ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ວັນທີ 4 ສິງຫາ 2021 ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍ ຫົວໜ້າພະແນກສາທາລະນະສຸກແຂວງ,ມີຕາງໜ້າພະແນກການຂອງແຂວງ ໄດ້ເຄື່ອນໄຫວຢ້ຽມຢາມ ສູນຈໍາກັດບໍລິເວນ ບ້ານທ່າຂ້າມ ເມືອງໂພນໄຊ ແຂວງຫຼວງພະບາງ ຫຼືສູນກັ່ນຕອງ ແລະກັກໂຕ ແຮງງານ ມາຈາກຕ່າງຖິ່ນ ທີ່ເດີນທາງຂອງເມືອງໂພນໄຊ ໂດຍການນໍາພາຂອງທ່ານ ທອງຈັນ ລັດຕະນະປະດິດ ເຈົ້າເມືອງໂພນໄຊ ແລະຄະນະ.

ໂອກາດດັ່ງນີ້ອໍານວຍການສູນຈໍາກັດບໍລິເວນ ບ້ານທ່າຂ້າມ ກໍໄດ້ໃຫ້ຮູ້ວ່າ: ສູນຈໍາກັດບໍລິເວນ ບ້ານທ່າຂ້າມ ໄດ້ເລີ່ມຈັດຕັ້ງປະຕິບັດມາແຕ່ເດືອນ ເມສາ 2021 ເນື່ອງຈາກມີການລະບາດຂອງພະຍາດ ໂຄວິດ -19 ເພື່ອກັ່ນຕອງ ແລະ ຈໍາກັດບໍລິເວນ ແຮງງານຂອງເມືອງໂພນໄຊ ທີ່ໄປເຮັດວຽກຢູ່ຕ່າງຖິ່ນ ເດີນທາງເຂົ້າເມືອງ. ສູນດັ່ງກ່າວມີຄະນະ 4 ທ່ານ,ວິຊາການ 8 ທ່ານ,ຈາກກໍາລັງ ປກສ-ປກຊ 2 ທ່ານ,ມີຕຶກຄຸ້ມຄອງ 3 ຫຼັງ,ມີທັງມົດ 4 ຫ້ອງ,ມີຫ້ອງປະຈໍາການຂອງແພດ 1 ຫ້ອງ,ຫ້ອງຈໍາກັດບໍລິເວນ 3 ຫ້ອງ,ຫ້ອງນໍ້າທັງໝົດ 3 ຫ້ອງ ແລະ ອຸ່ງເກັບນໍ້າ 1 ອຸ່ງ ແລະເຄື່ອງຮັບໃຊ້ອື່ນໆອີກຈໍານວນໜຶ່ງ. ພາຍຫຼັງໄດ້ຮັບການແຕ່ງຕັ້ງ ຄະນະກໍໄດ້ມີການຈັດແບ່ງຜຽນປະຈໍາການ ແລະວິຊາການປະຈໍາສູນ,ຈາກນັ້ນກໍ່ໄດ້ປຸກລະດົມ ປະຊາຊົນ ແລະ ນັກທຸລະກິດ ໃຫ້ການຊ່ວຍເຫຼືອ ແລະຮ່າງລະບຽບການຕ່າງໆ ເຄື່ອງຕິດຕາມກວດກາຜູ້ເຂົ້າມາຈໍາກັດບໍລິເວນ,ສ້າງລະບຽບການຄຸ້ມຄອງບຸກຄົນ.ຕັ້ງແຕ່ເລີ່ມຈັດຕັ້ງປະຕິບັດມາຮອດປັດຈຸບັນມີຜູ້ມາຈໍາກັດບໍລິເວນ 231 ຄົນ,ຍິງ 95 ຄົນ,ອາຍຸສູງສຸດ 58 ປີ,ຕໍ່າສຸດ 7 ເດືອນ ແລະ ອາຍຸສະເລ່ຍ 29ປີ,ໃນນັ້ນແຮງງານທີ່ເດີນທາງມາຈາກຕ່າງປະເທດ 9 ຄົນ,ຍິງ 4 ຄົນ,ຈາກຕ່າງແຂວງ 83 ຄົນ,ຍິງ 43 ຄົນ,ມາຈາກພາຍໃນແຂວງຫຼວງພະບາງ 54 ຄົນ,ຍິງ 31 ຄົນ,ປັດຈຸບັນຍັງເຫຼືອຜູ້ຈໍາກັດບໍລິເວນທັງໝົດ 22 ຄົນ, ຍິງ 9 ຄົນ,ຜ່ານມາໄດ້ເກັບຕົວຢ່າງໄປກວດທັງໝົດ 204 ກໍລະນີ ຜົນອອກມາເປັນລົບທັງໝົດ.

ການມາຢ້ຽມຢາມຄັ້ງນີ້ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ຍັງໄດ້ເນັ້ນໃຫ້ຜູ້ທີຖືກຈໍາກັດບໍລິເວນ ຢູ່ສູນດັ່ງກ່າວນີ້ ຈົ່ງໃຊ້ຄວາມອົດທົນໃນການດໍາລົງຊີວິດຢູ່ສູນ ໃນຊ່ວງໄລຍະເວລາຈໍາກັດບໍລິເວນ ທີ່ກໍານົດໄວ້ຂອງແພດໝໍ ຫຼືຜູ້ຄຸ້ມຄອງສູນ,ໃນເມື່ອກັບມາຈາກຕ່າງຖິ່ນແລ້ວ ກໍ່ໃຫ້ຫີບຮ້ອນກັກຕົນເອງສາກ່ອນ ເພື່ອກວດກາສຸຂະພາບ ແລະເກັບຕົວຢ່າງ ຊອກຫາເຊື້ອພະຍາດ ໂຄວິດ-19 ບໍ່ໃຫ້ ແຜ່ເຊື້ອໃຊ້ຄົນໃນຄອບຄົວ ແລະເພື່ອນມິດສະຫາຍຫຼືຊຸມຊົນຂອງຕົນ ແລະ ຈະຕົກເປັນຈໍາເລີຍສັງຄົມ ກ່າວໂຈມຕີ ກ້າວໄປເຖິງຜິດຕໍ່ລະບຽບກົດໝາຍບ້ານເມືອງຕື່ມອີກ.ຕ້ອງມີສະຕິລະວັງຕົວໃນການເດີນທາງໄປມາຫາສູ່ກັນ ຖ້າບໍຈໍາເປັນແມ່ນບໍ່ໃຫ້ອອກບ້ານ,ແຕ່ຖ້າມີຄວາມຈໍາເປັນອອກໄປ ແມ່ນໃຫ້ສວມໃສ່ຜ້າປິດປາກ,ໝັ່ນລ້າງມື້,ເວັ້ນໄລຍະຫ່າງ ແລະ ຫຼີກລ່ຽງຊຸມຊົນແອອັດ.