ມີເດຍລາວແຂວງເຊກອງ ຂ່າວ: ສີສັກດາ ບຸນໄຊຄຳ. ໃນຕອນເຊົ້າວັນທີ 6 ສິງຫາ 2021 ນີ້ ກອງບັນຊາການທະຫານເມືອງດາກຈຶງເປິດບັ້ນອົບຮົມ-ຫັດແອັບວິຊາປ້ອງກັນຊາດປະຈຳປີ 2021 ພາຍໃນກົມກອງຂອງຕົນຂຶ້ນ ໂດຍການເປັນປະທານຂອງທ່ານ ພັທ ແກ້ວອຸດອນ ສາຍນໍ້າແດ ຄະນະປະຈຳພັກເມືອງ ຫົວໜ້າການເມືອງກອງບັນຊາການທະຫານເມືອງ ດາກຈຶງ, ມີທ່ານ ພັທ ພັນສອນ ຮຽງສະຫວັນ ຫົວໜ້າການທະຫານກອງບັນຊາການທະຫານເມືອງ, ມີບັນດາຫົວໜ້າພະແນກ, ມີນາຍ ແລະ ພົນທະຫານພາຍໃນກົມກອງເຂົ້າຮ່ວມ.

ທ່ານ ຮທ ຄຳອື່ງ ເຢັນມະດາວ ຫົວໜ້າຂະແໜງສູ້ລົບອົບຮົມກອງບັນຊາການທະຫານເມືອງດາກຈຶງ ໄດ້ຂື້ນກ່າວເປິດບັ້ນອົບຮົມ-ຫັດແອບການເມືອງ, ການທະຫານ, ພະລາທິການ, ເຕັກນິກໃຫ້ນາຍ ແລະ ພົນທະຫານ ພາຍໃນກອງບັນຊາການທະຫານເມືອງວ່າ: ໂດຍຈັດຕັ້ງປະຕິບັດຕາມແຜນການຝຶກອົບຮົບ-ຫັດແອບປັບປຸງລະບຽບແບບແຜນຝຶກອົບຮົມຫຼໍ່ຫຼອມກຳລັງແຮງກາຍ, ການຈັດຕັ້ງປະຕິບັດການຝຶກອົບຮົມ-ຫັດແອັບປະຈຳປີ 2021 ນີ້,

ເພື່ອເຮັດໃຫ້ພະນັກງານ-ນັກຮົບທຸກສະຫາຍໄດ້ເຊື່ອມຊືມຢ່າງເລິກເຊິ່ງ ແລະ ໜັກແໜນທາງດ້ານການເມືອງ-ນຳພາແນວຄິດໃຫ້ຮູ້ແຈ້ງກ່ຽວກັບຄວາມໝາຍ-ຄວາມສຳຄັນຂອງການອົບຮົມ-ຫັດແອບດ້ານສິລະປະຢຸດ-ຍຸດທະວິທີ ແລະ ລະບຽບວິໄນຢ່າງເຂັ້ມງວດ, ຮູ້ຈັກນຳໃຊ້ທ່າຈັງຫວະ, ບາດກ້າວຂອງການກະທຳ ແລະ ຮູ້ຈັກນຳໃຊ້ອາວຸດ-ລູກກະສູນລະບົບທັນສະໄໝແມ່ນພາຫະນະອັນແຫຼ່ມຄົມທີ່ພັກ-ລັດມອບໝາຍໃຫ້ມີຄວາມຮັບປະກັນ ແລະ ຄວາມປອດໄພໃຫ້ໄດ້ 100 %, ເຊິ່ງການຝຶກອົບຮົມຄັ້ງນີ້ມີ 3 ພາກຄື: ອົບຮົມພາກການເມືອງມີ 10 ວັນ,ອົບຮົບພາກການທະຫານມີ 140 ວັນ, ອົບຮົມວຽກງານພາລາທິການມີ 10 ວັນ ແລະ ໄດ້ກຳນົດເວລາທັ້ງໝົດ 160 ວັນ, ມີຈຳນວນພົນນັກຮົບພາຍໃນກອງບັນຊາການທະຫານເມືອງດາກຈຶງເຂົ້າຮ່ວມທັງໝົດ 122 ສະຫາຍ, ຍິງ 12 ສະຫາຍ.

ໃນໂອກາດນີ້ທ່ານ ພັທ ແກ້ວອຸດອນ ສາຍນໍ້າແດ ຄະນະປະຈຳພັກເມືອງຫົວໜ້າການເມືອງກອງບັນຊາການທະຫານເມືອງຍັງໄດ້ຮຽກຮ້ອງໃຫ້ນາຍ ແລະ ພົນທະຫານທຸກຄົນຕ້ອງຕັ້ງໜ້າໃຊ້ຄວາມພະຍາຍາມເຂົ້າສຶກສາຮໍ່າຮຽນໃຫ້ໄດ້ຮັບຜົນດີ, ມີຄຸນນະພາບສູງ, ໄດ້ປະກອບສວນເຂົ້າໃນວຽກງານປ້ອງກັນຊາດ ແລະ ຕ້ອງໄດ້ປະຕິບັດຕາມບົດຮຽນ 7 ຈັງຫວະຟື້ນຖານ ແລະ ຮູ້ 7 ລະບອບ 18 ວຽກຂອງກອງທັບຢ່າງເຂັ້ມງວດ.