ້ງນີ້ສະຫາຍ ທອງຈັນ ລັດຕະນະປະດິດ ເລຂາພັກເມືອງ ກໍໄດ້ລາຍງານ ການຈັດຕັ້ງປະຕິບັດວຽກງານຮອບດ້ານ 6 ເດືອນຕົ້ນປີ 2021 ໃນທົ່ວເມືອງ ເຊິ່ງຍົກໃຫ້ເຫັນ ລະບົບການເມືອງມີຄວາມໜັກແໜ້ນ,ເຂັ້ມແຂງ ທົ່ວເມືອງມີຄວາມສະຫງົບ,ເສດຖະກິດ ແລະວັດທະນະທຳ-ສັງຄົມ ໄດ້ຮັບການປັບປຸງ ແລະ ມີທາງກ່າວກະໂດດ, ແບບແຜນວິທີເຮັດວຽກໄດ້ຮັບການປັບປຸງດີຂຶ້ນ.ເຊິ່ງສະແດງໃຫ້ເຫັນເສດຖະກິດຂອງເມືອງມີການຂະຫຍາຍ ຕົວ ໃນລະດັບ 4,6%, ທຽບໃສ່ແຜນປີຫຼຸດຄາດໝາຍ 60,5%, ລວມຍອດມູນຄ່າຜົນຜະລິດພາຍໃນ(GO)ບັນລຸໄດ້ 208,54 ຕື້ກີບ, ໃນນັ້ນ, ລວມຍອດຜະລິດຕະພັນຂະແໜງກະສິກໍາກວມເອົາ 88%, ອຸດສາຫະກໍາ-ຫັດຖະກໍາກວມ 1,3% ແລະການບໍລິການກວມ 10%; ສະເລ່ຍໃສ່ຫົວຄົນໜຶ່ງໄດ້ 5.774.000 ກີບ ຫຼື ເທົ່າກັບ 577 ໂດລາສະຫະລັດ ປະຕິບັດໄດ້ 61,43%; ໄດ້ຮັບທືນພັດທະນາທັງໝົດ 16 ໂຄງການ, ມູນຄ່າ 40,66 ຕື້ກີບ.

ຈາກນັ້ນບັນດາຫ້ອງການຕ່າງໆ ກໍໄດ້ກ່າວລາຍງານຜົນການປະຕິບັດວຽກງານ 6 ເດືອນ ແລະແຜນທິດທາງທ້າຍປີ ຢູ່ຂົງເຂດຕົນໃຫ້ຊາບຕື່ມອີກ.
ໂອກາດນີ້ສະຫາຍ ຄໍາຂັນ ຈັນທະວີສຸກ ໄດ້ມີທິດຊີ້ນໍາ ເຊິ່ງສະຫາຍກໍໄດ້ຕີລາຄາສູງ ຕໍ່ບັນດາຜົນສໍາເລັດໃນການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 5 ສະໄຫມທີ 6 ໃນໄລຍະ 6 ເດືອນຕົ້ນປີ 2021 ຕໍ່ກັບການຜັນຂະຫຍາຍຕາມມະຕິ XI ຂອງສູນກາງພັກ ພ້ອມກັນນັ້ນ ສະຫາຍກໍ່ໄດ້ເນັ້ນຫນັກຫຼາຍບັນຫາ ທີ່ມີລັກສະນະຫັນປ່ຽນ ແລະ ເປັນບ່ອນອີງໃຫ້ແກ່ຄະນະບໍລິຫານງານພັກເມືອງ.

ໃນນີ້ແມ່ນໃຫ້ສືບຕໍ່ຄົ້ນຄວ້າ ຫັນທິດທາງຫນ້າທີ່ຈຸດສຸມ 6 ເດືອນຕໍ່ຫນ້າ ເປັນໂຄງການດໍາເນີນງານປະຈໍາອາທິດ, ແຕ່ລະເດືອນ ແລະ ຫັນເປັນມະຕິຕົກລົງ ຂອງຄະນະພັກເມືອງ, ຕ້ອງຍົກສູງບົດບາດ ແລະ ຄວາມເປັນແບບຢ່າງນໍາຫນ້າ,ຄວາມສາມາດນໍາພາຂອງຕົນ ໃນທຸກຂົງເຂດວຽກງານ,ຫັນມະຕິຂອງພັກ ເຂົ້າໃນແຕ່ລະຂັ້ນໃຫ້ເປັນແຜນງານ, ໂຄງການ, ວຽກງານຈຸດສຸມ ໂດຍສອດຄ່ອງກັບເງື່ອນໄຂ ທ່າແຮງທ້ອງຖີ່ນ ແລະ ຄວາມສາມາດຂອງງົບປະມານ; ສືບຕໍ່ເພີ່ມທະວີສືກສາອົບຮົມການເມືອງ-ແນວຄິດຢ່າງເລີກເຊີ່ງ.ໃຫ້ບັນດາຂະແຫນງການ ທີ່ມີລາຍຮັບດ້ານວິຊາການເອົາໃຈໃສ່ໃນການຈັດເກັບ ແລະເຂົ້າງົບປະມານຕາມການແບ່ງປັນໃຫ້ຄົບຖ້ວນ; ບັນດາສະຫາຍຜູ້ຊີ້ນໍາບ້ານ ແລະກຸ່ມບ້ານຕ້ອງໄດ້ເອົາໃຈໃສ່ໃນການຕິດຕາມກວດກາ ແລະຍູ້ແຮງຂະບວນການຜະລິດຢູ່ທ້ອງຖິ່ນຕົນເອງ, ເອົາໃຈໃສ່ແກ້ໄຂບັນດາປະກົດການຫຍໍ້ທໍ້ຢູ່ພາຍໃນບ້ານ, ກຸ່ມບ້ານ ເພື່ອຫຼີກລ່ຽງປະກົດການຫຍໍ້ຖໍ້; ແຕ່ລະຫນ່ວຍພັກຕ້ອງໄດ້ເອົາໃຈໃສ່ສຶກສາອົບຮົມແນວຄິດ-ການເມືອງ ໃຫ້ສະມາຊິກພັກ ມີສະຕິເຄົາລົບ ແລະປະຕິບັດກົດລະບຽບຂອງພັກ, ຮ່ວມຊີວິດພັກ, ເສຍເງິນສະຕິພັກ, ສໍາຫຼວດກວດກາ ຕໍານິສົ່ງຂ່າວ ເພື່ອກໍ່ສ້າງກັນ ແກ້ໄຂບັນຫາປະກົດການຫຍໍ້ທໍ້ພາຍໃນພັກ, ບັນດາຂະແຫນງການຕ້ອງເປັນເຈົ້າການ ຍາດແຍ່ງເອົາການຊ່ວຍເຫຼືອ, ການລົງທຶນ ທັງພາຍໃນ ແລະ ຕ່າງປະເທດ ເຂົ້າມາພັດທະນາເມືອງ ບົນພື້ນຖານລະບຽບຫຼັກການ; ໃຫ້ຫ້ອງການສາທາລະນະສຸກເມືອງ ເອົາໃຈໃສ່ຄຸ້ມຄອງ, ດໍາເນີນການສັກຢາວັກຊີນ ແລະເຝົ້າລະວັງການການລະບາດຂອງພະຍາດໂຄວິດ-19 ແລະ ການລະບາດຂອງພະຍາດລະດູການ ຢ່າງເຂັ້ມງວດ;

ໃຫ້ຫ້ອງການກະສິກໍາ ແລະປ່າໄມ້ເມືອງ ຕ້ອງໄດ້ເອົາໃຈໃສ່ລົງຊຸກຍູ້-ສົ່ງເສີມ ການຜະລິດລະດູຝົນນີ້ໃຫ້ໄດ້ຮັບຜົນ ແລະການຜະລິດຂອງຊາວກະສິກອນໃຫ້ເພີ້ມຂຶ້ນ; ຕິດຕາມ, ເຝົ້າລະວັງພະຍາດລະບາດ ຕໍ່ສັດລ້ຽງ ຂອງປະຊາຊົນ ຢູ່ແຕ່ລະບ້ານ; ໃຫ້ຫ້ອງການ ປສກ ເມືອງ ຄົ້ນຄວ້າ, ກະກຽມ ລົງຂະບວນການກໍ່ສ້າງຮາກຖານການເມືອງ ເພື່ອດໍາເນີນການແກ້ໄຂ ບັນຫາປະກົດການຫຍໍ້ທໍ້ຕ່າງໆ ໃນທົ່ວເມືອງ; ມອບໃຫ້ຫ້ອງການໂຍທາທິການ ແລະ ຂົນສົ່ງເມືອງ ສືບຕໍ່ປະສານງານກັບພະແນກໂຍທາແຂວງ, ຄະນະຮັບຜິດຊອບຂັ້ນແຂວງ ແລະເຈົ້າຂອງໂຄງການກໍ່ສ້າງເສັ້ນທາງ ແລະ ໂຄງການຂະຫຍາຍຕາຂ່າຍນໍ້າປະປາ ໃຫ້ສໍາເລັດຕາມລະດັບຄາດຫມາຍ; ໃຫ້ຫ້ອງການອຸດສາຫະກໍາ ແລະການຄ້າເມືອງ ສຶກສາຄົ້ນຄວ້າການສ້າງຕະຫຼາດຊຸມຊົນຢູ່ບ້ານກິ່ວກະຈໍາ,ກວດກາ, ຕິດຕາມ, ຄຸ້ມຄອງ ແລະມີມາດຕະການ ກ່ຽວກັບການສວຍໂອກາດຂຶ້ນລາຄາສິນຄ້ານໍາເຂົ້າ ແລະກົດຫນ່ວງລາຄາສິນຄ້າສົ່ງອອກ ໃຫ້ຫ້ອງການພາຍໃນເມືອງ ຄົ້ນຄວ້າແຕ່ງຕັ້ງຄະນະຮັບຜິດຊອບຂັ້ນເມືອງ ດໍາເນີນການກະກຽມວຽກງານບໍລິຫານລັດ ເປັນຕົ້ນແມ່ນວຽກງານປະຕູດຽວ ແລະການມອບ-ໂອນວຽກງານວິທະຍາ ສາດ ແລະເຕັກໂນໂລຊີຂັ້ນເມືອງ; ໃຫ້ຫ້ອງການແຮງງານ ແລະສະຫວັດດີການສັງຄົມເມືອງ ສົມທົບກັບຄະນະຮັບຜິດຊອບປ້ອງກັນ ແລະແກ້ໄຂໄພພິບັດຂັ້ນເມືອງ ເອົາໃຈໃສ່ຄຸ້ມຄອງ, ຂຶ້ນແຜນອຸປະກອນ ເຄື່ອງຊ່ວຍເຫຼືອເພື່ອບັນເທົາໃນກໍລະນີມີໄພພິບັດເກີດຂຶ້ນ ແລະຕິດຕາມ, ແຈ້ງເຕືອນຂອບເຂດທີ່ມີຄວາມສ່ຽງ ຫຼືມັກເກີດໄພພິບັດ ໃນຄວາມຮັບຜີດຊອບຂອງຕົນຢ່າງທັນການ.