ມີເດຍລາວແຂວງຫຼວງພະບາງ
ພິທີປະກາດເລື່ອນຊັ້ນໃຫ້ນາຍສິບຂອງຫ້ອງເສນາທິການທະຫານແຂວງຫຼວງພະບາງ ໄດ້ຈັດຂື້ນໃນວັນທີ 5 ສິງຫາ 2021 ນີ້ ທີ່ສະໂມສອນຂອງກົມກອງ. ໂດຍການເປັນປະທານ ຂອງສະຫາຍ ພັນໂທ ຄໍາສອນ ໂພທິວັນ ຮອງຫົວໜ້າກອງບັນຊາການ ຫົວໜ້າຫ້ອງເສນາທິການທະຫານແຂວງ ມີຄະນະພັກ – ຄະນະບັນຊາ 5 ຫ້ອງອ້ອມຂ້າງ, ຫົວໜ້າພະແນກ, ຮອງພະແນກ, ຄະນະບັນຊາກົມກອງຕະຫຼອດນາຍສິບທີ່ໄດ້ຮັບການເລື່ອນຊັ້ນໃໝ່ຈາກບັນດາກົມກອງທົ່ວທະຫານແຂວງເຂົ້າຮ່ວມ.

ສະຫາຍ ພັນໂທ ໄພວັນ ເພັງສຸວັນ ຫົວໜ້າພະແນກກໍາລັງພົນຫ້ອງເສນາທິການທະຫານແຂວງຫຼວງພະບາງ ໄດ້ຜ່ານຂໍ້ຕົກລົງຂອງກົມໃຫ່ຍເສນາທິການກອງທັບ ວ່າດ້ວຍການອະນຸມັດເລື່ອນຊັ້ນນາຍສິບຢູ່ກອງບັນຊາການທະຫານແຂວງຫຼວງພະບາງ ຕົກລົງເລື່ອນຊັ້ນສິບເອກຂື້ນວາທີຈໍານວນ 44 ສະຫາຍ, ໂດຍແມ່ນ ສະຫາຍ ພັນໂທ ຄໍາສອນ ໂພທິວັນ ຮອງກອງບັນຊາການ ຫົວໜ້າຫ້ອງເສນາທິການທະຫານແຂວງຫຼວງພະບາງ ໃຫ້ກຽດຂື້ນປະດັບຊັ້ນໃຫ້ພາກສ່ວນດັ່ງກ່າວ. ແລະ ພ້ອມທັງກ່າວວ່າ.

ບັນດາສະຫາຍທີ່ໄດ້ຮັບການເລື່ອນຊັ້ນໃໝ່ໃນຄັ້ງນີ້ ແລະຕ້ອງອອກແຮງຝຶກຝົນຫຼໍ່ຫຼອມຕົນເອງ, ປັບປຸງທັດສະນະຫຼັກໝັ້ນ, ດຸໝັ່ນຂະຫັຍນພຽນ,ຊອກຮໍ່າຮຽນ ເພື່ອຍົກລະດັບຄວາມຮູ້, ຄວາມສາມາດຂອງຕົນໃຫ້ສູງຂື້ນ,ຕ້ອງກໍາແໜ້ນ ແລະເຊື່ອມຊຶມແນວທາງຂອງພັກ, ລະບຽບກົດໝາຍຂອງລັດ ແລະ ຂໍ້ກໍານົດກົດລະບຽບຂອງກອງທັບ. ໂດຍສະເພາະແມ່ນ 4 ໜ້າທີ່ໃຫ່ຍ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກກໍ່ຄືມະຕິຂອງກອງບັນຊາການທະຫານແຂວງ ນໍາໄປຈັດຕັ້ງປະຕິບັດໃຫ້ປະກົດຜົນເປັນຈິງ, ການປະກອບສ່ວນປັບປຸງກໍ່ສ້າງກົມກອງຮັບປະກັນລະບົບບັນຊາ ໃຫ້ມີຄວາມສະຫົງບ, ບົນພື້ນຖານແມ່ນເສີມຂະຫຍາຍຄວາມສາມັກຄີພາຍໃນເປັນປຶກແຜ່ນ ເພື່ອປົກປັກຮັກສາ ແລະ ສ້າງສາພັດທະນາປະເທດຊາດ ,ຕິດພັນກັບການເສີມຂະຫຍາຍມູນເຊື້ອເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອແກ້ໄຂຊີວິດການເປັນຢູ່ໃຫ້ດີຂື້ນ ແລະເຮັດສໍາເລັດໜ້າທີ່ວຽກງານທີ່ການຈັດຕັ້ງມອບໝາຍໃຫ້.